Abatswerĩ 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Mĩdĩanĩ bakanũbaya Ĩsraelĩ

¹ Kandi abana ba Ĩsraelĩ mobakola ekyabya kibi omo meso wʼOmwami Mukulu; neryo Omwami Mukulu mwahĩrabo omo byala byʼAbamĩdĩanĩ oko myaka irinda.

² Nʼebyala byʼAbamĩdĩanĩ mobyasingula Abaĩsraelĩ; kandi busana na Mĩdĩanĩ, abana ba Ĩsraelĩ mobayitakulira ebyũna ebiri omo bitwa, nʼemyangalũ, nʼahakongotere.

³ Neryo omugulu Abaĩsraelĩ babiba embuto Abamĩdĩanĩ mobasa, nʼAbaamalekĩ, nʼabana bʼendata; mobasa eribambirabo.

⁴ Kandi mobahanda ekilaliriro kyabo aho, kandi mobaherya embuto yʼakalyo kʼomo kitaka, erĩhĩka eGaza, mobatasĩga ebyʼerirya omo Ĩsraelĩ, kutse embũlĩ, kutse ende, kutse epunda.

⁵ Kusangwa mobasa haguma nʼesyonde syabo nʼamahema wabo; mobasa ngʼesyongĩke busana nʼobungi bwabo; ibo nʼesyongamia syabo ini butaganzika. Mobasa omo kihugo eriheryakyo,

⁶ NʼAbanya Mĩdĩanĩ mobanũbya Abaĩsraelĩ bo kutsibu; nʼabana ba Ĩsraelĩ mobalakira Omwami Mukulu.

⁷ Neryo, omugulu abana ba Ĩsraelĩ balakira Omwami Mukulu busana na Mĩdĩanĩ,

⁸ Omwami Mukulu mwatumira abana ba Ĩsraelĩ omũmĩnyererĩ, neryo mwabwirabo, ati, Omwami Mukulu, Nyamuhanga wa Ĩsraelĩ, akabũga ati, Nabalũsaya eMĩsĩrĩ, nabalũsaya omo nyũmba yʼobukobe.

⁹ Kandi monabalamya omo byala byʼAbanya Mĩsĩrĩ, nʼomo byala byʼabosĩ ababanũbaya, monahigabo embere syenyũ, kandi monabaha ekihugo kyabo;

¹⁰ kandi monababwira nyiti, Ĩngye indi Mwami Mukulu Nyamuhanga wenyũ; simusyubaha esyonyamuhanga syʼAbaamorĩ, eyo mwĩkere omo kihugo kyabo. Nĩkwa momutahulikirira omulenge wage.

Omũlaĩka akabũga na Gĩdeonĩ

¹¹ Nʼomũlaĩka wʼOmwami Mukulu mwasa, mwĩkala omo ndĩna yʼomuti wʼomũterebĩntĩ owabya eOfra, owabya lubibi lwa Yoasĩ Omũbĩezerĩ; nʼomugala wuwe Gĩdeonĩ abya akahũmba engano omo kikamiro kyʼebĩnyũ, busana nʼerĩbĩsayo oko Bamĩdĩanĩ.

¹² Nʼomũlaĩka wʼOmwami Mukulu mwamuhulukira, mwabũga naye ati, Omwami Mukulu ali haguma nawe, uwe mundu wʼamaka wʼamalwa.

¹³ Neryo Gĩdeonĩ mwabũga naye ati, Uwe mukama wage, Omwami Mukulu amabya ali haguma netu, busana nakĩ ebyosĩ ebĩ byamatuwako kwehĩ? Nʼemĩbĩrĩ yiwe yosĩ yʼeriswekera iri hahi eyo abotata-kulu wetu batugambulira, bati, Omwami Mukulu mwatatũlũsya eMĩsĩrĩ kwehĩ? Nĩkwa lino Omwami Mukulu abiritugusa, kandi abĩrĩtũhĩra omo byala byʼAbamĩdĩanĩ.

¹⁴ Neryo Omwami Mukulu mwamutungerera, mwabũga ati, Ugende omo maka wawe aya, kandi ũlamaye Ĩsraelĩ omo byala byʼAbamĩdĩanĩ; sinditakutuma kwehĩ?

¹⁵ Naye mwamubwira ati, Uwe Mukama, nasyalamya Ĩsraelĩ ũmũkĩ kwehĩ? Lebaya, ekĩtũnga kyage ni kisama kwilaba omo Bamanase, nage indi mulere kwilaba omo kĩtũnga kya tata.

¹⁶ Neryo Omwami Mukulu mwabũga naye ati, Kwenene nasyabya haguma nawe, kandi wasyĩta Abamĩdĩanĩ ngʼomundu muguma.

¹⁷ Naye mwamubwira ati, Lino namabana erĩsĩmwa omo meso wawe, ũnyĩkangaye ekiminyikalo ko ni we ũkabũga nage.

¹⁸ Kĩsĩ-kĩsĩ sĩgũlũe hano nde nabiswasa ukʼuwe nʼerireta ehongo yage, nʼerĩhĩrayo embere syawe. Naye mwabũga, ati, Ngandirinda erĩhĩka aho wasira.

¹⁹ Na Gĩdeonĩ mwingira, mwakokotya akahene, nʼehitole hyʼekitiri kiguma kyʼeyĩsyano omute ekĩhamya; mwahĩra eyĩswĩ omo kĩbo, kandi mwahĩra nʼomuto omo kibindi, mwamuleterabyo eyĩhya oko ndĩna yʼomuti wʼeterebĩntĩ, mwamũhereryabyo.

²⁰ Nʼomũlaĩka wa Nyamuhanga mwamubwira ati, Wĩmaye esĩswĩ nʼehitole ehite mo kĩhamya, ũhĩrebyo okwʼĩbwe erĩ, kandi gũte omuto. Naye mwakola atya.

²¹ Neryo omũlaĩka wʼOmwami Mukulu mwakolya obusongera bwʼomũtso wuwe owabya omo byala biwe, mwatũla okwʼĩswĩ nʼehitole ehite mo kĩhamya; neryo omuliro mwahuluka omwʼĩbwe, mwalyatsirira esĩswĩ nʼotutole otute mo kĩhamya. Neryo omũlaĩka wʼOmwami Mukulu mwalũa omo meso wuwe.

²² Na Gĩdeonĩ mwalangira kwʼalwe mũlaĩka wʼOmwami Mukulu; kandi Gĩdeonĩ mwabũga, ati, Ĩlolo, uwe Omukama Mwami Mukulu! Kusangwa nabirilangira omũlaĩka wʼOmwami Mukulu ameso oko meso.

²³ Kandi Omwami Mukulu mwabũga naye ati, Obuholo bubye kuwe; Sigubahe, siwendihola.

²⁴ Neryo Gĩdeonĩ mwahĩmbĩra Omwami Mukulu ekiherero aho, mwahulaho mo Mwami Mukulu ni Buholo. Nʼerĩhĩka mũnabwĩre kikineho eOfra wa Abĩezerĩ.

Gĩdeonĩ akaheraya ebiherero bya Baalĩ

²⁵ Neryo ekiro ekyo, Omwami Mukulu mwamubwira ati, Ĩmaya enume yʼende ya tata wawe, nʼeyindi nume yʼakabiri yʼende eyʼemyaka irinda, ũhĩmbũle ekiherero kya Baalĩ ekyo tata wawe awite, kandi ukondere esanamu ya Asera yʼahisi eyĩhererenĩe nakyo;

²⁶ kandi ũhĩmbĩre Omwami Mukulu Nyamuhanga wawe ekiherero endata oko hakongotere aha ngʼeritondeka lyaho, kandi wĩmaye enume yʼende yʼakabiri uhereyo mo buhere bwʼerĩokererya oko ngwĩ syʼesanamu ya Asera eyo wakondera ahisi.

²⁷ Neryo Gĩdeonĩ mwĩmya abalume ĩkũmĩ oko bagombe buwe, mwakola ngoko Mwami Mukulu amubwira; neryo, kusangwa ubaha ekĩtũnga kya tata wuwe nʼabandu bʼomũyĩ, mwatatoka erikolakyo omwʼitungi, mwakolabyo omo kiro.

²⁸ Kandi omugulu abandu bʼomũyĩ babuka omo ngyakya-ngyakya lebaya, ekiherero kya Baalĩ ikyabirisambulwa, nʼeAsera eyĩhererenĩe nakyo ĩyabĩrĩkĩndĩrwa ahisi, nʼenume yʼakabiri yʼende iyabirihererwa oko kiherero ekyahĩmbawa.

²⁹ Kandi mobabũlanĩa bati, Nindi wakolĩre ekindu ekĩ kwehĩ? Neryo omugulu basondaya nʼerĩbũlya, mobabũga bati, Gĩdeonĩ omugala wa Yoasĩ yo wakolĩre omwatsi oyũ.

³⁰ Neryo abandu bʼomũyĩ mobabwira Yoasĩ, bati, Hũlũkaya mugala wawe ahole, kusangwa abirisambula ekiherero kya Baalĩ, kandi kusangwa abirikenzera ahisi esanamu ya Asera eyĩhererenĩe nakyo.

³¹ Na Yoasĩ mwabwira abosĩ ababya bakalwa naye, ati, Mwasyalwira Baalĩ kwehĩ? Kutse mwasyamũlamya kwehĩ? Oyo wanzĩre erimulwira, ĩtawe bute bwakya; amabya ini nyamuhanga, ayilwire, kusangwa omundu abirisambula ekiherero kiwe.

³² Kyaleka oko kiro ekyo iniamuluka mo Yerũbaalĩ, riti, Muleke Baalĩ alwe naye, kusangwa abirisambula ekiherero kiwe.

Erĩhĩndana oko malwa

³³ Neryo Abamĩdĩanĩ nʼAbaamalekĩ nʼabana bʼebwanga bwʼendata mobayĩhĩndanĩa mobasoka, mobahanda ekilaliriro omo musya wʼeYezreelĩ.

³⁴ Nĩkwa Omũlĩmũ wʼOmwami Mukulu mwahĩka uku Gĩdeonĩ; naye mwabuha engubi; nʼAbanya Abĩezerĩ mobahĩndanĩbwa erimukwama.

³⁵ Kandi mwatuma abakwenda uku Manase ehosĩ; nabo mobabirikirwa erimukwama; kandi mwatuma abakwenda uku Aserĩ, nʼuku Zebũlũnĩ, nʼuku Nafũtalĩ; neryo mobasa erĩhĩndana nabo.

Ekiminyikalo kyʼekimi oko ngobĩ

³⁶ Neryo Gĩdeonĩ mwabũga na Nyamuhanga ati, Wamanza erĩlamya Abaĩsraelĩ omo byala byage, ngoko wabĩrĩbũga,

³⁷ Lebaya, ngandĩhĩra engobĩ yʼembũlĩ oko kĩhũmbĩro; neryo ekimi kyamabya oko ngobĩ nyisa, nʼekitaka ĩkĩnũmĩre, neryo nasyaminya ngoko ukandĩsyalamya Abaĩsraelĩ omo byala byage, ngoko wabĩrĩbũga.

³⁸ Neryo mokyabya kitya; kusangwa mwabuka omo ngakyangyakya, mwalĩnga engobĩ haguma, mwakamula ekimi omo ngobĩ, ekibindi mokyũsũla mwʼamagetsi.

³⁹ Kandi Gĩdeonĩ mwabũga na Nyamuhanga ati, Erihitana lyawe sirinyigulumirireko, nage ngandĩbũga engendo nguma eno; ngakusaba Uleke nyirenge omo ngobĩ ngendo nguma eyĩ nyisa; Uleke engobĩ ibye ĩyũmĩre nʼekimi kibye oko kitaka kyosĩ.

⁴⁰ Na Nyamuhanga mwakola atya ekiro ekyo; kusangwa engobĩ moyabya ĩnĩnũmĩre nyisa, nʼekimi mokyabya oko kitaka kyosĩ.