Abatswerĩ 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Baraka na Debora bakĩta Sĩsera

¹ Nʼabana ba Ĩsraelĩ mobakola ebibi kandi omo meso wʼOmwami Mukulu, Ehũdĩ abihola.

² Neryo Omwami Mukulu mwagũlyabo omo byala bya Yabĩnĩ omwami wʼeKanana, oyo watabala eHazorĩ; omukulu wʼemilondo yʼabasĩrĩkanĩ yiwe abya Sĩsera, oyo wabya ĩkere eHarosetĩ-Goyĩmũ.

³ Nʼabana ba Ĩsraelĩ mobalakira. Omwami Mukulu; kusangwa Sĩsera abya nʼesyogalĩ magana mwenda syʼebyuma; kandi ĩnĩabĩrĩagalya abana ba Ĩsraelĩ bo kutsibu emyaka makũmĩ abiri.

⁴ Nĩkwa Debora, omũmĩnyererĩ wʼobũkalĩ, omũkalĩ wa Lapĩdotĩ, mwatswera Ĩsraelĩ oko mugulu oyo.

⁵ Abya ĩkere oko ndĩna yʼomuti wʼamabondo wa Debora omo katĩkatĩ kʼeRama nʼeBetĩ-elĩ omo kihugo kyʼebitwa kya Efũraĩmũ; nʼabana ba Ĩsraelĩ mobahetukira ewuwe eritswerwa emyatsi.

⁶ Neryo mwatuma eribirikira Baraka mugala wa Abĩnoamũ akalũa eKadesĩ-nafũtalĩ, neryo mwamubwira ati, Omwami Mukulu, Nyamuhanga wa Ĩsraelĩ, abirikuhana, ati, Ugende usegere oko kitwa kyʼeTaborĩ, kandi wĩmaye haguma nawe abandu elfu ĩkũmĩ oko bana ba Nafũtalĩ nʼabana ba Zebũlũnĩ.

⁷ Nage nasyakuletera Sĩsera omukulu wʼemilondo yʼabasĩrĩkanĩ ya Yabĩnĩ oko lũsĩ lwʼeKĩsoʼnĩ, haguma nʼesyogalĩ siwe nʼendeko yiwe yʼabasĩrĩkanĩ, kandi nasyamũhĩra omo byala byawe.

⁸ Na Baraka mwabũga naye ati, Wamagenda nage, nage inagenda; nĩkwa wamatendigenda haguma nage, nage Sindiendigenda.

⁹ Neryo Debora mwabũga ati, Kwenene ngandigenda haguma nawe; nĩkwa, olugendo wasyagenda si lwʼolukengerwa lwawe; kusangwa Omwami Mukulu asyagũlya Sĩsera omo byala byʼomũkalĩ. Na Debora mwahangana, mwagenda haguma na Baraka eKadesĩ.

¹⁰ Na Baraka mwabirikira Zebũlonĩ na Nafũtalĩ haguma eKadesĩ; kandi abalume elfu ĩkũmĩ mobahetukirayo haguma naye. Debora nibya mwagenda haguma naye.

¹¹ Neryo Heberĩ Omũkenĩ, iniabiriyisolola oko Bakenĩ oko bana ba Hobabũ ĩse-byala wa Musa, abya iniabirihanda ehema yiwe erĩhĩka oko muti wʼeterebĩntĩ eZananĩmũ omũyĩ owali hakũhĩ nʼeKadesĩ.

¹² Neryo mobabwira Sĩsera ngoko Baraka mugala wa Ahĩnoamũ amahetukira oko kitwa kyʼeTaborĩ.

¹³ Na Sĩsera mwahĩndanĩa haguma esyogalĩ siwe syosĩ, esyogalĩ magana mwenda syʼebyuma, nʼabandu bosĩ ababya haguma naye, erĩtsũka eHarosetĩ-Goyĩmũ, erĩhĩka oko lũsĩ lwʼeKĩsonĩ.

¹⁴ Na Debora mwabũga na Baraka ati, Hangana; kusangwa ekĩ ni kiro ekyo Mwami Mukulu abĩrĩhĩra Sĩsera omo byala byawe; Omwami Mukulu sialitagenda embere syawe kwehĩ? Neryo Baraka mwandagala atya erĩlũa oko kitwa kyʼeTaborĩ, nʼabalume elfu ĩkũmĩ ĩbanamũkwamĩre.

¹⁵ Neryo Omwami Mukulu mwasagĩsya Sĩsera, nʼesyogalĩ siwe syosĩ nʼemilondo yiwe yosĩ yʼabasĩrĩkanĩ, omo boya bwʼomũyalĩ embere sya Baraka; kandi Sĩsera mwakĩma oko galĩ yiwe, mwatibita omo bisando biwe.

¹⁶ Nĩkwa Baraka mwakwamirira esyogalĩ, nʼemilondo yʼabasĩrĩkanĩ erĩhĩka eHarosetĩ-Goyĩmũ; nʼomulondo wʼabasĩrĩkanĩ gosĩ wa Sĩsera mwawa omo boya bwʼomũyalĩ; mohatasaka mundu nʼomuguma.

¹⁷ Nĩkwa Sĩsera mwatibita omo bisando biwe oko hema ya Yaelĩ muka Heberĩ Omũkenĩ; kusangwa habya Obuholo omo katĩkatĩ ka Yabĩnĩ omwami wʼeHazorĩ nʼekĩtũnga kya Heberĩ Omũkenĩ.

¹⁸ Kandi Yaelĩ mwayakokya Sĩsera, mwabũga naye ati, Ingira mukama wage, ingira omwage, Sigubahe. Naye mwingira omuwe omo hema, naye mwamuswika ekirago.

¹⁹ Neryo Sĩsera mwabũga naye ati, Ngakusaba umbe otugetsi twʼerĩpũlya; kusangwa ngwĩre enyota. Naye mwakũnũngũla akasya kʼamasabũ, mwamuhago erĩpũlya, neryo mwamuswika.

²⁰ Kandi Sĩsera mwamubwira ati, Uhangane omo lũkyo lwʼehema, neryo Omugulu Omundundi akasa erĩkũbũlya ati, Hano hane mundu kwehĩ? Iwamubwira uti, Iyihi.

²¹ Neryo Yaelĩ muka Heberĩ mwĩmya engyingyi yʼehema, kandi mwĩmya enyondo omo byala biwe, neryo mwaya aho ali ho bũbĩso-bĩso, mwakongomerera engyingyi yʼomo masakira wuwe, nayo moyatwanganira omo kitaka; kusangwa abya omo tũgotserĩ tunene ĩnĩalũhĩre. Neryo mwahola.

²² Neryo lebaya, omugulu Baraka abya akwamĩre Sĩsera, Yaelĩ Mwahuluka erĩhĩndana naye, mwabũga naye ati, Asa, ngandĩkũkangya, omundu oyo gukasonda. Naye mwingira haguma naye, neryo lebaya, Sĩsera inialambukere ĩnĩaholĩre, nʼengyingyi yʼehema inine omo masakira wuwe.

²³ Nyamuhanga kwʼakĩnda atya Yabĩnĩ omwami wʼeKanana ekiro ekyo embere syʼabana ba Ĩsraelĩ.

²⁴ Nʼebyala byʼabana ba Ĩsraelĩ mobyakanya omo maka erĩkĩnda Yabĩnĩ omwami wʼeKanana, erĩhĩka okwʼĩherya Yabĩnĩ omwami wʼeKanana.