Abatswerĩ 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebihanda ebyasĩgalira eKanana

¹ Neryo ebĩ bye bihanda ebyo Mwami Mukulu asĩga, erirenga mubyo mo Ĩsraelĩ, (abosĩ, abatabya basĩ nʼahake amalwa wʼeKanana;

² esyondengo syʼabana ba Ĩsraelĩ sitoke erĩkangĩrĩrĩbwa amalwa, abatabya basĩgo erĩmbere nʼahake).

³ Abakama batanu bʼAbafĩlĩstĩnĩ, nʼAbakanana bosĩ, nʼAbasĩdona, nʼAbahĩvĩ ababya bĩkere oko kitwa kyʼeLebanonĩ, erĩtsũka eBaal-hermonĩ erĩhĩka oko bwingiriro bwʼeHamatĩ.

⁴ Abo babya busana nʼerirenga Abaĩsraelĩ bo mubyo, eriminya nga banasyahulikirira ebihano byʼOmwami Mukulu, ebyo ahana abotata-kulu wabo omo buno bwa Musa.

⁵ Nʼabana ba Ĩsraelĩ mobĩkala omo katĩkatĩ kʼAbakanana, Abahĩtĩ, nʼAbaamorĩ, nʼAbaperezĩ, nʼAbahĩvĩ, nʼAbayebũsĩ.

⁶ Mobatabya abali babo eribya bakalĩ babo, kandi mobaha abali abo babuta oko bana babo, mobakolera esyonyamuhanga syabo.

⁷ Nʼabana ba Ĩsraelĩ mobakola ebibi omo meso wʼOmwami Mukulu Nyamuhanga wabo, mobibirirwa Omwami Mukulu Nyamuhanga wabo, kandi mobakolera esyosanamu sya Baalĩ na Aseterotĩ.

⁸ Kyaleka erihitana lyʼOmwami Mukulu iryagulumira oko Ĩsraelĩ, neryo mwagũlyabo omo byala bya Kũsanĩ-rĩsataĩmũ omwami wʼeMesopotamia. Nʼabana ba Ĩsraelĩ mobakolera Kũsanĩ-rĩsataĩmũ emyaka munani.

⁹ Kandi omugulu abana ba Ĩsraelĩ balakira Omwami Mukulu, Omwami Mukulu mwahanganĩrya abana ba Ĩsraelĩ omũlamya oyo walamayabo, ye Otĩnĩelĩ mugala wa Kenazĩ mulumuna wa Kalebũ.

¹⁰ Omũlĩmũ wʼOmwami Mukulu mwamũhĩkako, naye mwatswera Ĩsraelĩ. Omugulu ayalwa, Omwami Mukulu mwahĩra Kũsanĩ-rĩsataĩmũ omwami wʼeMesopotamia omo byala biwe; neryo Otĩnĩelĩ mwakĩnda Kũsanĩ-rĩsataĩmũ.

¹¹ Nʼekihugo mokyahumula emyaka makũmĩ ani. Na Otĩnĩelĩ mugala wa Kenazĩ mwahola.

¹² Nʼabana ba Ĩsraelĩ mobaswakola ebibi kandi omo meso wʼOmwami Mukulu. Neryo Omwami Mukulu mwaha amaka uku Eglonĩ omwami wʼeMoabũ eribambira Ĩsraelĩ, kusangwa babya ibabirikola ebibi omo meso wʼOmwami Mukulu.

¹³ Naye mwayĩhĩndanĩako abana ba Amona na Amalekĩ; neryo mwayakĩnda Ĩsraelĩ, mobĩmya omũyĩ wʼemiti yʼamabondo.

¹⁴ Nʼabana ba Ĩsraelĩ mobakolera Eglonĩ omwami wʼeMoabũ emyaka ĩkũmĩ nʼomunani.

Omũtswerĩ Ehũdĩ

¹⁵ Nĩkwa omugulu abana ba Ĩsraelĩ balakira Omwami Mukulu, Omwami Mukulu mwahanganĩryabo omũlamya, Ehũdĩ mugala wa Gera, Omũbenyamĩna, omundu wʼamalembe. Nʼabana ba Ĩsraelĩ mobamutuma nʼengemu uku Eglonĩ omwami wʼeMoabũ.

¹⁶ Na Ehũdĩ mwayihesera omũyalĩ wʼamoya abiri, obuli bwago bwabya sentĩmetere; nga makũmĩ atanu; neryo mwambalago omwisi wʼolukimba oko kihinga kiwe kyʼamali.

¹⁷ Neryo mwahererya engemu uku Eglonĩ omwami wʼeMoabũ; nĩkwa Eglonĩ abya mundu ũnenehĩre.

¹⁸ Nʼomugulu abuga erĩhererya engemu, mwahongokya abandu abaheka engemu.

¹⁹ Nĩkwa iye mwabũnũkala akalũa ahali esyosanamu esyabya eGĩlgalĩ, neryo mwabũga ati, Nyiwite omwatsi wʼerĩkũmbo busana nawe, uwe mwami. Neryo omwami mwabũga ati, Mubye bũkũtũ musegere; Nʼabosĩ ababya bahangene hakũhĩ naye mobamũsĩgaho.

²⁰ Na Ehũdĩ mwasa aho ali; naye abya ĩnĩanĩkere ĩyowene omo kyumba kyʼendata ahali amabeho. Neryo Ehũdĩ mwabũga ati, Ngwite omwatsi ukʼuwe owakalũa ewa Nyamuhanga. Neryo mwahangana oko kĩtũmbĩ kiwe.

²¹ Neryo Ehũdĩ mwasumba ebyala biwe byʼamalembe, mwĩmya omũyalĩ oko kihinga kiwe kyʼamali, mwalũbago omo nda yiwe.

²² Nʼekirindi nibya mokingira haguma nʼekigembe, nʼebĩsabũ mobyahũmanĩa ekigembe, kusangwa mwatakula omũyalĩ omo nda yiwe; neryo omũyalĩ mwahurungana.

²³ Neryo Ehũdĩ mwahulukira omo bũsekũ, mwakinga esyonyũyĩ syʼekyumba kyʼendata, neryo mwahomasyo.

²⁴ Nĩkwa Ehũdĩ abere abihuluka, abagombe ba Eglonĩ mobasa; neryo mobalangira, esyonyũyĩ syʼekyumba kyʼendata ĩsĩnahomĩre; neryo mobabũga bati, Kwamũhwa akaswika ebisando biwe omo kyumba kyʼendata.

²⁵ Neryo mobalindirira erĩhĩka aho bakwĩra esĩsonĩ; neryo lebaya, mwatakingula esyonyũyĩ syʼekyumba kyʼendata. Neryo mobĩmya ekĩboholĩ mobakingulasyo; neryo lebaya, omukama wabo iniabiritogera ahisi ĩnĩaholĩre.

²⁶ Na Ehũdĩ mwatibita omugulu balindirira, mwatwangana oko syosanamu syʼamabwe, mwabalira eSeĩra.

²⁷ Neryo, omugulu ahĩka, mwabuha engubi omo kihugo kyʼebitwa kya Efũraĩmũ; nʼabana ba Ĩsraelĩ mobandagala haguma naye erĩlũa omo kihugo kyʼebitwa, neryo Ehũdĩ abya embere syabo.

²⁸ Neryo mwabwirabo ati, Munyikwame; kusangwa Omwami Mukulu abĩrĩhĩra esyonzĩgũ syenyũ Abamoabũ omo byala byenyũ. Neryo mobandagala enyũma wuwe, mobĩmya ebisokero byʼeYorodanĩ eyisirya wʼeMoabũ, kandi mobatalĩga omundu nʼomuguma erisoka.

²⁹ Nʼoko mugulu oyo mobĩta abandu elfu ĩkũmĩ (10,000) Abanya Moabũ, obuli mundu wʼamaka, nʼobuli mbangĩ; mohatabala mundu nʼomuguma.

³⁰ Ko Moabũ akĩndawa atya ekiro ekyo omo byala bya Ĩsraelĩ. Nʼekihugo mokyahumula emyaka makũmĩ munani.

Omũtswerĩ Samũgarĩ

³¹ Nʼenyũma wuwe habya Samũgarĩ mugula wa Anatĩ, oyo wĩta oko Bafĩlĩstĩnĩ abandu magana ndatu (600) omo muhunda wʼerĩkũnĩrĩrya ende; naye mwalamya Abaĩsraelĩ.