Abatswerĩ 21 - AMASAKO ABOYTRTRE WA NYAMUHANGA AWAKAHULAWA MO BIBLIA

Abakalĩ busana na Benyamĩna

¹ Nĩkwa abandu ba Ĩsraelĩ ibamabiyisemera eMĩsĩpa bati, Sihesyabya omundu nʼomuguma wa kwʼĩtwe oyo wasyaha mwali wuwe eribya mũkalĩ wʼOmũbenyamina.

² Neryo abandu bosĩ mobahĩka eBetelĩ, mobĩkalaho erĩhĩka omwʼĩgolo-golo embere sya Nyamuhanga mobasumba emirenge yabo mobalira nʼobũlĩge bunene.

³ Mobabũga bati, Uwe Mwami Mukulu Nyamuhanga wa Ĩsraelĩ, busana nakĩ ekĩ kyamabya omo Ĩsraelĩ, ekihanda kiguma kyamabula mũnabwĩre omo Ĩsraelĩ kwehĩ?

⁴ Neryo omo ngyakya, abandu mobatsinduka, mobahĩmbayo ekiherero, mobahonga amahere wʼerĩokererya nʼamahere wʼobuholo.

⁵ Nʼabana ba Ĩsraelĩ mobabũga bati, Nindi omo katĩkatĩ kʼebihanda byosĩ bya Ĩsraelĩ oyũtahĩka omo ndeko oko Mwami Mukulu kwehĩ? Kusangwa ibabiriyisema kutsibu busana nʼoyũtahĩka oko Mwami Mukulu eMĩsĩpa, bati, Kwenene asyĩtwa.

⁶ Nʼabana ba Ĩsraelĩ mobayĩkwĩra obũlĩge busana nʼomugala wabo ye Benyamĩna, bati ekihanda kiguma kyabiritahulwa oko Ĩsraelĩ mũnabwĩre.

⁷ Tukolekĩ eribanira abandu abasĩgere bʼabakalĩ kwehĩ? Kusangwa motwalahĩrya oko Mwami Mukulu ngoko tutendisyahabo abali betu eribya bakalĩ babo.

⁸ Neryo mobabũga bati, Ni kihanda kyahi omo bihanda bya Ĩsraelĩ ekĩtahĩka oko Mwami Mukulu eMĩsĩpa kwehĩ? Neryo lebaya, mohatahĩka nʼomuguma omo kilaliriro oyo walũa eYabesĩ-gĩleadĩ erĩhĩka omo ndeko.

⁹ Kusangwa omugulu abandu baganzawa, lebaya, aho sihabya nʼomuguma oko ndũlanĩ syʼeYabesĩgĩleadĩ.

¹⁰ Nʼendeko moyatuma eyo, abandu elfu ĩkũmĩ nʼĩbĩrĩ (12,000) esyombangĩ kũndũ, mobahanabo bati, Mugende, mwĩte esyondũlanĩ syʼeYabesĩ-Gĩleadĩ omo boya bʼomũyalĩ, haguma nʼabakalĩ nʼabana.

¹¹ Ekĩ kyo mwasyakola; mwasyaherya kũndũ obuli mulume nʼobuli mũkalĩ oyo wabirigotsera nʼomulume.

¹² Neryo mobabana abambesa magana ani omo ndũlanĩ syʼeYabesĩ-Gĩleadĩ, abate baminya mulume erigotsera naye; mobaletabo oko kilaliriro eSĩlo, eyiri omo kihugo kyʼeKanana.

¹³ Neryo endeko yosĩ moyatumira erĩkanĩa nʼabagala ba Benyamĩna ababya omwʼĩbwe lya Rĩmonĩ, mobatũlĩrabo Obuholo.

¹⁴ Neryo Ababenyamĩna mobasubula oko mugulu oyo; kandi mobahabo abakalĩ abo babalaya oko bakalĩ bʼeYabesĩ-Gĩleadĩ; nĩkwa mobatahĩkana kubo.

¹⁵ Nʼabandu mobayĩkwĩra obũlĩge busana na Benyamĩna, kusangwa Omwami Mukulu ĩnĩabĩrĩhĩra erigabana omo bihanda bya Ĩsraelĩ.

¹⁶ Neryo abakulu bʼendeko mobabũga bati, Twasyakolakĩ kwehĩ eribanira abasigalira bʼabakalĩ, kusangwa abakalĩ babĩrĩherĩbwa omo Babenyamĩna.

¹⁷ Kandi mobabũga bati, Litolere omwandu iniabya busana nabo ababala oko Babenyamĩna, Sihabye ekihanda kĩkalĩmawa omo Ĩsraelĩ.

¹⁸ Nĩkwa ĩtwe sĩtwangalĩga erihabo bali betu erĩhĩkyabo; kusangwa abana ba Ĩsraelĩ ĩbamabĩlahĩrya, bati, Oyukaha omũkalĩ oko Mũbenyamĩna atakirawe.

¹⁹ Kandi mobabũga bati, Lebaya, hali ekiro kikulu kyʼOmwami Mukulu obuli mwaka eSĩlo, eyiri ebwanga bwʼelutambi lwʼendata wʼeBetelĩ, oko bwanga bwʼendata omo nzira nene eyikahetuka eSekemũ erĩlũa eBetelĩ, nʼelutambi lwʼeyĩkwa lwʼeLebona.

²⁰ Kandi mobahana abana ba Benyamĩna, bati, Mugende muyalambire omo malima wʼebĩnyũ;

²¹ kandi mulangire, neryo lebaya, abali bʼeSĩlo bamahuluka bakasyasata amasata, neryo nenyũ mũlũe omo malima wʼebĩnyũ, muyihambire obuli mundu mũkalĩwe oko bali bʼeSĩlo, neryo mugende omo kihugo kya Benyamĩna.

²² Neryo kyasyabya omugulu abotata wabo kutse abagala babo basyasa eritsongera kwĩtwe, twasyabwirabo tuti, Mutuhebo okwʼigenyera; kusangwa motutahambira obuli mundu mũkalĩwe omo malwa, kutse momutaha bobo; bite bitya nga muli kʼomusango.

²³ Nʼabana ba Benyamĩna mobakola batya, mobayĩmĩrya abakalĩ ngʼemiganzo yabo, ukwʼabo basata, mobatwalabo; mobagenda nʼerisuba oko mwandu wabo, mobahĩmba emĩyĩ, mobĩkala muyo.

²⁴ Nʼabagala ba Ĩsraelĩ mobalũayo oko mugulu oyo, obuli mundu oko kihanda kiwe nʼoko kĩtũnga kiwe, mobalũayo mobaya obuli mundu oko mwandu wuwe.

²⁵ Omo biro ebyo sihabya mwami omo Ĩsraelĩ; obuli mundu mwakola ekyabya kibuya omo meso wuwe ĩyowenewene.