Abatswerĩ 19 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwatsi wʼOmũlawĩ nʼomũhwekĩ wuwe

¹ Neryo oko biro ebyo, omugulu hatabya mwami omo Ĩsraelĩ, habya Omũlawĩ muguma oyo wĩkere hali omo kihugo kyʼebitwa kya Efũraĩmũ, oyo wahwekaya omũhwekĩ wʼeBetelehemũ-Yũda.

² Nʼomũhwekĩ wuwe mwamutswako eribya mũmalaya, mwamũlũako mwasuba omo nyũmba ya tata wuwe eBetelehemũ-Yũda, mwabyayo oko mikera ĩnĩ.

³ Kandi ĩba wuwe mwahangana, mwamukwamira, erĩyabũga naye ndeke erĩmũsũbũlya kandi, iniawite omugombe wuwe haguma naye, nʼesyopunda ĩbĩrĩ, neryo omũkalĩ oyo mwamuleta omo nyũmba ya tata wuwe; nʼomugulu ĩse wʼomwana-muto amulolako mwatsema erĩhĩndana naye.

⁴ Neryo ĩse-byala, ĩse wʼomwama-muto oyo, mwamũlĩndya; naye mwĩkala haguma naye ebiro bisatu. Mobalya, nʼerĩpũlya, mobagotseraho.

⁵ Neryo oko kiro kyʼebini, mobabuka lũba omo ngyakya-ngyakya, neryo mwahangana ati akahongoka; nʼĩse wʼomwana-muto mwabũga na mukwe wuwe, ati, Ũtsũke erĩũkũla erĩsĩkya omutima wawe nʼakatole kake kʼobundu, neryo imomwayigendera.

⁶ Neryo mobĩkala, kandi mobalya nʼerĩpũlya, ababiri abo haguma; neryo ĩse wʼomwana-muto oyo mwabũga nʼomundu oyo ati, Kĩsĩ-kĩsĩ, Ũlĩge, erigotsera eno ekiro ekĩ, nʼomutima wawe atseme.

⁷ Neryo omundu oyo mwahangana erigenda, nĩkwa ĩse-byala wuwe mwamuhatikana, kyaleka iniagotseraho kandi.

⁸ Neryo oko kiro kyʼakatanu mwabuka omo ngyakya-ngyakya ati akahongoka; kandi ĩse wʼomwana-muto mwabũga ati, Kĩsĩ-kĩsĩ, ũhũmũlaye omutima wawe, ulinde erĩhĩka okwʼirenga lyʼeryuba; neryo mobalya, ababiri abo.

⁹ Nʼomugulu omundu oyo ahangana erihongoka, iye nʼomũhwekĩ wuwe, nʼomugombe wuwe, ĩse-byala wuwe, ĩse wʼomwana-muto, mwamubwira ati, Lebaya, lino bukahumbera; kĩsĩ-kĩsĩ ulinde ugotsere eno kandi. Lebaya, obũtũkũ bũkĩra; ugotsere hano, omutima wawe atseme. Neryo iwahangana engyakya-ngyakya busana nʼolugendo lwawe iwabana eriya eka wawe.

¹⁰ Nĩkwa omundu oyo mwatanza eririnda ekiro ekyo, nĩkwa mwahangana, mwahongoka, mwahĩka hakũhĩ nʼeYebũsĩ (eyo ye Yerũsalema). Kandi iniawite esyopunda ĩbĩrĩ haguma naye ĩsĩsesĩre. Kandi iniawite haguma naye omũhwekĩ wuwe nibya.

¹¹ Omugulu babya hakũhĩ nʼeYebũsĩ, obũtũkũ bwabya hakũhĩ nʼerihumbera; nʼomugombe mwabũga nʼomukama wuwe ati, Kĩsĩ-kĩsĩ, wase tukitire oko mũyĩ oyũ wʼAbayebũsĩ, tugotsereho.

¹² Nʼomukama wuwe mwamubwira ati, Sitwendikitira omo mũyĩ wʼabandu bʼehali, abate bagala ba Ĩsraelĩ; tukanditwangana erĩhĩka eGĩbea.

¹³ Neryo mwabwira omugombe wuwe ati, Wase tusegere hakũhĩ oko kiguma kyʼebĩkyo ebĩ; tukandigotsera eGĩbea kutse eRama.

¹⁴ Neryo mobalaba batya mobayigendera omo nzira yabo; nʼeryuba molyalengerabo hakũhĩ nʼeGĩbea, omo kihugo kya Benyamĩna.

¹⁵ Mobakitirayo, eriyagotsera eGĩbea; neryo mwingira mwĩkala omo nzira nene yʼomũyĩ; kusangwa sihabya mundu wʼerĩkokyabo omo nyũmba yiwe eriyagotsera.

Ababenyamĩna bakatsandaya omũhwekĩ wʼOmũlawĩ

¹⁶ Neryo, omũsyakulu muguma abya akakũlũka oko mũbĩrĩ wuwe omwʼirima omwʼĩgolo-golo; neryo omundu oyo abya wʼekihugo kyʼebitwa kya Efũraĩmũ, abya akabungira eGĩbea; nĩkwa abandu bayo babya Babenyamĩna.

¹⁷ Neryo mwasumba ameso wuwe mwalangira omũgendĩ oyo omo nzira yʼomũyĩ; nʼomũsyakulu oyo mwabũlya ati, Ukayahi kwehĩ? Kandi ũkalũahĩ kwehĩ?

¹⁸ Naye mwamubwira ati, Tũkalũa eBetelehemũ-Yũda, tukalabira eyisirya wʼekihugo kyʼebitwa kya Efũraĩmũ, kusangwa indi wako, kandi monaya eBetelehemũ-Yũda. Nĩkwa lino ngaya eka wage; kandi sihali mundu oyo wamanyĩkokya omo nyũmba yiwe.

¹⁹ Nĩkwa hane esyombuba syʼerisesera esyopunda syetu, nʼebiti busana nasyo; kandi hali obundu nʼebĩnyũ busana nage, na busana nʼomwana-muto wawe, kandi busana nʼomũlwana oyuli haguma nʼabagombe bawe; sihali obwaga bwʼekindu nʼekiguma.

²⁰ Kandi omũsyakulu mwabũga ati, Obuholo bubye ukʼuwe; nĩkwa obwaga bwawe bosĩ bubye ũkwʼĩngye; nĩkwa sugotsere omo nzira.

²¹ Neryo mwamwĩngĩrya omo nyũmba yiwe, mwaha esyopunda syʼebiti; neryo mobakosa ebisando byabo, mobalya mobapũlya.

²² Nʼomugulu babya bakatsemesya emitima yabo, lebaya, abalume bʼomũyĩ oyo, abandu batswatswa, mobatĩmba oko nyũmba, mobahuma oko lũyĩ; mobabũga nʼomwenye nyũmba, omũsyakulu oyo, bati, Hũlũkaya omundu oyo oyulingira omo nyũmba yawe, tuminyane naye.

²³ Nʼomundu oyo Omwenye nyũmba mwahulukirabo, mwabũga nabo ati, Iyihi balĩkyetu, kĩsĩ-kĩsĩ, Simukole ekibi kingaha; kusangwa omundu oyũ amingira omo nyũmba yage, Simukole obũkĩrũ obũ.

²⁴ Lebaya, omwali wage omukondo ali hano, nʼomũhwekĩ wuwe. Lero ngandibaleterabo lino eyĩhya, muhemulebo, mukolebo ngoko mwanzĩre. Nĩkwa Simukole obũkĩrũ bungaha oko mundu oyũ.

²⁵ Nĩkwa abalume abo mobatamowa; neryo mundu oyo mwahamba omũhwekĩ wuwe mwamũhũlũkĩryabo; nabo mobamuteta, nʼerĩmũtsandya ekiro ekyo kyosĩ erĩhĩka omo ngyakya; nʼomugulu bwatsũka erikya mobamũlwĩka.

²⁶ Neryo omũkalĩ oyo mwasa bukakya, mwawa oko lũkyo lwʼenyũmba yʼomundu oyo eyo mukama wuwe abyamo, erĩhĩka aho bwakera.

²⁷ Neryo omukama wuwe abere abibuka omo ngyakya, mwakingula esyonyũyĩ syʼenyũmba, mwahulukira eyĩhya ati akagenda, neryo lebaya, omũkalĩ mũhwekĩ wuwe iniabiriwa oko lũkyo lwʼenyũmba, nʼebyala biwe ibine oko nzeguliro.

²⁸ Neryo mwamubwira ati, Hangana tugende, nĩkwa mwatamũsũbĩrya. Neryo mwamũhĩra oko punda; neryo omundu oyo mwahongoka mwaya ewuwe.

²⁹ Neryo abere abĩhĩka omũwe, mwĩmya omuhamba, mwahamba omũhwekĩ wuwe, mwamugaba mo kĩtsũko-kĩtsũko, amagabo ĩkũmĩ nʼabiri, mwamutuma omo kihugo kyosĩ kya Ĩsraelĩ.

³⁰ Neryo mokyabya kitya omugulu abosĩ balangirakyo mobabũga bati, Sihehatakolwa omwatsi owali ngʼoyũ kutse erilolwako erĩtsũka ekiro abana ba Ĩsraelĩ balũa omo kihugo kyʼeMĩsĩrĩ nʼerĩhĩka mũnabwĩre. Mũganĩrayego, mũbũlanaye, mũbũge!