Abatswerĩ 14 - AMASAKO ABOYTRTRE WA NYAMUHANGA AWAKAHULAWA MO BIBLIA

Samũsonĩ akasonda erĩtahya Omũfĩlĩstĩnĩ

¹ Na Samũsonĩ mwandagalira eTĩmũna, mwalangira eTĩmũna yʼomũkalĩ muguma wʼoko bali bʼAbafĩlĩstĩnĩ.

² Neryo mwahetuka, nʼeribwira tata wuwe na nyĩnya wuwe, ati, Nabirilangira eTĩmũna omũkalĩ muguma oko bali bʼAbafĩlĩstĩnĩ; lino mũnyĩtahĩrayeye eribya mũkalĩ wage.

³ Neryo tata wuwe na koyo wuwe mobamũsũbĩrya batĩ, Omũkalĩ siali omo katĩkatĩ kʼabali bʼabagala benyũ, kutse omo katĩkatĩ kʼekĩtũnga kyetu, uti ũkayahĩkaya omũkalĩ wʼAbafĩlĩstĩnĩ abatabwene kwehĩ? Neryo Samũsonĩ mwabwira tata wuwe ati, Ũnyĩhĩkĩraye oyo; kusangwa namamubuyahirwa ndeke.

⁴ Nĩkwa tata wuwe na koyo wuwe mobataminya nga kĩnemũlũa oko Mwami Mukulu; kusangwa asonda omwanya wʼerilwa nʼAbafĩlĩstĩnĩ. Neryo oko mugulu oyo, Abafĩlĩstĩnĩ ibakatabala oko Baĩsraelĩ.

Samũsonĩ akĩta endale

⁵ Neryo Samũsonĩ na tata wuwe na koyo wuwe mobandagalira eTĩmũna, mobahĩka oko malima wʼebĩnyũ byʼeTĩmũna; neryo lebaya, omusuko wʼendale mwamururumira.

⁶ Omũlĩmũ wʼOmwami Mukulu mwamũhĩkako omo maka, neryo mwatulayo ngoko angatũlĩre ekyana kyʼembene; kandi isiawite uku kindu omo byala biwe; nĩkwa mwatabwira tata wuwe kutse koyo wuwe ebyo akolĩre.

⁷ Neryo mwandagalirayo mwakanĩrya omũkalĩ oyo, neryo Samũsonĩ mwamubuyahirwa ndeke.

⁸ Nʼenyũma kwʼaho omugulu asubula erĩmwĩmya; neryo mwakitira oko mũsĩke wʼenzira erilangira ekĩnda kyʼendale eyo, neryo lebaya, habya erirumbu lyʼesyonzuki nʼobuki omo kĩnda kyʼendale.

⁹ Kandi mwakola obuki omo byala biwe, neryo mwaswagenda, inianemulya akagenda; neryo mwahĩka ahali tata wuwe na koyo wuwe neryo mwahabo obuki, nabo mobalya; nĩkwa mwatabwirabo kwʼaliakola obuki omo kĩnda kyʼendale.

Omwʼĩherũkya liwe

¹⁰ Neryo tata wuwe mwandagalira eyiri omũkalĩ oyo, neryo Samũsonĩ mwatsumba erirya ĩnene eyo; kusangwa abalwana babya bakakola batya.

¹¹ Neryo omugulu bamulolako mobaleta abalĩkyabo makũmĩ asatu (30) eribya naye.

¹² Neryo Samũsonĩ mwabwirabo ati, Mutaleka ngandibagusira endekerano lino; mwamatoka erĩkũmbũlayo omo biro birinda byʼebiro bikulu ebĩ, neryo ngandisyabaha esyʼeriyiswika syʼekĩtanĩ makũmĩ asatu, nʼebindi byambalo makũmĩ asatu.

¹³ Nĩkwa mwamatenditoka erĩngũmbũlĩrayo, neryo nenyũ mwasyamba esyʼeriyiswika syʼekĩtanĩ makũmĩ asatu nʼebindi byambalo makũmĩ asatu. Nabo mobamubwira bati, Gusa endekerano yawe, twoweyo.

¹⁴ Naye mwabwirabo ati, Omo mũlĩ momwalũa akalyo, Nʼomo wʼamaka momwalũa obusi. Neryo omo biro bisatu mobataluka erĩkũmbũla endekerano eyo.

¹⁵ Neryo oko kiro kyʼebirinda, mobabwira omũkalĩ wa Samũsonĩ, bati, Ũlembesanaye ĩbawe, iniabana erĩtũkũmbũlĩra endekerano, tũkasyakũhĩsya nʼekĩtũnga kya tata wawe omo muliro. Mwatubirikira erituyira mo bera kwehĩ? Si kwenene kwehĩ?

¹⁶ Neryo muka Samũsonĩ mwalirira embere siwe ati, Ũnyĩkwĩre ko kĩnĩga kisa, sũnyanzĩre; wabirigusa endekerano oko bana bʼekĩtũnga kyetu, kandi sulitambwira. Naye mwamubwira ati, Lebaya, sinditabwira tata na koyo wage, nawe ngandikubwira kwehĩ?

¹⁷ Naye mwalirira embere siwe ebiro birinda, ebiro bikulu byabo ibikineho; neryo oko kiro kyʼebirinda mwamubwira kusangwa amuhatikana kutsibu; naye mwabwira abana bʼekĩtũnga kiwe endekerano eyo.

¹⁸ Neryo abandu bʼomũyĩ mobamubwira oko kiro kyʼebirinda eryuba lite ryalenga bati, Nĩkĩ kyo kĩsĩhĩre kwilaba obuki kwehĩ? nʼekyʼamaka kwilaba endale ni kyahi kwehĩ? Neryo mwabwirabo ati, Kumbe mutaliateba ogʼomwage, Kumbe nga simwetatoka erĩkũmbũla endekerano yage.

¹⁹ Neryo Omũlĩmũ wʼOmwami Mukulu mwamũhĩkako nʼamaka, neryo mwandagalira eAskelonĩ, mwĩta abalume makũmĩ asatu ba kubo, mwĩmya ebyo anyega neryo mwaha ebyambalo oko bakũmbũla endekerano eyo. Nʼerihitana liwe molyaka, neryo mwahetukira oko nyũmba ya tata wuwe.

²⁰ Nĩkwa omũkalĩ wa Samũsonĩ mwahabwa uku mũlĩkyabo oyo wabya mwĩra wuwe.