Abatswerĩ 12 - AMASAKO ABOYTRTRE WA NYAMUHANGA AWAKAHULAWA MO BIBLIA

Yefũta akakĩnda Abaefũraĩmũ

¹ Neryo abalume ba Efũraĩmũ mobahĩndana haguma, mobalaba ebwanga bwʼeLutambi lwʼEndata; mobabwira Yefũta bati, Busana nakĩ mowalaba eriyalwa nʼabana ba Amonĩ, mutatubirikira erigenda haguma nawe kwehĩ? Tukandikũhĩsĩrya kwʼenyũmba yawe.

² Na Yefũta mwabwirabo ati, Ĩngye nʼabandu bage twabya nʼamalwa manene nʼabana ba Amonĩ; kandi omugulu nababirikira, momũtanyĩlamya omo byala byabo.

³ Nʼomugulu nalangira ko mũtetanyĩlamya, mondalanda oko ngebe yage, monasoka eriyalwa nʼabana ba Amonĩ, nʼOmwami Mukulu mwahĩrabo omo byala byage; neryo busana nakĩ mukanyasira mũnabwĩre erilwa nage kwehĩ?

⁴ Neryo Yefũta mwahĩndanĩa abandu bosĩ bʼeGĩleadĩ, mwalwa na Efũraĩmũ: nʼabandu bʼeGĩleadĩ mobĩta Efũraĩmũ, kusangwa babũga bati, Muli abatswa bʼeEfũraĩmũ ĩnywe Bagĩleadĩ omo katĩkatĩ ka Efũraĩmũ, nʼomo katĩkatĩ ka Manase.

⁵ NʼAbagĩleadĩ mobĩmya ebisokero byʼeYorodanĩ ebwanga bwʼeEfũraĩmũ. Neryo omugulu abatswa ba Efũraĩmũ babũga bati, Uleke nyisoke, abandu ba Gĩleadĩ mobamũbũlya bati, Uwe uli Omũefũraĩmũ kwehĩ? Naye mwabũga ati, Iyihi;

⁶ ibamubwira bati, Watabũga uti, Shĩboletĩ; naye mwabũga ati, Sĩboletĩ; kusangwa syabya asĩ erĩbũgakyo ndeke; neryo mobamuhamba mobamwĩtĩra oko bisokero byʼeYorodanĩ. Neryo mohawa oko mugulu oyo Abaefũraĩmũ elfu makũmĩ ani nʼĩbĩrĩ (42,000).

⁷ Na Yefũta mwatswera Ĩsraelĩ emyaka ndatu. Neryo Yefũta Omũgĩleadĩ mwahola, mwatabwa omo muguma wʼemĩyĩ yʼeGĩleadĩ.

Omũtswerĩ Ĩbũsanĩ

⁸ Nʼenyũma wuwe Ĩbũsanĩ wʼeBetelehemũ mwatswera Ĩsraelĩ.

⁹ Kandi abya awite abagala makũmĩ asatu nʼabali makũmĩ asatu abo aherũkaya eyĩhya oko kĩtũnga kiwe, neryo mwatuma ehandi erienda abalyana makũmĩ asatu busana nʼabagala buwe. Neryo mwatswera Ĩsraelĩ emyaka irinda.

¹⁰ Neryo Ĩbũsanĩ mwahola, mwatabwa eBetelehemũ.

Omũtswerĩ Elonĩ

¹¹ Nʼenyũma siwe Elonĩ Omũzebũlũnĩ mwatswera Ĩsraelĩ; kandi mwatswera Ĩsraelĩ emyaka ĩkũmĩ.

¹² Neryo Elonĩ Omũzebũlũnĩ mwahola, mwatabwa eAyalonĩ omo kihugo kya Zebũlũnĩ.

Omũtswerĩ Abũdonĩ

¹³ Nʼenyũma siwe Abũdonĩ mugala wa Hĩlelĩ Omũpĩratonĩ mwatswera Ĩsraelĩ.

¹⁴ Naye abya awite abagala makũmĩ ani nʼabitsikulu makũmĩ asatu, ababya bakagenda oko byana byʼesyogunda makũmĩ alinda; naye mwatswera Ĩsraelĩ emyaka munani.

¹⁵ Neryo Abũdonĩ mugala wa Hĩlelĩ Omũpĩratonĩ mwahola, mwatabwa ePĩratonĩ omo kihugo kya Efũraĩmũ, omo kihugo kyʼebitwa kyʼAbaamalekĩ.