Abatswerĩ 11 - AMASAKO ABOYTRTRE WA NYAMUHANGA AWAKAHULAWA MO BIBLIA

Yefũta akabya mũtswerĩ

¹ Neryo Yefũta Omũgĩleadĩ abya mundu wʼamaka abya mbangĩ, naye abya mugala wʼomũmalaya. Na Gĩleadĩ mwabuta Yefũta.

² Na muka Gĩleadĩ mwamubutira abagala; kandi abagala bʼomũkalĩ wuwe babere babikula, mobahiga Yefũta, mobamubwira bati, Siwendisyalya omwandu omo nyũmba ya tata wetu; kusangwa uli mugala wʼogundi mũkalĩ.

³ Neryo Yefũta mwasaga bagala babo, mwĩkala omo kihugo kyʼeTobũ; nʼabandu batya-batya mobayitomeka uku Yefũta, mobatamba haguma naye.

⁴ Neryo enyũma wʼaho, abana ba Amonĩ mobalwa nʼAbaĩsraelĩ.

⁵ Neryo omugulu abana ba Amonĩ balwa nʼAbaĩsraelĩ, abakulu bʼeGĩleadĩ mobayenda Yefũta omo kihugo kyʼeTobũ;

⁶ mobabwira Yefũta bati, wase ubye mukulu wetu tutoke erilwa nʼabana ba Amonĩ.

⁷ Na Yefũta mwabwira abakulu bʼeGĩleadĩ ati, Momũtanyĩkwa obusu nʼerimbiga omo nyũmba ya tata wage kwehĩ? Na busana nakĩ lino mũkanyĩhĩkako omugulu muli omo buligo kwehĩ?

⁸ Nʼabakulu bʼeGĩleadĩ mobabwira Yefũta bati, Kikaleka itwakusubako kandi rino, tuti, iwatoka erigenda netu nʼerilwa nʼabana ba Amonĩ kandĩ Wasyabya mukulu wʼesyondũlanĩ syosĩ syʼeGĩleadĩ.

⁹ Neryo Yefũta mwabwira abakulu bʼeGĩleadĩ ati, Mwamanyĩsũbya ewetu erilwa nʼabana ba Amonĩ, nʼOmwami Mukulu amanyihabo, nasyabya mukulu wenyũ kwehĩ?

¹⁰ Nʼabakulu bʼeGĩleadĩ mobabwira Yefũta bati, Omwami Mukulu asyabya mũlangĩrĩ omo katĩkatĩ ketu; kwenene twasyakola ngʼekĩnywa kyawe.

¹¹ Neryo Yefũta mwagenda haguma nʼabakulu bʼeGĩleadĩ, nʼabandu mobamuyira mo mukulu nʼomukama wabo. Na Yefũta mwabũga ebĩnywa biwe byosĩ embere syʼOmwami Mukulu eMĩsĩpa.

Abakwenda ba Yefũta bakahĩka uku Amonĩ

¹² Neryo Yefũta mwatuma abakwenda oko mwami wʼabana ba Amonĩ, ati, Uwe uli nʼomwatsi wahi nage, uti ũkahĩka kwĩngye nʼerilwa nʼekihugo kyage kwehĩ?

¹³ Nʼomwami wʼabana ba Amonĩ mwasũbĩrya abakwenda ba Yefũta, ati, Kusangwa Ĩsraelĩ anzagula ekihugo kyage, omugulu alũa eMĩsĩrĩ, erĩtsũka eArnonĩ erĩhĩka eYabokĩ nʼeYorodanĩ; neryo lino ũsũbaye ebihugo ebyo omo buholo.

¹⁴ Na Yefũta mwatuma abakwenda kandi oko mwami wʼabana ba Amonĩ;

¹⁵ mwamubwira ati, Yefũta amabũga ati, Ĩsraelĩ mwatĩmya ekihugo kya Moabũ kutse ekihugo kyʼabana ba Amonĩ.

¹⁶ Kusangwa omugulu balũa eMĩsĩrĩ, Ĩsraelĩ mwalaba omo mbwarara erĩhĩka oko Ngetsi yʼEngula, nʼerĩhĩka eKadesĩ,

¹⁷ neryo Ĩsraelĩ mwatuma abakwenda oko mwami wʼeEdomũ, ati, Ngakusaba Uleke nyilabe omo kihugo kyawe; nĩkwa omwami wʼeEdomũ mwatahulikirira. Kandi mobatumira oko mwami wʼeMoabũ nĩkwa mwatalĩga. Na Ĩsraelĩ mwĩkala eKadesĩ.

¹⁸ Neryo mobalaba omo mbwarara, mobatĩmba oko kihugo kyʼeEdomũ, nʼekihugo kyʼeMoabũ, kandi mobasira endata oko mũsĩke wʼekihugo kyʼeMoabũ, kandi mobalalirira oko mwisirya wʼeArnonĩ; nĩkwa mobatingira omo mutano wʼeMoabũ, kusangwa Amonĩ yabya mutano wʼeMoabũ.

¹⁹ Kandi Abaĩsraelĩ mobatuma abakwenda uku Sĩhonĩ omwami wʼAbaamorĩ, omwami wʼeHesbonĩ; nʼAbaĩsraelĩ mobabũga naye bati, Tukakusaba, Uleke tulabe omo kihugo kyawe eriya ewetu.

²⁰ Nĩkwa Sĩhonĩ mwatĩkĩrĩrya Abaĩsraelĩ erilaba omo mutano wuwe; nĩkwa Sĩhonĩ mwahĩndanĩa abandu buwe bosĩ mwahanda endwiro eYahazĩ, mwalwa na Ĩsraelĩ.

²¹ NʼOmwami Mukulu, Nyamuhanga wa Ĩsraelĩ, mwahĩra Sĩhonĩ nʼabandu buwe bosĩ omo byala bya Ĩsraelĩ, kandi mwĩtabo. Litya Abaĩsraelĩ mobasĩgalya ekihugo kyosĩ kyʼAbaamorĩ, esyo syo ndũlanĩ syʼekihugo ekyo.

²² Kandi mobasĩgalya emitano yosĩ yʼAbaamorĩ erĩtsũka eArnonĩ erĩhĩka eYaboko, nʼerĩtsũka oko mbwarara erĩhĩka eYorodanĩ.

²³ Neryo lino, Omwami Mukulu, Nyamuhanga wa Ĩsraelĩ, abirisingula Abaamorĩ erĩlũa embere syʼabandu buwe Abaĩsraelĩ, neryo nawe wasyasĩgalyakyo kwehĩ?

²⁴ Sũlĩsĩgalaya ekyo Kamosĩ nyamuhanga wawe akakuha erĩsĩgalya kwehĩ? Litya ekyo Mwami Mukulu Nyamuhanga wetu asyasingula embere syetu ba nʼabo twasyasĩgalya.

²⁵ Na lino uli mubuya kwilaba Balaka mugala wa Sĩporĩ omwami wʼeMoabũ kwehĩ? Iye mwanegena nʼAbaĩsraelĩ kutse mwalwa nabo kwehĩ?

²⁶ Omugulu Ĩsraelĩ ĩkala eHesbonĩ nʼemĩyĩ yayo, nʼeAroerĩ nʼemĩyĩ yayo, nʼomo mĩyĩ yosĩ yabya oko mũsĩke wʼeArnonĩ, emyaka magana asatu; busana nakĩ momũtĩmyayo omo migulu eyo kwehĩ?

²⁷ Ĩngye sinditakukola nabi, nĩkwa uwe ukanyikola nabi erilwa nage. Omwami Mukulu, Omũtswerĩ, abye mũtswerĩ mũnabwĩre omo katĩkatĩ kʼabana ba Ĩsraelĩ nʼabana ba Amonĩ.

²⁸ Nĩkwa omwami wʼabana ba Amonĩ mwatahulikirira ebĩnywa bya Yefũta ebyo amulayirako.

Yefũta akakĩnda abana ba Amonĩ

²⁹ Neryo Omũlĩmũ wʼOmwami Mukulu mwahĩka uku Yefũta, naye mwalaba endata uku Gĩleadĩ na Manase, kandi mwalaba endata oko Mĩsĩpa yʼeGĩleadĩ, nʼerĩlũa eMĩsĩpa yʼeGĩleadĩ mwalaba endata oko bana ba Amonĩ.

³⁰ Na Yefũta mwayisema erĩlahĩrya oko Mwami Mukulu, ati, Wamahĩra kwenene abana ba Amonĩ omo byala byage,

³¹ neryo kyasyabya, ekyasyahulukira omo ngyo syʼenyũmba yage erĩnyĩkokya, omugulu nasyasubula nʼobuholo oko bana ba Amonĩ, kyasyabya kyʼOmwami Mukulu, nage nasyaherakyo eribya buhere bwʼerĩokererya.

³² Neryo Yefũta mwasokera oko bana ba Amonĩ erilwa nabo; nʼOmwami Mukulu mwahĩrabo omo byala biwe.

³³ Neryo mwĩtabo erĩtsũka eAroerĩ erĩhĩka aho gukasira eMĩnĩtĩ, emĩyĩ makũmĩ abiri, nʼerĩhĩka eAbelĩ-keramĩmĩ, nʼerĩĩta lĩnene kutsibu. Neryo abana ba Amonĩ mobakĩndwa batya embere syʼabana ba Ĩsraelĩ.

Obũlĩge bwa mwali wa Yefũta

³⁴ Neryo omugulu Yefũta ahĩka eMĩsĩpa omo nyũmba yiwe; neryo, lebaya, mwali wuwe mwahuluka erĩmũkokya nʼebiyamba nʼamasata; abya mwana wuwe muguma musa; isiawite mugala kutse ogundi mwali.

³⁵ Neryo omugulu amulolako, mwatulanga esyongimba siwe, ati, Ĩlolo, mwali wage! Wabĩrĩnyĩkehya kutsibu, nawe uli muguma wʼoko bakanyĩta obũlĩge; kusangwa nabiritanda obuno bwage oko Mwami Mukulu, isinditoka erisuba enyũma.

³⁶ Naye mwabũga naye ati, Tata wage, wabĩrĩkũmbũlĩra obuno bwawe oko Mwami Mukulu; ungolere ngʼebyalũa omo buno bwawe, kusangwa Omwami Mukulu abĩrĩkũkĩsĩrya esyonzĩgũ syawe, oko bana ba Amonĩ.

³⁷ Neryo mwabwira tata wuwe ati, Uleke omwatsi oyo akolawe busana nage; unyireke emikera ĩbĩrĩ, inalendera oko bitwa, nʼeriririra obumbesa bwage, ingye nʼabalĩkyetu.

³⁸ Naye mwabũga ati, Genda. Kandi mwamuhamula erigenda emikera ĩbĩrĩ; neryo mwagenda, iye nʼabalĩkyabo, mwalirira obumbesa buwe oko bitwa.

³⁹ Neryo enyũma wʼemikera ĩbĩrĩ, mwasuba ahali tata wuwe, naye mwamukolera ngʼeriyisema liwe eryo alahĩraya; kandi mwataminya mulume. Neryo mwabya mutsye omo Ĩsraelĩ,

⁴⁰ abali ba Ĩsraelĩ mobaya obuli mwaka eriririra mwali wa Yefũta Mũgĩleadĩ ebiro bini oko mwaka.