Abatswerĩ 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Abatswerĩ Tola na Yaĩrĩ

¹ Nʼenyũma wa Abĩmelekĩ Tola mugala wa Pũa, mugala wa Dodo, omundu wa Ĩsakarĩ, mwahangana erĩlamya Ĩsraelĩ; nĩkwa Tola abya ĩkere eSamĩrĩ omo kihugo kyʼebitwa kya Efũraĩmũ.

² Neryo mwatswera Ĩsraelĩ emyaka makũmĩ abiri nʼeyĩsatu, neryo mwahola, neryo mwatabwa eSamĩrĩ.

³ Nʼenyũma wuwe Yaĩrĩ mwahangana, Omũgĩleadĩ; naye mwatswera Ĩsraelĩ emyaka makũmĩ abiri nʼeyĩbĩrĩ.

⁴ Naye abya awite abagala makũmĩ asatu abakagenda oko byana byʼepunda makũmĩ asatu, kandi babya bawite emĩyĩ makũmĩ asatu, eyahulawa mo mĩyĩ ya Yaĩrĩ erĩhĩka mũnabwĩre, eyiri omo kihugo kyʼeGĩleadĩ.

⁵ Neryo Yaĩrĩ mwahola, mwatabwa eKamonĩ.

Ĩsraelĩ bakaswakola ebibi, nʼAbaamonĩ bakanũbayabo

⁶ Kandi abana ba Ĩsraelĩ mobaswakola ebibi omo meso wʼOmwami Mukulu, mobakolera esyo Balĩ na Astarotĩ, nʼesyonyamuhanga syʼeSĩrĩa nʼesyonyamuhanga syʼeSĩdona, nʼesyonyamuhanga syʼeMoabũ; nʼesyonyamuhanga syʼabana ba Amonĩ, nʼesyonyamuhanga syʼAbafĩlĩstĩnĩ mobasĩganĩa Omwami Mukulu, mobatamukolera.

⁷ Nʼerihitana lyʼOmwami Mukulu molyagulumira oko Baĩsraelĩ, neryo mwagũlyabo omo byala byʼAbafĩlĩstĩnĩ, nʼomo byala byʼabana ba Amonĩ.

⁸ Nabo mobagalya nʼerĩnũbya abana ba Ĩsraelĩ oko mwaka oyo; mobanũbya abana bosĩ ba Ĩsraelĩ ababya eyisirya wʼeYorodanĩ omo kihugo kyʼAbaamorĩ, ekiri eGĩleadĩ oko myaka ĩkũmĩ nʼomunani.

⁹ Nʼabana ba Amonĩ mobasoka eYorodanĩ erilwa na Yũda na Benyamĩna, nʼekĩtũnga kya Efũraĩmũ; neryo Abaĩsraelĩ mobabya batya nʼobuligo kutsibu.

Abaĩsraelĩ bakalakira Omwami Mukulu

¹⁰ Neryo abana ba Ĩsraelĩ mobalakira Omwami Mukulu, bati, Twamakũhalyako kusangwa twabĩrĩsĩganĩa Nyamuhanga wetu, kandi twabirikolera esyo Balĩ.

¹¹ Neryo Omwami Mukulu mwabwira abana ba Ĩsraelĩ ati, Mondabalamya oko bʼeMĩsĩrĩ nʼAbaamorĩ, nʼoko bana ba Amonĩ, nʼoko Bafĩlĩstĩnĩ kwehĩ?

¹² Abasĩdonĩ nibya, nʼAbamalekĩ, nʼAbamaonĩ, mobabagalya; nenyũ momwanyilakira, nage monabalamya omo byala byabo.

¹³ Nĩkwa mwabĩrĩnyĩsĩganĩa nʼerikolera esindi nyamuhanga; neryo sindiendiswabalamya kandi.

¹⁴ Mugende muyalakire esyonyamuhanga esyo mwayisoga; sĩbalamaye oko mugulu wʼobuligo bwenyũ.

¹⁵ Nʼabana ba Ĩsraelĩ mobabwira Omwami Mukulu bati, Twabĩrĩhalya; utukolere ekyo Wamalangira mo kibuya; ekiguma kisa tukakusaba ũtũlamaye mũnabwĩre.

¹⁶ Kandi mobalũsya esyonyamuhanga syʼehali omo katĩkatĩ kabo, mobakolera Omwami Mukulu; nʼekĩrĩmũ kiwe mokyabya nʼobũlĩge busana nʼobuligo bwa Ĩsraelĩ.

¹⁷ Neryo abana ba Amonĩ mobayĩhĩndanĩa haguma, mobahanda endwiro eGĩleadĩ. Nʼabana ba Ĩsraelĩ ndanĩa haguma, mobahanda endwiro eMĩsĩpa.

¹⁸ Nʼabandu, abasondolĩ bʼeGĩleadĩ, mobakanĩranĩa bati, Ni mundundi wasyatsũka erilwa nʼabana ba Amonĩ kwehĩ? Iye asyabya mukulu wʼesyondũlanĩ syosĩ syʼeGĩleadĩ.