AbanyaRoma 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekĩmĩnyĩsyo kyʼerĩherũkya

¹ Sĩmwasĩ, balĩkyetu, ngabũga oko basĩ Emigambo, ngoko Emigambo iwite ehamũlĩ oko mundu omugulu gosĩ akineho kwehĩ?

² Kusangwa omũkalĩ oyũhĩkĩbwe abohĩre ũkwʼĩba wuwe omugulu gosĩ akineho; nĩkwa ĩba wuwe amahola, iniamaboholwa oko mugambo owamuboha ũkwʼĩba wuwe.

³ Neryo ĩba wuwe amabya akineho, omũkalĩ oyo amĩkala nʼogundi mulume, asyahulwa mo mũsĩngĩrĩ; nĩkwa ĩba wuwe amahola, nĩ mwĩranda omo migambo. Sĩ mũsĩngĩrĩ amahĩkĩbwa nʼogundi mulume.

⁴ Ko liri ritya busana nenyũ, balĩkyetu, mwabirihola oko Migambo busana nʼomubiri wa Kristo owahola, imwatoka eriherukira oko gundi, oyo walũbũkĩbawa oko baholĩ, imwatoka erireta endũndĩ busana na Nyamuhanga.

⁵ Kusangwa omugulu twabya nʼamalengekanĩa wʼomubiri, esyongumbu nyibi syʼomubiri esyahuluka busana nʼEmigambo, mosyakola omo bĩtsũko byetu erituletera oluholo.

⁶ Nĩkwa lino twabiriboholwa oko Migambo, kusangwa twabirihola oko myatsi eyabya ikatuboha. Neryo tukakola omo nzira nyihya-nyihya yʼOmũlĩmũ, butsira eya kera yʼAmasako.

Emigambo ni bibi kwehĩ?

⁷ Neryo tũbũge tũtĩkĩ kwehĩ? Tuti Emigambo ni bibi kwehĩ? Iyihi nʼahake! Emigambo yo yaleka inaminya ebibi ngoko biri. Kusangwa sinaminya erirumwa nga nĩkĩ, kumbe Migambo ĩtabũga iti, Subye ukarumawa.

⁸ Nĩkwa ebibi mobyabana omwanya omo bihano, mobyakola-kola omo mutima wage emĩsĩndo yosĩ yʼerirumwa; kusangwa ahate Migambo, ebibi biri ngʼekindu kĩholĩre.

⁹ Nage nabyaho nyite oko Migambo; nĩkwa omugulu ekihano kyahĩka ebibi mobyasuba, nage monahola.

¹⁰ Nʼekihano ekyahĩrawa busana nʼerireta engebe, mokyanyiretera oluholo.

¹¹ Kusangwa ebibi mobyabana omwanya busana nʼebihano, mobyandeba, kandi mobyanyĩta busana nʼebihano.

¹² Neryo Emigambo ĩbũyĩrĩre, kandi ekihano kĩbũyĩrĩre, kitunganene, kandi ni kibuya.

¹³ Neryo ekindu kibuya mokyanyiretera oluholo kwehĩ? Iyihi nʼahake. Nĩkwa ni bibi ebyaletalo, ibikakola omo nzira yʼekindu kibuya erĩnyĩta, ibyatoka eriminyikala kwenene ngʼebibi. Neryo busana nʼebihano, ebibi bikabanika mo nabi kutsibu.

¹⁴ Kusangwa tũnasĩ ngoko Emigambo nĩ yʼekĩrĩmũ; nĩkwa ĩngye indi wʼomubiri, nabĩrĩgũlĩbwa ngʼomukobe wʼebibi.

¹⁵ Ĩngye sindiminya ebyo ngakola; kandi sindikola ebyo nyanzĩre erikola, nĩkwa ngakola ebyo ngakwa obusu.

¹⁶ Neryo namabya ngakola ebyo ndanzĩre erikola, ngalĩga Emigambo kwʼiri mibuya.

¹⁷ Neryo kandi oyukakola omwatsi oyũ sĩ ĩngye, nĩkwa ni bibi ebĩkere omwisi wage.

¹⁸ Kusangwa nyĩnasĩ ngoko hate kibuya ekĩkere omwisi wage, omwisi wʼomubiri wage; kusangwa nyĩnanzĩre omo mutima wage erikola ekibuya, nĩkwa sinditoka erikolakyo.

¹⁹ Sindikola ekibuya ekyo nyanzĩre erikola, nĩkwa ekibi ekyo ndanzĩre kyo ngakola.

²⁰ Nĩkwa namakola ekyo ndanzĩre, oyukakola sĩ ĩngye, nĩkwa ni bibi ebĩkere omwisi wage.

²¹ Neryo ngabana omugambo oyũ omwisi wage. Omugulu nganza erikola ekibuya, ekibi ekiri omwisi wʼomutima wage kikagana.

²² Ngalĩga nʼobutseme, omugambo wa Nyamuhanga omwisi wʼomutima wage.

²³ Nĩkwa ngabana ogundi mugambo owakakola omo mubiri wage owakalwa nʼomugambo wʼobũlengekanĩa bwage, kandi ngayirawa mo mundu wʼomũlĩkĩ wʼomugambo wʼebibi ebĩkere omo bĩtsũko byage.

²⁴ Ĩngye indi mundu wʼobũlĩge! Nindi wasyanyibohola oko mubiri oyũ wʼoluholo kwehĩ?

²⁵ Wasĩngya uku Nyamuhanga busana nʼomukama wetu Yesu Kristo. Neryo ĩngye omo bũlengekanĩa ngakola emigambo ya Nyamuhanga, nĩkwa omo mubiri ngakolera emigambo yʼebibi.