AbanyaRoma 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩkĩrĩrya lya Abrahamũ

¹ Neryo tũbũgekĩ busana na Abrahamũ, so-kulu wʼekihanda kyetu kwehĩ? Mwabanakĩ kwehĩ?

² Kusangwa kumbe Abrahamũ alĩtũngananĩbawa busana nʼemĩbĩrĩ, kumbe awite omwatsi wʼeriyihalambira; nĩkwa siawitego embere sya Nyamuhanga.

³ Kusangwa Amasako atĩkĩ kwehĩ? Ati, Abrahamũ mwĩkĩrĩrya Nyamuhanga, neryo Nyamuhanga mwamuganziralyo mo litunganene.

⁴ Oyukakola omũbĩrĩ akalihawa; nĩkwa oluhembo luwe siluliganzawa ngʼolũsũnzo, nĩkwa ngʼobũhĩngĩ.

⁵ Nĩkwa oyutakola omũbĩrĩ, nĩkwa akĩkĩrĩraya oyũkatũngananaya abandu babi, erĩkĩrĩrya liwe likaleka iniaganzwa mo mutunganene.

⁶ Ngoko Dawĩdĩ akahula obutseme bwʼomundu oyo Nyamuhanga abiriganza mo mutunganene butsira busana nʼemĩbĩrĩ yiwe. Dawĩdĩ ati,

⁷ Obutseme buli oko babiribuyirwa kwʼamalolo wabo, Kandi obutseme buli ukwʼabo ebibi byabo byabĩrĩkũnĩngĩrwa na Nyamuhanga.

⁸ Obutseme buli oko mundu oyo Omukama siendisyamuganzira kwʼebibi biwe.

⁹ Obutseme obũ ni bwʼabandu babwene basa, kutse busana nʼabatabwene nibya kwehĩ? Kusangwa tuti, ngoko kĩsakĩre kiti, Abrahamũ mwaganzwa mo mutunganene busana nʼerĩkĩrĩrya liwe.

¹⁰ Abrahamũ aganzawa mo mutunganene omugulu abya abwene kutse omugulu abya atabwene kwehĩ? Aganzawa atya omugulu abya atabwene, neryo mwabanĩbwa enyũma.

¹¹ Nʼeribambwa liwe lyabya ekiminyikalo, erĩmĩnyĩsya ngoko Nyamuhanga mwamuganza mo mutunganene busana nʼerĩkĩrĩrya, isiabwene. Abrahamũ atoke eribya tata wʼabosĩ abakĩkĩrĩraya Nyamuhanga isibabwene, baganzawe mo batunganene.

¹² Kandi atoke eribya tata wʼababwene, nĩkwa si busana nʼerĩbambwa lyabo, nĩkwa kusangwa bakakwama emikolere yʼerĩkĩrĩrya lya tata wetu ye Abrahamũ, oyo wĩkĩrĩraya isiabwene.

Erisunga Erilaga lya Nyamuhanga busana nʼerĩkĩrĩrya

¹³ Kusangwa Nyamuhanga mwalaga Abrahamũ nʼolubuto luwe ati, Ekihugo kyasyabya kiwe. Erilaga erĩ siryabya busana nʼerikwama Emigambo, nĩkwa kusangwa mwaganzwa mo mutunganene busana nʼerĩkĩrĩrya liwe.

¹⁴ Kusangwa omwandu amabanika busana nʼerikwama Emigambo, erĩkĩrĩrya ini buyira nʼerilaga lya Nyamuhanga ini buyira.

¹⁵ Kusangwa Emigambo yikaleta erihitana lya Nyamuhanga, nĩkwa ahate Migambo sihali erĩhalya.

¹⁶ Busana nʼomwatsi oyũ, Erĩlaga lyʼomwandu ni busana nʼerĩkĩrĩrya. Kusangwa lĩkahĩka busana nʼolukogo lwa Nyamuhanga, erilaga eryo iryatoka eribya kwenene oko lubuto losĩ lwa Abrahamũ. Kandi si busana nʼabo basa abakakwama Emigambo, nĩkwa nibya busana nʼabakakwama erĩkĩrĩrya nga Abrahamũ, oyuli tata wetu ĩtwe bosĩ.

¹⁷ Ngoko kĩsakĩre kiti, Nabirikuyira mo tata wʼebihanda bingi. Neryo erilaga likabya kwenene uku Nyamuhanga, oyo Abrahamũ ĩkĩrĩraya. Nyamuhanga akaha engebe oko baholĩ, kandi akabũga nʼemyatsi eyiteho iyabyaho.

¹⁸ Abrahamũ mwĩkĩrĩrya nʼeribya nʼamaha omugulu hate omwatsi wʼeriha amaha. Busana nʼekĩ mwabya tata wʼebihanda bingi, ngoko kyabũgawa kiti, Olubuto lwawe lwasyabya lutya.

¹⁹ Kandi erĩkĩrĩrya liwe molitoloba omugulu aganĩraya omwatsi wʼomubiri wuwe ĩnĩakĩsĩya iniahola, kusangwa abya wʼemyaka hakũhĩ nʼerĩgana liguma. Kandi kusangwa Sara abya mugumba.

²⁰ Abrahamũ mwatatika-tika erĩkĩrĩrya erilaga lya Nyamuhanga, nĩkwa mwayitsinga omwʼĩkĩrĩrya, mwapipa Nyamuhanga.

²¹ Kusangwa abya ĩnĩabĩrĩrĩga omo mutima wuwe ati, Nyamuhanga angatoka erĩberererya erilaga liwe.

²² Neryo ngoko kĩsakĩre, Nyamuhanga mwamuganza mo mutunganene.

²³ Ebĩnywa ebĩ bĩkabũga biti, Mwaganzwa mo mutunganene, mobitasakwa busana naye musa.

²⁴ Nĩkwa mobyasakwa busana netu nibya. Ĩtwe twasyaganzwa mo batunganene ĩtũkĩkĩrĩraya ukwʼoyo walũbũkaya Omukama wetu Yesu oko baholĩ.

²⁵ Yesu mwatwalwa oko luholo busana nʼamalolo wetu, neryo mwalũbũkĩbwa erituyira mo batunganene.