AbanyaRoma 3 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Neryo nĩ ndũndĩ eribya Mũyũda kwehĩ? Kutse eribana likakuba lwahi kwehĩ?

² Linawite endũndĩ omo myatsi yosĩ. Erĩtsũka Nyamuhanga mwahĩra erĩkangĩrĩrya liwe omo byala byʼAbayũda.

³ Neryo abandu bamabya bakalegula, eriregula lyabo lyasyalũsya eritendiregula lya Nyamuhanga kwehĩ?

⁴ Iyihi nʼahake. Nĩkwa Nyamuhanga aminyikale mo wʼekwenene, nʼobuli mundu abye mũbehĩ. Ngoko kĩsakĩre kiti, Omo bĩnywa byawe ubanike nʼeritunganene, Kandi ĩwasĩngana omo lubanza.

⁵ Nĩkwa eritenditunganana lyetu lyamakangya eritunganene lya Nyamuhanga, tũbũgekĩ kwehĩ? Nyamuhanga siatunganene omugulu akatuhitanako kwehĩ? (ngabũga ngʼabandu).

⁶ Iyihi, nʼahake. Nyamuhanga amabya isiatunganene, asyatswera ekihugo kyʼati kwehĩ?

⁷ Nĩkwa eribiha lyage lyamakangya ndeke ekwenene ya Nyamuhanga, nʼerimuha olukengerwa, busana nakĩ nyikinatswerawa ngʼomukola-nabi kwehĩ?

⁸ Tũbũge tuti, Tukole nabi busana nʼerireta ebibuya kwehĩ? Abandi bakatulega bati, tũkabũga tutya. Basyasĩngwa ngoko litolere.

Sihali mundu oyutunganene

⁹ Neryo ĩtwe Abayũda tũlabĩre abandi bosĩ kwehĩ? Iyihi, kusangwa twabĩrĩhandĩkĩrĩrya Abayũda nʼabʼebindi Bihanda, abosĩ tuti bali kwʼebibi.

¹⁰ Ngoko kĩsakĩre kiti, Sihali mundu nʼomuguma oyutunganene;

¹¹ Sihali oyukaminya, Sihali oyukasonda-sonda Nyamuhanga;

¹² Abosĩ babirikitira emũsĩke, babiribya buyira, Sihali oyukakola ebibuya, sihali nʼomuguma;

¹³ Obuno bwabo buli ngʼeyisinda eyĩtalĩbĩre; Bakateba omo syondimi syabo. Obuti bwʼesyonzoka bũkalũa omwisi wʼemĩnywa yabo.

¹⁴ Erĩbũga lyabo Ĩyoswĩre nʼeritakira nʼerikaliha.

¹⁵ Ebisando byabo bikanguha erĩũta omusasi.

¹⁶ Erĩherya nʼobũlĩge biri ehosĩ bakaya.

¹⁷ Sĩbasĩ enzira yʼobuholo.

¹⁸ Kandi sibetaminya eriubaha Nyamuhanga.

¹⁹ Neryo tũnasĩ ebyosĩ Emigambo yĩkabũga, ĩkabũga busana nʼabandu abakakwama Emigambo, abandu bosĩ basĩngawe, nʼekihugo kyosĩ kibye kʼolubanza lwa Nyamuhanga.

²⁰ Kusangwa sihali mundu oyo wasyatũngananĩbwa embere sya Nyamuhanga busana nʼerikola Emigambo. Kusangwa Emigambo ĩkamĩnyĩsaya abandu ko bakakola nabi.

Nyamuhanga akatũngananaya abandu omwʼĩkĩrĩrya

²¹ Nĩkwa lino kyabĩrĩmĩnyĩsĩbwa ko Nyamuhanga akatũngananaya abandu butsira busana nʼEmigambo. Kandi Emigambo nʼabamĩnyererĩ bĩkatũla omwatsi wʼeritunganene erĩ.

²² Nĩkwa Nyamuhanga akatũngananaya abandu busana nʼerĩkĩrĩrya Yesu Kristo. Eritunganene erĩ ni ryʼabandu bosĩ abakĩkĩrĩraya Kristo, kusangwa sialisombola mundu.

²³ Nĩkwa abandu bosĩ babirikola ebibi, kandi sĩbehĩka oko lukengerwa lwa Nyamuhanga.

²⁴ Nyamuhanga akatũngananaya abandu omo lũsũnzo lwʼolukogo luwe busana nʼerĩtongolĩbwa, erikabanika busana na Kristo Yesu.

²⁵ Kusangwa Nyamuhanga mwatuma Yesu Kristo erĩũta omusasi wuwe eribya mbanulo busana nʼabandu abakĩkĩrĩraya. Nyamuhanga mwamutuma busana nʼerĩkangya ngoko akatũngananaya abandu. Kusangwa Nyamuhanga mwalindirira, mwakĩrũkya ameso oko bibi ebyakolawa kera;

²⁶ iniatoka erĩkangya eritunganene riwe oko mugulu ono. Atya, Nyamuhanga akakangaya kwʼatunganene, kandi kwʼakatũngananaya omundu Oyũkĩkĩrĩraya Yesu.

²⁷ Neryo ekyʼeriyipipira kiri hahi kwehĩ? Sikiri. Busana nakĩ sikiri kwehĩ? Ni busana nʼerikola Emigambo kwehĩ? Iyihi, nĩkwa ni busana nʼerĩkĩrĩrya.

²⁸ Kusangwa ĩtwe tuti, omundu akatũngananĩbawa busana nʼerĩkĩrĩrya, butsira erikola Emigambo.

²⁹ Ko Nyamuhanga ni wʼAbayũda basa kwehĩ? Si Nyamuhanga wʼEbihanda nibya kwehĩ? Ega, ni wʼEbihanda nibya.

³⁰ Nyamuhanga ni muguma, naye asyatũngananĩa Abayũda omwʼĩkĩrĩrya lyabo, kandi asyatũngananĩa Ebihanda busana nʼerĩkĩrĩrya lyabo.

³¹ Neryo tũkaganaya Emigambo busana nʼerĩkĩrĩrya kwehĩ? Iyihi, nʼahake. Nĩkwa tũkahanganaya Emigambo.