AbanyaRoma 16 - AMASAKO ABOYTRTRE WA NYAMUHANGA AWAKAHULAWA MO BIBLIA

Emyatsi yʼerĩkerya lya Paũlo

¹ Ngasĩma eribatumira Foĩbe, Omũlĩkyetu wʼobũkalĩ, oyukakolera ekanĩsa yʼeKenkũrea.

² Mũmũkokaye omo lĩna lyʼomukama ngoko litolere busana nʼabandu ba Nyamuhanga, Kandi mũmũwatĩkaye omo buli mwatsi ali nago bwaga bwʼerĩwatĩkĩbwa nenyũ. Kusangwa abĩrĩwatĩkya abandu bangi, nage nibya.

³ Mũkeraye Pĩrĩsĩla na Akwĩla abakakola nage omo mũbĩrĩ wa Kristo Yesu,

⁴ kandi mobatalanda oko ngebe yabo busana nʼerĩnyĩlamya. Ngahabo ewasĩngya nʼesyokanĩsa syosĩ syʼEbihanda nasyo sikahabo ewasĩngya.

⁵ Kandi mũkeraye ekanĩsa eyiri omo nyũmba yabo. Mũkeraye omwanze wage ye Epenetũ, oyo watsũka erĩkĩrĩrya Kristo eAsĩa.

⁶ Mũkeraye Marĩa oyo wakola kutsibu busana nenyũ.

⁷ Mũkeraye Andronĩka na Yũnĩa abʼekihanda kyetu, ababya omo mũlĩkĩ haguma nage. Kandi ni bakulu omo katĩkatĩ kʼabakwenda, kandi mobĩkĩrĩrya Kristo embere kwĩngye.

⁸ Mũkeraye Ampũlĩato omwanzewage omwisi wʼOmukama.

⁹ Mũkeraye Ũrbano, oyukakola haguma netu omo mũbĩrĩ wa Kristo. Kandi mũkeraye omwanze wage ye Stakĩ.

¹⁰ Mũkeraye Apele Oyũkasĩmawa omo mũbĩrĩ wa Kristo. Mũkeraye abʼomwa Arĩstabũlo.

¹¹ Mũkeraye Herodĩo wʼekĩtũnga kyetu. Mũkeraye abʼomwa Narkĩso, abamatikene na Kristo.

¹² Mũkeraye Tĩrĩfena na Tĩrĩfosa, abakakola omũbĩrĩ wʼOmukama. Mũkeraye omwanze wetu ye Persĩ, oyo wabirikola kutsibu omo mũbĩrĩ wʼOmukama.

¹³ Mũkeraye Rũfo, Omukristo mukulu omo mũbĩrĩ wʼOmukama. Mũkeraye nyĩnya wuwe, ni koyo wage nibya.

¹⁴ Mũkeraye Asĩnkrĩto na Fũlego, na Herme, na Patroba, na Herma, nʼabalĩkyetu abali haguma nabo.

¹⁵ Mũkeraye Fĩiologo, na Yũlĩa, na Nereo, na mwali wabo na Olĩmpa, nʼabandu bosĩ ba Nyamuhanga abali haguma nabo.

¹⁶ Mũkeranaye omwʼiwanako erĩbũyĩrĩre. Esyokanĩsa syosĩ sya Kristo sĩkabakeraya.

Ebihano byʼeribugirira ebarua

¹⁷ Balĩkyetu, ngabalemba-lemba, mũ­tegaye busana nʼabo bakaleta erigabana, nʼemyatsi yʼerĩtwĩkalya, abatekwama erĩkangĩrĩrya eryo mwakangĩrĩrĩbawa. Musagebo.

¹⁸ Kusangwa abandu ngʼabo sibekolera Omukama wetu Kristo, nĩkwa bakakolera esyonda syabo. Kusangwa bakateba emitima yʼabandu bate nʼamenge, omo bĩnywa bitendere nʼebyʼekĩsehya.

¹⁹ Kusangwa engulu yenyũ ambu mũkowa Kristo, yabĩrĩhĩka oko bandu bosĩ; neryo ngatsema kutsibu busana nenyũ. Nĩkwa nyanzĩre mubye bʼamenge omo bibuya, kandi mubye ngʼabalere omo myatsi yʼebibi.

²⁰ Kandi Nyamuhanga oyukatuha Obuholo, asyahĩnolera Satanĩ yo lũba omwisi wʼebisando byenyũ. Olukogo lwʼOmukama wetu Yesu lubye nenyũ.

²¹ Tĩmoteo oyukakola haguma nage akabakeraya; kandi Lũkĩo na Yasona, na Sosĩpatere abʼekihanda kyetu, bakabakeraya.

²² Ĩngye Teretĩo, oyukasaka ebarua eno, ngabakeraya omwisi wʼOmukama.

²³ Gayo akabakeraya. Ĩngye indi mũgenĩ wuwe, kandi ekanĩsa ĩkahĩndana omo nyũmba yiwe. Erasto omũbĩkĩ wʼesyofranka (esyoshĩllĩng) syʼomũyĩ akabakeraya. Kandi mũlĩkyetu Kwarto akabakeraya. [

²⁴ Olukogo lwʼOmukama wetu Yesu Kristo lubye nenyũ ĩnywe bosĩ. Amina.]

Tupipe Nyamuhanga

²⁵ Tupipe Nyamuhanga! Iye akatoka erĩbahanganĩa ndeke omo Ngulu Yowene eyo ngatũla, omwatsi wa Yesu Kristo, erĩkũmbo eryabĩsawa omo syondengo sya kera. Nĩkwa lino lyabĩrĩbĩsũlwa,

²⁶ kandi lyabĩrĩmĩnyĩkalĩbwa omo Masako wʼabamĩnyererĩ. Neryo busana nʼekihano kya Nyamuhanga Wʼerikota, omwatsi oyũ abĩrĩmĩnyĩsĩbwa oko bihanda byosĩ, ibatoka erĩkĩrĩrya Kristo nʼerĩmowa.

²⁷ Neryo uku Nyamuhanga oyuwite amenge ĩyowene, ukwʼiye habye olukengerwa busana na Yesu Kristo, kera na kera! Amina.