AbanyaRoma 15 - AMASAKO ABOYTRTRE WA NYAMUHANGA AWAKAHULAWA MO BIBLIA

Ũtsemesaye balĩkyenyũ, sũyĩtsemesaye

¹ Nĩkwa ĩtwe tuli nʼamaka, litolere ĩtwawatĩkya obolo bwʼabandu abate nʼamaka, butsira erĩyĩtsemesya.

² Obuli mundu kwĩtwe atsemesaye mũlĩkyabo, busana nʼerĩmũwatĩkya nʼerĩmũhanganĩa ndeke.

³ Kusangwa Kristo mwatayĩtsemesya; nĩkwa kĩsakĩre kiti, Ebĩtsũmĩ ebyo bakutsuma mobyambĩkako.

⁴ Kusangwa ebyosĩ ebyasakawa erĩmbere omo Masako byasakawa busana nʼerĩtũkangĩrĩrya. Neryo Amasako akatuha eriyitsingirira nʼerihanda omutima, itwatoka eribya nʼamaha.

⁵ Nĩkwa Nyamuhanga oyukaha erĩyĩyĩnĩa nʼerihanda omutima, abahe obũlengekanĩa bwa Kristo Yesu.

⁶ Neryo ĩnywe bosĩ haguma nʼomulenge muguma, imwapipa Nyamuhanga Tata wʼOmukama wetu Yesu Kristo.

Engulu Yowene nĩ yʼAbayũda nʼEbihanda haguma

⁷ Neryo mũkokanaye ngoko Kristo atũkokaya, Nyamuhanga abane olukengerwa.

⁸ Kusangwa ngabũga nyiti, Kristo abiribya omugombe oko Bayũda busana nʼerĩhanganĩa ekwenene ya Nyamuhanga, nʼerĩberererya esyondagane siwe oko boso-kulu.

⁹ Kandi Kristo atokesaye ebihanda ibyapipa Nyamuhanga busana nʼeriganyira liwe. Ngoko kĩsakĩre kiti, Neryo busana nʼekyo, nasyakupipa omo katĩkati kʼebihanda, Nasyimba ebikapipa erĩna lyawe.

¹⁰ Nʼakandi, kiti, Mutseme, ĩnywe Bihanda, haguma nʼabandu ba Nyamuhanga.

¹¹ Nʼakandi, kiti, Mupipe Omwami Mukulu, ĩnywe Bihanda byosĩ, Nʼabandu bʼebihanda byosĩ bamupipe!

¹² Nʼakandi Ĩsaya akabũga ati, Omwana wa Yese asyasa, Iye asyahanganĩbwa eritabala oko Bihanda. Nʼebihanda basyamũhĩra kwʼamaha wabo.

¹³ Nĩkwa Nyamuhanga, oyukaleta maha, abosũlaye nʼobutseme bosĩ nʼobuholo bosĩ busana nʼerĩmwĩkĩrĩrya, amaha wenyũ akanyirire kutsibu omo bũtokĩ bwʼOmũlĩmũ Abũyĩrĩre.

Ekyaleka Paũlo iniasaka ebarua

¹⁴ Balĩkyetu, nyĩnasĩ ndeke ko moswĩre nʼobubuya, mwabiribana eriminya ebyo byo kutsibu, kandi mukatoka erihanana.

¹⁵ Nĩkwa nabiribasakira butsira buba omo myatsi eyo erĩbĩbũkya. Ngabũga butsira buba kusangwa Nyamuhanga mwamba ekibuya omo lukogo luwe,

¹⁶ eribya mugombe wa Yesu Kristo oko Bihanda. Ngakola ngʼomũhererĩ busana nʼerĩtũla Engulu Yowene eyĩkalũa uku Nyamuhanga, Ebihanda bibye buhere obũkasĩmawa na Nyamuhanga, obo Mũlĩmũ Abũyĩrĩre abirihigula.

¹⁷ Neryo busana nʼerimatikana na Kristo Yesu nabiribana ekyangaleka inayihalamba omo mũbĩrĩ wa Nyamuhanga.

¹⁸ Kusangwa sindiendirenga eriahula ogundi mwatsi go nʼogo Kristo abirikola omo byala byage busana nʼerisondola Ebihanda erĩowa Nyamuhanga omo bĩnywa nʼomo mĩbĩrĩ,

¹⁹ busana nʼobũtokĩ bwʼebitiko-tiko nʼebyʼeriswekera, omo bũtokĩ bwʼOmũlĩmũ. Neryo nabĩrĩtũla ndeke-ndeke Engulu Yowene erĩtsũka eYerũsalema nʼomo bihugo hakũhĩ naho, nʼerĩhĩka oko kihugo kyʼeĨlĩrĩko.

²⁰ Litya nyinemusonda erĩtũla Engulu Yowene aho Kristo ate ahulirwa, ĩsĩnangahĩmba oko kibanza kyʼogundi mundu.

²¹ Ngoko kĩsakĩre kiti, Abatetabwirwa engulu yiwe, basyalangira, Nʼabandu abate bowa, basyaminya.

Paũlo akasonda erĩhĩka eRoma

²² Busana nʼomwatsi oyũ, nabĩrĩkakĩrĩbwa esyongendo nyingi erĩbahĩkako.

²³ Nĩkwa lino nabiribuga erikola omo bihugo ebĩ. Kandi kusangwa nabiribya nʼolukando lwʼerĩbahĩkako emyaka mingi,

²⁴ lino indi nʼamaha wʼeribalolako omugulu ngalabira eSpania. Neryo namabibunga haguma nenyũ oko katambĩ, ĩmwanyĩwatĩkya eriyayo.

²⁵ Nĩkwa lino ngaya eYerũsalema busana nʼerĩwatĩkya abandu ba Nyamuhanga abaliyo.

²⁶ Kusangwa kyabĩrĩtsemesya amakanĩsa wʼeMakedonĩa nʼeAkaya erĩlabya ekĩbo busana nʼabera abali omo katĩkatĩ kʼabandu ba Nyamuhanga eYerũsalema.

²⁷ Ega mokyatsemesya amakanĩsa, kandi bali nʼomwĩnda wʼerikola batya. Kusangwa Abayũda mobawatĩkya abʼEbihanda omo myatsi yʼekĩrĩmũ neryo abʼEbihanda bali nʼomwĩnda wʼerĩwatĩkya Abayũda omo myatsi eyĩkawatĩkaya omubiri.

²⁸ Namabibuga omũbĩrĩ mubuya oyũ, nʼerihabo ebyosĩ ebiri omo kĩbo kyabo, nasyaya eSpania, nʼerilaba ewenyũ omo nzira.

²⁹ Nyĩnasĩ omugulu nasyahĩka ewenyũ, nasyasa nʼomũyĩsa gosĩ wa Kristo.

³⁰ Neryo balĩkyetu, ngabalembalemba, busana nʼomukama wetu Yesu Kristo, nʼakandi busana nʼolwanzo olo Mũlĩmũ akaha, muhatikane Nyamuhanga haguma nage omwʼisaba lyenyũ busana nage,

³¹ nyĩteyĩbawe oko bandu batĩowa eYũdea; kandi omũbĩrĩ wage eYerũsalema asĩmawe nʼabandu ba Nyamuhanga eyo.

³² Litya inatoka erĩbahĩkako nʼobutseme omwʼisonda lya Nyamuhanga, nʼerĩyĩsyandira ndeke busana nʼerĩyabalũngũlĩra.

³³ Neryo Nyamuhanga oyukatuha Obuholo abye haguma nenyũ ĩnywe bosĩ. Amina.