AbanyaRoma 12 - AMASAKO ABOYTRTRE WA NYAMUHANGA AWAKAHULAWA MO BIBLIA

Engebe nyihya omwisi wa Kristo

¹ Balĩkyetu, ngabalemba-lemba busana nʼeriganyira ĩnene lya Nyamuhanga, nyiti, muyihe uku Nyamuhanga ngʼobuhere obuliho, kandi obũbũyĩrĩre, obũkamũtsemesaya. Erĩ nĩ ʼramya erikutolere.

² Sĩmũsosekanĩbawe nʼemyatsi yʼekihugo kino, nĩkwa muleke Nyamuhanga eribahindula nʼeribaha obũlengekanĩa buhya-buhya. Mutya mwasyatoka eriminya erisonda lya Nyamuhanga. Erisonda erĩ ni ribuya, kandi lĩkatsemesaya, kandi lĩhĩkene.

³ Kusangwa Nyamuhanga abirimba olukogo olũ, ngabwira obuli mundu omo katĩkatĩ kenyũ nyiti, siayiganze eribya mukulu kwilaba aho atolere, nĩkwa aganĩraye ndeke nʼeriyitswera omo lulengo lwʼerĩkĩrirya olo Nyamuhanga abiriha oko buli mundu.

⁴ Tuwite ebĩtsũko bingi oko mubiri muguma, nʼobuli kĩtsũko kiwite omũbĩrĩ wakyo.

⁵ Netu tutya tuli bangi, tuli mubiri muguma itumatikene na Kristo, kandi tuwatene haguma ngʼebĩtsũko mĩsĩndo-mĩsĩndo byʼomubiri muguma.

⁶ Kandi kusangwa tuwite olũsũnzo mĩsĩndo-mĩsĩndo olũkalũa uku Nyamuhanga busana nʼolukogo olo abirituha tukole mulo. Twamabya tuwite olũsũnzo lwʼerĩtũla Engulu Yowene, tũtũleyo omo lulengo lwʼerĩkĩrĩrya lyetu.

⁷ Kumbe nĩ lũsũnzo lwʼomũbĩrĩ, tukole. Kumbe amatuha erĩkangĩrĩrya, tũkangĩrĩraye abandu.

⁸ Amatuha erĩsĩkya emitima yʼabandu, tukole tutya. Amatuha erĩhĩtya, tũhĩtaye ndeke. Oyukasondola asondole nʼomũhwa. Oyukaganyira abandi akole atya nʼobutseme.

Eritondeka lyʼOmukristo

⁹ Olwanzo lubye butsira eriteba. Ũkwe ekibi kyo nye. Ukwamirire ekibuya.

¹⁰ Mwanzane kutsibu ngʼabasubeneko. Mukengane nʼeribya nʼomutima wʼerĩsĩkya abandi.

¹¹ Mukole nʼomũhwa butsira bugata. Mubye nʼomũhwa munene omo kĩrĩmũ, nʼerikolera Omukama.

¹² Mutseme omo maha, mũyĩyĩnaye omo malĩge, eriyitsingirira omwʼisaba,

¹³ musangire omo bwaga bwʼabandu ba Nyamuhanga, mũkokaye abagenĩ.

¹⁴ Mutsumule abakabendereraya; mutsumulebo, simutakirebo.

¹⁵ Mutseme haguma nʼabakatsema, mulire haguma nʼabakalira.

¹⁶ Mubye nʼobũlengekanĩa buguma omo katĩkatĩ kenyũ; Simubye nʼobũlengekanĩa bwʼeriyiheka, nĩkwa musibe nʼabahehere. Simuyiganze ngʼabʼamenge.

¹⁷ Omundu amakukolera ekibi, sumulihe ekibi. Mũganĩraye ekitunganene omo meso wʼabandu bosĩ.

¹⁸ Kyamatokekana, oko luhande lwenyũ, mubye nʼobuholo oko bandu bosĩ.

¹⁹ Abanze, sĩmũyĩkĩsaye, nĩkwa muleke erihitana lya Nyamuhanga likole, kusangwa kĩsakĩre kiti, Omukama ati, Erĩkĩsya ni ryage. Nasyaliha.

²⁰ Kandi kĩsakĩre kiti, Enzĩgũ yawe yamawira, iwamwaganula, amakwa enyota, iwamuha awʼerĩpũlya; kusangwa mwamakola mutya imwamalunda amakala wʼomuliro oko mutwe wuwe.

²¹ Suleke ekibi kĩkakũkĩnda, nĩkwa ũkĩnde ekibi omo kibuya.