AbanyaRoma 10 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Balĩkyetu, ngwĩre olukando lunene omo mutima wage busana nʼabalĩkyetu, kumbe ĩbalamĩbwa. Ngasaba Nyamuhanga busana nabo.

² Ngatũlago busana nabo, ngoko bawite omũhwa busana na Nyamuhanga, nĩkwa sibekola nʼamenge.

³ Kusangwa sĩbasĩ enzira ya Nyamuhanga yʼerĩtũngananĩa abandu, ibakasonda erĩhanganĩa eritunganene ryabo. Bakagana eritunganene erĩkalũa ewa Nyamuhanga.

⁴ Kusangwa Kristo abĩrĩberererya Emigambo, naye akatũngananaya obuli mundu Oyũkĩkĩrĩraya.

Omulamo ni busana nʼabandu bosĩ

⁵ Kusangwa Musa mwasaka omwatsi wʼerĩtũngananĩbwa busana nʼerikwama Emigambo ati omundu oyukakolayo asyabyaho omwʼitunganana lyayo.

⁶ Nĩkwa erĩtũngananĩbwa busana nʼerĩkĩrĩrya liti, Sũbũge omo mutima wawe uti, Nindi wasyahetukira elubula kwehĩ? busana nʼerĩandagalya Kristo. Kutse,

⁷ Nindi wasyandagalira omo Kũlĩmũ kwehĩ? busana nʼerĩlũsya Kristo omo baholĩ.

⁸ Nĩkwa ekitabu kĩkabũga kĩtĩkĩ kwehĩ? kiti, Ekĩnywa ekyo kiri hakũhĩ nawe, kiri omo buno bwawe nʼomo mutima wawe, kyo kĩnywa kyʼerĩkĩrĩrya ekyo tũkatũla.

⁹ Kusangwa wamakangya omo buno ko Yesu ni Mukama, kandi Wamĩkĩrĩrya omo mutima wawe ko Nyamuhanga amũlũbũkaya oko baholĩ, ĩwalamĩbwa.

¹⁰ Kusangwa omundu amĩkĩrĩrya omo mutima wuwe busana nʼerĩtũngananĩbwa na Nyamuhanga, kandi akatũlago omo buno buwe, ĩnĩalamĩbwa.

¹¹ Kusangwa Amasako ati, Obuli mundu oyũkamwĩkĩrĩraya siendisyahemulwa.

¹² Sihali erisombola busana nʼabandu bosĩ, kutse Omũyũda, kutse omundu wʼEbihanda. Kusangwa Nyamuhanga ni Mukama wʼabandu bosĩ, kandi akatsumula ndeke abosĩ abakamulakira.

¹³ Kusangwa kiti, Obuli mundu oyukalakira erĩna lyʼomukama asyalamĩbwa.

¹⁴ Neryo basyamulakira bati, oyo batĩkĩrĩraya kwehĩ? Kandi basĩkĩrĩrya bati oyo bate batowa ko mwatsi kwehĩ? Kandi basyowa bati, omwatsi amatĩndatũlwa kwehĩ?

¹⁵ Kandi basyatũlago bati, bamatenditumwa kwehĩ? Ngoko kĩsakĩre kiti, Ni kibuya ndeke erĩowa erĩhĩka lyʼabandu bakaleta engulu nyibuya.

¹⁶ Nĩkwa ababĩrĩrĩga Engulu Yowene sĩ bʼabosĩ; kusangwa Ĩsaya akabũga ati, Mukama, nindi yo wabĩrĩkĩrĩrya erĩtũlago lyetu kwehĩ?

¹⁷ Litya erĩkĩrĩrya likasa busana nʼerĩowa, nʼerĩowa, likasa busana nʼerĩkangĩrĩrĩbwa, nʼerĩkangĩrĩrya eryo ni Kristo.

¹⁸ Nĩkwa nyiti sĩbetowa erĩkangĩrĩrya kwehĩ? Kwenene babĩrĩowa. Ngoko kĩsakĩre kiti, Omulenge wabo abiritsungana omo kihugo kyosĩ, Nʼebĩnywa byabo byabĩrĩhĩka oko ndũlĩ syʼekihugo.

¹⁹ Kandi ngabũga nyiti, Ĩsraelĩ mwataminya kwehĩ? Musa yo watsũka erĩbũga ati, Nasyaleka ĩmwakwa obũha busana nʼabandu bate bʼekihanda, Nasyabahĩtanĩa busana nʼekihanda kitawite menge.

²⁰ Ĩsaya sialiubaha erĩbũga ati, Nabiribanika oko batanyĩsondaya, Nabĩrĩyĩkangya oko batabũlaya busana nage,

²¹ Nĩkwa busana na Ĩsraelĩ ati, Omusibo gosĩ nabirisumba ebyala byage oko bandu abatĩowa nʼabʼomwaga.