AbanyaGalatia 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihekerana obũlĩto

¹ Balĩkyetu, omundu amabanika Omwʼĩlolo, ĩnywe mukakola omo Mũlĩmũ, mũmũhanganaye; kandi, mukole mutya omo mutima molo, kandi Ũyĩtegaye, ukasyalengwako.

² Muhekerane obũlĩto, neryo mutya mwasyaberererya Emigambo ya Kristo.

³ Omundu amayitendera ngʼomundu, kwesĩ si mundu, ĩnĩakayĩtebaya.

⁴ Obuli mundu alenge omubiri wuwe ĩyowene, neryo iniabana ekyʼeriyihalambira mugo, butsira erĩrĩngĩrĩranĩago nʼomũbĩrĩ wʼogundi mundu.

⁵ Kusangwa obuli mundu asyaheka ĩyowene omuheke wuwe-wuwe.

⁶ Litolere oyukakangĩrĩrĩbawa ebĩnywa bya Nyamuhanga iniasangira ebindu byowene byosĩ nʼOmũkangĩrĩrya wuwe.

⁷ Sĩmũyĩtebaye, Nyamuhanga sialĩsekererĩbawa, kusangwa ekyo mundu akahera kyo anemwendisyahulula.

⁸ Kusangwa oyukabiba oko syongumbu siwe syʼomubiri wuwe, asyahulula erihonda, nĩkwa omundu oyukabiba omwʼisonda lyʼOmũlĩmũ, Omũlĩmũ asyamuha erihulula engebe yʼerikota.

⁹ Neryo situluhe erikola ebibuya kusangwa oko mugulu atolere twasyahulula twamatendiregula.

¹⁰ Neryo oko migulu yosĩ tukabana akatambĩ, tokole ebibuya oko bandu bosĩ, kandi kwilaba aho tukole ebibuya ukwʼabo abali omo kĩtũnga kyʼabĩkĩrĩrye.

Erihanwa busana nʼomusalaba

¹¹ Mulangire ngoko ĩngyowene ngabasakira omo masako manene-manene.

¹² Abakasonda erĩyĩtendererya omo mwatsi wʼomubiri, bo bakabahatikana erĩbanĩbwa, kusangwa sĩbanzĩre erĩendererĩbwa busana nʼomusalaba wa Kristo.

¹³ Nomo bangakwama omwatsi wʼerĩbanĩbwa, sibekwama Emigambo. Nĩkwa banzĩre ĩmwabanĩbwa ibatoka eriyipipa kusangwa mwamalĩga emitsye yʼomubiri.

¹⁴ Nĩkwa ĩngye nasyayihalambira omo mwatsi muguma musa, go nʼomusalaba wʼOmukama wetu Yesu Kristo. Kusangwa busana nʼomusalaba oyo ekihugo kyabiribambwa oko musalaba ũkwʼĩngye, kandi nabiribambwa oko musalaba oko kihugo.

¹⁵ Kusangwa eribana si kindu, kandi eritendibana si kindu. Omwatsi munene nĩ ʼhangika lihya-lihya.

¹⁶ Neryo abosĩ abakasondolĩbawa nʼenzumwa eyĩ, Obuholo nʼeriganyira bibye kubo, nʼukwʼabo bali kwenene abandu ba Nyamuhanga.

¹⁷ Erĩtsũka lino Sihabye omundu oyũkanyĩlũhaya, kusangwa ngwite omo mubiri wage esyongolũ sya Yesu.

¹⁸ Neryo balĩkyetu olukogo lwʼOmukama wetu Yesu Kristo lubye nʼebĩrĩmũ byenyũ. Amina.