AbanyaGalatia 4 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Kandi nyiti, omugulu omũlĩ wʼomwandu akine mwana, sialengĩre omukobe nomo angabya mukama wʼebindu byosĩ.

² Nĩkwa omugulu akine mulere, abalemberĩ nʼabateya bakamulembera nʼeriteya ebindu biwe erĩhĩka oko mugulu owahĩrawa nʼĩse.

³ Netu nibya omugulu twabya bana, twabya bakobe bʼemyatsi yʼekihugo kino.

⁴ Nĩkwa omugulu amabiberera, Nyamuhanga mwatuma Omugala wuwe. Omugala oyo mwabutwa nʼomũkalĩ kandi mwabutwa omo mitsye yʼEmigambo yʼAbayũda,

⁵ iniatoka eribohola ababya omo Migambo, netu itwatoka eriyirwa mo bagala ba Nyamuhanga.

⁶ Kandi kusangwa muli bagala, Nyamuhanga abirituma Omũlĩmũ wʼomugala wuwe omwisi wʼemitima yetu, owakabirikira ati, Tata, Tata!

⁷ Neryo suli kandi mukobe, nĩkwa uli mugala. Kandi wamabya uli mugala, Nyamuhanga asyakuha ebyosĩ abirilaga.

Paũlo akaganĩraya omwatsi wʼAbanya Galatĩa

⁸ Erĩmbere, omugulu mwabya mũtasĩ Nyamuhanga, mwabya bakobe bʼesyonyamuhanga esite kũndũ.

⁹ Nĩkwa lino mwabiriminya Nyamuhanga. Kwilaba aho, Nyamuhanga abiribaminya. Neryo busana nakĩ mukasuba oko myatsi yʼekihugo kino eyite nʼamaka. Mwanzĩre eriswabya bakobe bayo kwehĩ?

¹⁰ Mukakwama ebiro, nʼemikera, nʼebirimo, nʼemyaka.

¹¹ Ngubaha busana nenyũ, nyiti mbino nabiribaluhira busa.

¹² Abagala betu, ngabalemba-lemba nyiti ĩnywe mubye nga ngye. Kusangwa nage nabiribya nga nywe, momutangira nabi.

¹³ Nĩkwa mũnasĩ ngoko nabya nyilwere omo mubiri omugulu natsũka erĩbatũlĩra Engulu Yowene.

¹⁴ Nomo mwanalengawako erinyipona kutse erinyigana busana nʼobũkonĩ bwage, momutakola mutya, nĩkwa momwanyĩkokya ngʼomũlaĩka wa Nyamuhanga, ngoko mwanganakokya Kristo.

¹⁵ Neryo lino omũyĩsa wenyũ oyo ali hayi kwehĩ? Ngababwira nyiti, kumbe kyangatokekana, nga mwabirikula ameso wenyũ nʼerimbago.

¹⁶ Lino nabiribya nzĩgũ yenyũ busana nʼeribabwira ekwenene kwehĩ?

¹⁷ Abandu abo bakabasonda-sondaya kutsibu, nikwa butsira omo mwatsi owene, nĩkwa banzĩre eritugaba, bati mukwamebo kutsibu.

¹⁸ Nĩkwa lyowene erikwama nʼomũhwa omwatsi owene, nomo nyitane haguma nenyũ.

¹⁹ Ĩnywe bana bage, ngʼomũkalĩ Oyukabuta, ko ngakunda nyitya busana nenyũ, nyiti Kristo aminyikale omwisi wenyũ.

²⁰ Nĩkwa nyiti kumbe nangabya haguma nenyũ lino nʼerĩbũga nenyũ omo gundi mũsĩndo. Kusangwa ngalemawa busana nenyũ.

Sera na Hagarĩ

²¹ Munyibwire, ĩnywe mwanzĩre eribya oko Migambo, mũkowa ebyo Migambo ĩkabũga kwehĩ?

²² Kusangwa kĩsakĩre kiti, Abrahamũ abya nʼabagala babiri. Omũkalĩ wʼobukobe mwabuta mugala muguma, nʼomũkalĩ wʼobwĩranda mwabuta mugala muguma.

²³ Omugala wʼomũkalĩ wʼobukobe abutawa ngʼabandu bosĩ, nĩkwa omugala wʼomũkalĩ wʼobwĩranda abutawa busana nʼendagane ya Nyamuhanga.

²⁴ Nʼeyĩ nĩ mĩsyo. Abakalĩ aba bakakangaya ndagano ĩbĩrĩ. Omuguma akalũa oko kitwa kyʼeSĩnaĩ, naye akabuta abana bʼobukobe.

²⁵ Hagarĩ oyũ ni kitwa kyʼeSĩnaĩ omo kihugo kyʼeArabĩa, kiri ngʼeYerũsalema ya lino, kusangwa eYerũsalema ya lino iri omo bukobe haguma nʼabana bayo.

²⁶ Nĩkwa eYerũsalema yʼendata iri nʼobwĩranda, nayo ni koyo wetu.

²⁷ Kusangwa kĩsakĩre kiti, Utseme, uwe mũkalĩ mugumba oyutabuta; Uyitsangure, wamaye, iwe utekunda; Kusangwa omũkalĩ oyũ alekeranĩbawa, awite abana kwilaba Omũkalĩ oyuwite ĩba.

²⁸ Nĩkwa ĩnywe, balĩkyetu, nga Ĩsaka, tuli bana bʼendagane.

²⁹ Ngoko mugulu oyo, oyo wabutawa ngʼabandu bosĩ, mwendererya oyo wabutawa busana nʼOmũlĩmũ, ko liri ritya lino.

³⁰ Nĩkwa Amasako atĩkĩ? Ati, Uhige omũkalĩ mukobe na mugala wuwe. Kusangwa omugala wʼomũkalĩ mukobe, Siendisyasangira obũsokĩ bwʼĩse haguma nʼomugala wʼomũkalĩ wʼobwĩranda.

³¹ Neryo, balĩkyetu, Situli bagala bʼomũkalĩ mukobe, nĩkwa tuli bagala bʼomũkalĩ gʼobwĩranda.