AbanyaFilipi 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritunganene kwenene

¹ Ego, balĩkyetu, mutsemere Omukama! Sĩrĩkalĩre busana nage eribasakira emyatsi eyĩ, kandi ĩkabategaya.

² Mũyĩtegaye busana nʼesyombwa, abandu abakakola nabi, abakayibandanga.

³ Kusangwa ĩtwebene tuli bʼeribana lyʼekwenene, tũkaramaya Nyamuhanga omo Mũlĩmũ wuwe, kandi tũkayĩsyandira omwisi wa Kristo Yesu. Situliyiketera emyatsi yʼomubiri.

⁴ Nĩkwa ĩngye nanganabana ekyʼeriyiketera omo myatsi yʼomubiri. Kumbe hali mundu oyũkaganĩraya ati awite ekyʼeriyiketera omo myatsi yʼomubiri, ĩngye ngwite ekĩlabĩre.

⁵ Nabanĩbawa oko kiro kyʼomunani enyũma wʼeributwa lyage. Nabutawa oko kihanda kya Ĩsraelĩ omo kĩtũnga kya Benyamĩna. Nyiri Mũyũda kũndũ. Omo mwatsi wʼerikwama Emigambo nabya Mũfarĩsayo.

⁶ Nabya nʼomũhwa munene busana nʼerĩendererya ekanĩsa. Nabya nyĩkũmayĩre omwʼitunganana eryo likabanika omo Migambo.

⁷ Nĩkwa busana na Kristo, emyatsi yosĩ eyo yabya ndũndĩ busana nage, ngaganzayo ngʼĩtalya.

⁸ Kandi busana nʼobũgũlĩ bunene bwʼeriminya Kristo Yesu Omukama wage, ngaganza emyatsi yosĩ ngʼĩtalya. Busana na Kristo nabĩrĩtalya emyatsi yosĩ nʼeriganzayo ngʼebibaya, inatoka eribana Kristo mo ndũndĩ yage.

⁹ Kandi nyibanike kwenene ko nyimatikene naye, isingwite ekitunganene ekikabanika omo Migambo, nĩkwa ekitunganene ekikabanika omwʼĩkĩrĩrya Kristo, kyo kitunganene ekĩkalũa ewa Nyamuhanga omo nzira yʼerĩkĩrĩrya.

¹⁰ Ekiguma nyanzĩre nyiti, nyiminye Kristo kwenene, nʼobũtokĩ bwʼerĩlũbũka liwe, kandi nyĩsangĩre omo magalĩ wuwe, nʼeribya haguma naye omo luholo luwe.

¹¹ Inatoka erĩhĩka okwʼĩlũbũka oko baholĩ.

Erisimbirira ebyʼemuliro

¹² Sĩndĩbũga nyiti nabĩrĩhĩka kulyo kutse nga nabĩrĩhĩkana, nĩkwa ngakwamirira inatoka erihambalyo ngoko Kristo Yesu naye abirimbamba.

¹³ Balĩkyetu, sindiganza nga nabiriwata kulyo, nĩkwa ekiguma ngakola; nyanzĩre eribirirwa emyatsi eyabirilaba, erisimbirira emyatsi eyiri emuliro.

¹⁴ Ngayitsinga eritibita erĩhĩka oko ndũlĩ, eribana oluhembo, lye ribirikirwa lyʼendata na Nyamuhanga erimatikana na Kristo Yesu.

¹⁵ Ĩtwe twabĩrĩhĩkana tubye nʼobũlengekanĩa obũ. Kandi mwamabya nʼobundi bũlengekanĩa, Nyamuhanga asyabamĩnyĩsyabo.

¹⁶ Nĩkwa aho twabĩrĩhĩka, tũsĩke erikwamirirabo tutya.

¹⁷ Balĩkyetu, mubye mũkanyĩgerererya. Mũlebaye ngʼabandi abakalendera omwʼitegeka lyetu.

¹⁸ Kusangwa nabya ngababwira, kandi rino ngababwira omo mĩsonĩa nyiti, abangi bakalendera ngʼesyonzĩgũ syʼomusalaba wa Kristo.

¹⁹ Endũlĩ yabo basyaherĩbwa, kandi babiriyira esyongumbu syabo mo nyamuhanga wabo. Bakayihalamba omo myatsi yʼesĩsonĩ, bandu bʼekihugo.

²⁰ Nĩkwa ewetu ye lubula, netu tukalindirira Omũlamya erĩlũa elubula, yo Mukama Yesu Kristo.

²¹ Iye asyabindula omubiri wetu molo, nʼeriyirago ngʼomubiri wuwe wʼolukengerwa, busana nʼobũtokĩ buwe obukatoka erĩhĩra emyatsi yosĩ omo butabale buwe.