AbanyaEfeso 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihana lyʼabotata nʼabana

¹ Abana, mowe abotata nʼabokoyo wenyũ busana nʼomukama, kusangwa ko litolere litya.

² Ekihano kyʼerĩmbere ekiwite erilagana lya Nyamuhanga kiti, Ũsĩkaye tata wawe na koyo wawe,

³ emyatsi yawe itoke erĩowana, nʼakandi iwatoka eribuga biro binene muna-kihugo.

⁴ Nenyũ abotata, sĩmũhĩtanaye abana benyũ, nĩkwa mũkũlayebo omo nzira yʼomukama, nʼerikungabo, nʼerĩkangĩrĩryabo, omwʼĩkangĩrĩrya lyʼomukama.

Abakobe nʼabakama babo

⁵ Abakobe, nenyũ mowe abakama benyũ, mukengebo haguma nʼerititimana nʼomutima owene, ngoko mwangakolera Kristo.

⁶ Simukole kusangwa bakabasamalira kutse kusangwa mwanzĩre erĩtsemesya abandu, nĩkwa ngʼabakobe ba Kristo, mukole nʼomutima gosĩ erisonda lya Nyamuhanga.

⁷ Neryo mukolerebo nʼomutima ogowene nga mukakolera Kristo, butsira bandu.

⁸ Kusangwa mũnasĩ Omukama asyahemba obuli mundu, omukobe kutse oyuli bwĩranda busana nʼomũbĩrĩ ogowene owakola.

⁹ Nenyũ abakama, mukolere abakobe benyũ bo mutya, muleke erĩũbahyabo. Nĩkwa muminye ndeke ngoko hali Mukama muguma elubula. Nĩ wenyũ, kandi ni wabo, naye syali ko butaga.

Ebindu byʼamalwa ebyo Nyamuhanga akatuha

¹⁰ Neryo lino, mubane amaka erima­tikana nʼomukama. Mubane akagala omo bũtokĩ bunene buwe.

¹¹ Mwambale ebindu byosĩ byʼamalwa bya Nyamuhanga imwatoka erihangana nʼerilwa nʼamenge wʼeSatanĩ.

¹² Kusangwa situlilwa nʼabandu, nĩkwa tukalwa nʼabatabalĩ, nʼabʼamaka, nʼabʼehamũlĩ bʼomwĩrĩmya muna-kihugo, nʼemilondo yʼebĩrĩmũ byʼebibi ebiri omo kyanya.

¹³ Neryo muhambe ebindu byosĩ byʼamalwa bya Nyamuhanga, imwatoka erilwa omo kiro kibi, neryo mwamabilwa, imwatoka erihangana ndeke.

¹⁴ Neryo muhangane, mũsĩke, mũhĩre omwatsi wʼekwenene ngʼomukoba omo mbindi syenyũ. Mwambale eritunganene ngʼekindu kyʼamalwa ekĩkategaya ekĩkũba.

¹⁵ Kandi mwambale ebiryato byʼEngulu Yowene yʼobuholo.

¹⁶ Kandi oko migulu yosĩ muhambe engabo yʼerĩkĩrĩrya erikatoka erĩrĩmya emisoha yosĩ yʼomuliro yʼomubi.

¹⁷ Kandi muhambe akakĩra kʼomulamo. Kandi muhambe ekĩnywa kya Nyamuhanga ngʼomũyalĩ wʼOmũlĩmũ Abũyĩrĩre.

¹⁸ Musabe kutsibu nʼerĩbũlya Nyamuhanga erĩbawatĩkya. Kandi musabe omo migulu yosĩ ngoko Mũlĩmũ Abũyĩrĩre akabasondola. Busana nʼomwatsi oyũ, mũyĩtegaye, nʼeriyitsingirira, imunemusabira abandu bosĩ ba Nyamuhanga.

¹⁹ Nage, munyisabire, Nyamuhanga ambe ebĩnywa byʼerĩbũga omugulu ngakũmbũla obuno bwage omo bulume-lume erĩmĩnyĩsya abandu bʼerĩkũmbo lyʼEngulu Yowene.

²⁰ Busana nʼeribya mukwenda wʼEngulu Yowene eyo, indi omo mũlĩkĩ. Munyisabire nyibye nʼobulume-lume erĩtũlago ngoko litolere ĩnabũga.

²¹ Tĩkĩko akandibabwira ebyosĩ, imwatoka eriminya ngoko nyiri, nʼebyo ngakola. Tĩkĩko nĩ mũlĩkyetu mwanze, mukwenda oyuteregula omo mũbĩrĩ wʼOmukama.

²² Ngamutuma erĩbamĩnyĩsya engulu yetu nʼakandi erĩkĩranĩa emitima yenyũ.

²³ Obuholo bubye oko balĩkyetu, kandi olwanzo haguma nʼerĩkĩrĩrya ebĩkalũa uku Nyamuhanga nʼomukama wetu Yesu Kristo.

²⁴ Olukogo lwa Nyamuhanga lubye oko bosĩ abakanza Omukama wetu Yesu Kristo omo lwanzo olutetsanda.