AbanyaEfeso 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Tulendere omo kyakakala

¹ Neryo kusangwa muli bana banze ba Nyamuhanga, mũmũgerereraye.

² Mukole ebyosĩ omo lwanzo, ngoko Kristo atwanza, kandi mwaha engebe yiwe busana netu ngʼobuhere obukakumba ndeke, ehongo eyĩkatsemesaya Nyamuhanga.

³ Kusangwa muli bandu ba Nyamuhanga, simuleke obũsĩngĩrĩ, kutse ebĩtĩsĩrĩre byosĩ, kutse obururu, bikahulwa omo katĩkatĩ kenyũ.

⁴ Kandi siritolere mukahula emyatsi eyĩkĩta esĩsonĩ, kutse ebĩnywa ebyʼobũkĩrũ kutse ebyʼerĩsekererya, nĩkwa kumbe mũkabũga ebikakenga Nyamuhanga.

⁵ Muminye ndeke ngoko obuli mũsĩngĩrĩ, kutse omundu oyukakola ebĩtĩsĩrĩre, kutse omururu, (obururu nĩ mũsĩndo wʼerĩramya esanamu), siendisyasangira omo bwami bwa Kristo na Nyamuhanga.

⁶ Simuleke omundu nʼomuguma erĩbatebya omo bĩnywa byʼobusa. Kusangwa busana nʼemyatsi eyĩ erihitana lya Nyamuhanga lyasyahĩka oko bandu abakayisamambula.

⁷ Neryo simusangane nabo.

⁸ Kera mwabya omo mwĩrĩmya, nĩkwa lino muli omo kyakakala kyʼomukama. Neryo musibe ngʼabana bʼekyakakala.

⁹ (Kusangwa ekyakakala kikaleta emĩsĩndo yosĩ yʼebibuya, nʼebitunganene, nʼebyʼekwenene).

¹⁰ Mwige eriminya ebĩkatsemesaya Omukama.

¹¹ Simusangane omo mĩbĩrĩ yʼomwĩrĩmya eyite nʼendũndĩ, nĩkwa mũhũlũkayeyo oko kyakakala.

¹² Kwenene nĩ ʼsonĩ erĩkanĩa emyatsi eyo bakakola omo bũbĩso-bĩso.

¹³ Nĩkwa emyatsi yosĩ ikaminyikala omugulu ikahuluka omo kyakakala; kusangwa ekyakakala kĩkamĩnyĩsaya ndeke emyatsi yosĩ.

¹⁴ Ekĩ kikaleka ĩnĩabũga ati, Ubuke, uwe mũgotserĩ, Ũlũbũke oko baholĩ! Kristo asyakũkolerya.

¹⁵ Neryo, mũyĩtegaye ndeke, simusibe ngʼabandu bakĩrũ, nĩkwa ngʼabandu bʼamenge.

¹⁶ Sĩmũlabaye ebiro ebĩ byo buyira kusangwa omugulu ono ni mubi.

¹⁷ Neryo Simubye bakĩrũ, nĩkwa mũsondaye eriiga ekyo Mukama anzĩre imwakola.

¹⁸ Sĩmũkũnde omo bĩnyũ, kusangwa hali eritamira, nĩkwa mũsũle mʼOmũlĩmũ Abũyĩrĩre.

¹⁹ Mũkanaye omo bĩnywa byʼewasĩngya nʼebyʼesyonyimbo nʼemirenge yʼeripipa Nyamuhanga, kandi mwimbe nʼeriyira omulenge owene busana nʼomukama omo mitima yenyũ.

²⁰ Oko migulu yosĩ nʼomo myatsi yosĩ muhe ewasĩngya uku Nyamuhanga Tata, omo lĩna lyʼomukama wetu Yesu Kristo.

Abakalĩ nʼabĩba wabo

²¹ Kusangwa mukakenga Kristo, obuli mundu owe mũlĩkyabo.

²² Abakalĩ, mowe abĩba nywe, ngoko mũkowa Omukama.

²³ Kusangwa omulume awite ehamũlĩ oko mũkalĩ wuwe, ngoko Kristo awite ehamũlĩ oko kanĩsa. Kandi Kristo nĩ mũlamya wʼekanĩsa omubiri wuwe.

²⁴ Neryo ngoko ekanĩsa ĩkowa Kristo, litolere abakalĩ ĩbowa abĩba wabo omo myatsi yosĩ.

²⁵ Nenyũ abĩba, mwanze abakalĩ benyũ, ngoko Kristo mwanza ekanĩsa. Kusangwa Kristo mwayiha busana nʼekanĩsa,

²⁶ iniatoka erihigulayo nʼerĩeryayo ĩnĩamabĩlabyayo omo magetsi, kye kĩnywa kiwe.

²⁷ Ati, iniatoka eriyiretera ekanĩsa omo bubuya bwayo, isiyiwite ekĩtĩngũ kutse omũkũnyo kutse ekindi kiri ngʼekyo; nĩkwa ati, ibye ĩbũyĩrĩre butsira bulema.

²⁸ Litya abĩba ko banze abakalĩ babo bo batya ngoko bakanza emibiri yabo. Oyukanza omũkalĩ wuwe akayanza.

²⁹ Kusangwa sihali mundu na kera Oyũkakwa omubiri wuwe gʼobusu, nĩkwa akahago akalyo nʼerĩsũgago, ngoko Kristo akakola busana nʼekanĩsa.

³⁰ Netu ekanĩsa, tuli bĩtsũko byʼomubiri wuwe.

³¹ Ngoko kĩsakĩre kiti, Busana nʼomwatsi oyu omundu asyasĩganĩa ĩse na nyĩnya, asyalanda oko mũkalĩ wuwe, nʼababiri abo basyabya muguma.

³² Hano hali erĩkũmbo lĩnene; nĩkwa ngahula Kristo nʼekanĩsa.

³³ Nenyũ nibya, obuli mundu omo katĩkatĩ kenyũ anze mũkalĩwe ngoko akayanza ĩyowene; nʼomũkalĩ naye akenge ĩba wuwe.