AbanyaEfeso 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Obuguma bwʼomubiri

¹ Neryo ĩngye mundu wʼomũlĩkĩ busana nʼomukama, ngabahatikana nyiti, mukwame emibere yʼolulengo olo Nyamuhanga ababirikirira erikwamalo.

² Mũyĩkehaye, mubye nʼomutima molo, muyibombeke. Muganyirane omo lwanzo.

³ Mulenge eribya nʼobuguma obũkalũa oko Mũlĩmũ Abũyĩrĩre, kandi mubye nʼobuholo obũkabamatanaya haguma.

⁴ Kusangwa hali omubiri muguma, nʼOmũlĩmũ Abũyĩrĩre muguma, ngoko Nyamuhanga ababirikira oko maha maguma.

⁵ Hali Omukama muguma, nʼerĩkĩrĩrya liguma, nʼerĩbatĩsya liguma.

⁶ Hali Nyamuhanga muguma, Ise wʼabandu bosĩ, oyuli endata oko bosĩ. Kandi akakola omo bosĩ, kandi ali omo byosĩ.

⁷ Nĩkwa Nyamuhanga omo lukogo luwe mwaha obuli mundu ũkwʼĩtwe olũsũnzo ngʼolulengo lwʼerĩhĩtya lya Kristo.

⁸ Neryo kĩkabũga kiti, Omugulu ahetukira endata, Wabirisondola abanyegwa bangi haguma nawe, Kandi mwaha abandu bʼolũsũnzo.

⁹ Neryo atĩkĩ kwehĩ ati, ahetuka endata? Liti, atsũka erĩkĩma omo myanya yʼeyĩkwa yʼekihugo.

¹⁰ Neryo oyo wandagala, yo nʼoyo wahetukira endata kwilaba amatũkũ gosĩ, iniatoka erĩũsũlya ehosĩ nʼeribya ehosĩ.

¹¹ Neryo mwaha abandu bʼolũsũnzo mũsĩndo-mũsĩndo. Mwaha abandi eribya bakwenda, mwaha abandi eribya bamĩnyererĩ, mwaha abandi eribya batũlĩ bʼEngulu Yowene, abandi mwahabo eribya bateya bʼekanĩsa nʼabakangĩrĩrya.

¹² Neryo mwakola atya erĩtegekanĩa abandu ba Nyamuhanga busana nʼomũbĩrĩ wuwe, nʼerĩhĩkanĩa omubiri wa Kristo.

¹³ Litya twasyahĩka oko buguma bwʼerĩkĩrĩrya nʼobwʼeriminya Omugala wa Nyamuhanga, itwatoka erĩhĩkana omo lulengo lwʼerĩhĩkana lya Kristo.

¹⁴ Itutaswabya bana, abakagusawa eyĩ nʼeyĩ omo bisunda byʼengetsi, kutse erihekwa ehandi nʼehandi nʼamahunga gosĩ wʼerĩkangĩrĩrya lyʼabandu abakateba, kandi abakatalaya abandu omo bũgobya bwabo.

¹⁵ Nĩkwa tũbũge ekwenene omo mutima wʼolwanzo, kandi tukule busana na Kristo omo myatsi yosĩ, kusangwa iye ni mutwe netu tuli mubiri wuwe.

¹⁶ Busana naye omubiri gosĩ akatsũkĩkanĩbawa nʼerilukwa haguma omo buli nungo. Obuli kĩtsũko kyamakola haguma kikaleka omubiri gosĩ iniakula ndeke nʼerĩkanyĩa omo lwanzo.

Engebe nyihya iri omwisi wa Kristo

¹⁷ Ngabũga ekĩ, kandi ngatũlago haguma nʼomukama nyiti, simusyeswalendera kandi ngoko Bihanda bikalendera, kusangwa amalengekanĩa wabo ni buyira.

¹⁸ Kandi amenge wabo nĩ mwĩrĩmya. Babirigabana nʼengebe ya Nyamuhanga, sĩbasĩkĩ kandi babĩrĩkalya emitima yabo.

¹⁹ Sĩbekwa esĩsonĩ; kandi bakayitwala okwʼĩsĩngĩra lyosĩ, bakakola obuli mũsĩndo wʼebĩtĩsĩrĩre nʼobururu.

²⁰ Nĩkwa ĩnywe, momutiga Kristo yo mutya.

²¹ Mwamabya mwabĩrĩmowa, ĩmwabĩrĩkangĩrĩrĩbwa na Kristo, omo kwenene eyiri na Yesu.

²² Neryo muleke emibere ya kera eyabya ĩkabatsandya omo syongumbu esikabateba.

²³ Mubye bahya-bahya omo mitima yenyũ nʼomo malengekanĩa wenyũ.

²⁴ Mubye bandu bahya-bahya abahangikawa omo kĩsosekanĩo kya Nyamuhanga, omo bitunganene nʼomo bĩbũyĩrĩre byʼekwenene.

²⁵ Neryo mugane eribiha lyosĩ. Obuli mundu abũge ebyʼekwenene oko mũlĩkyabo, kusangwa ĩtwe bosĩ tuli balĩkyabo omo mubiri wa Kristo.

²⁶ Mwamahitana isimwakola ebibi, simuleke eryuba likalenga imunahitene.

²⁷ Simuhe Satanĩ yʼomwanya.

²⁸ Omwĩbĩ syĩbe kandi, nĩkwa akole omũbĩrĩ owene omo byala biwe, iniatoka eribana akʼerirya kandi iniatoka erĩwatĩkya abera.

²⁹ Sĩmũbũge ebĩnywa ebĩtĩsĩrĩre, nĩkwa mũbũge ebĩnywa bibuya ebĩkawatĩkaya nʼerĩhĩmba bandu, ebikaha olukogo oko bandu abakowa.

³⁰ Sĩmwĩte Omũlĩmũ Abũyĩrĩre wa Nyamuhanga wʼobũlĩge, kusangwa Omũlĩmũ Abũyĩrĩre nĩ kĩmĩnyĩsyo kyenyũ busana nʼekiro ekyo Nyamuhanga asyababohola.

³¹ Muguse hali erikaliha lyosĩ, nʼeryagalirwa lyosĩ, muleke olukanda, nʼebĩtsũmĩ byosĩ, haguma nʼerĩkĩsya lyosĩ.

³² Mwanzane, mubye nʼemitima eyihehere, mubuyirane, ngoko Nyamuhanga abiribabuyira busana na Kristo.