AbanyaEfeso 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ingye Paũlo, omukwenda wa Kristo Yesu okwʼisonda lya Nyamuhanga. Ngabasakira ĩnywe bandu ba Nyamuhanga abĩkere eEfeso, abateregula erikwama Kristo Yesu.

² Nyamuhanga Tata wetu, nʼomukama Yesu Kristo, abahe olukogo nʼobuholo.

Omũyĩsa wʼerĩtongolĩbwa

³ Tupipe Nyamuhanga Tata wʼOmukama wetu Yesu Kristo! Busana nʼerimatikana na Kristo Nyamuhanga abirituha omũyĩsa munene. Abirituha obuli mũyĩsa wʼekĩrĩmũ owakalũa omo myanya yʼelubula.

⁴ Nyamuhanga mwayisoga twe eribya buwe, erimatikana na Kristo embere wʼerihangikwa lyʼekihugo, ati tubye ababũyĩrĩre butsira bulema embere wuwe. Nyamuhanga, busana nʼolwanzo luwe,

⁵ mwayisoga erituyira mo bagala buwe busana na Kristo Yesu. Erĩ ryabya erisonda liwe erĩkamũtsemesaya.

⁶ Tupipe Nyamuhanga busana nʼolukogo lubuya luwe olo atuha busana na Mugala wuwe mwanze!

⁷ Kusangwa twabĩrĩtongolĩbwa omo musasi wa Kristo, kandi abiritubuyira amalolo wetu. Kwenene olukogo lwa Nyamuhanga ni lunene,

⁸ olo atuha ndeke-ndeke. Kusangwa Nyamuhanga omo menge nʼeriminya liwe mwakola ebyo abya abĩrĩyĩsũnza.

⁹ Kandi abĩrĩtũmĩnyĩsya erĩkũmbo lyʼerĩyĩsũnza liwe, eryo ayisoha erĩberererya omwisi wa Kristo oko mugulu atolere.

¹⁰ Nyamuhanga abĩrĩyĩsũnza erĩhĩndanĩa umu Kristo ebyosĩ ahangika, ebiri omo lubula nʼebiri omo kihugo.

¹¹ Kusangwa Nyamuhanga akakola emyatsi yosĩ ngʼerisonda liwe, ngoko ategekanaya. Kandi Nyamuhanga ayisoga twe eribya bandu buwe omwisi wa Kristo ngoko ayĩsũnza kera-kera.

¹² Ati, ĩtwe twatsũka erĩhĩra amaha uku Kristo, tupipe olukengerwa lwa Nyamuhanga.

¹³ Omwatsi kwʼabya atya busana nenyũ. Omugulu mowa omwatsi wʼekwenene, wʼEngulu Yowene yʼerĩbalamya omwʼĩkĩrĩrya Kristo. Iye Nyamuhanga mwabahĩrako ekiminyikalo kiwe, iniakabaha Omũlĩmũ Abũyĩrĩre ogo alaga.

¹⁴ Omũlĩmũ Abũyĩrĩre ni mutsimbo wʼebyo Nyamuhanga abirilaga abandu buwe, erĩhĩka aho Nyamuhanga asyatongolerya ebyosĩ biwe. Tupipe olukengerwa luwe!

Erisaba lya Paũlo

¹⁵ Busana nʼomwatsi oyũ, erĩtsũka ekiro nowa ngoko mwĩkĩrĩraya Omukama Yesu, kandi ngoko mwanzĩre abandu bosĩ ba Nyamuhanga.

¹⁶ Sĩndyũmbaya eriha ewasĩngya uku Nyamuhanga busana nenyũ. Ngabibuka omwʼisaba lyage.

¹⁷ Kandi ngasaba Nyamuhanga wʼOmukama wetu Yesu Kristo, iye Tata oyuwite olukengerwa, abahe omo Mũlĩmũ Abũyĩrĩre, amenge, nʼerĩbĩsũlĩra, imwatoka erimuminya ndeke-ndeke.

¹⁸ Ngasaba nyiti, obũlengekanĩa bwenyũ bubane erilangira ekyakakala kiwe, imwatoka eriminya amaha ago muwite, kusangwa abiribabirikira, kandi muminye omũyĩsa mubuya Nyamuhanga akalaga abandu buwe.

¹⁹ Muminye obunene bwʼobũtokĩ buwe obukakola omwisi wetu ĩtwe tũkĩkĩrĩraya. Obũtokĩ obũ omwisi wetu ni maka ayo manene wa Nyamuhanga,

²⁰ ago akangaya omugulu alũbũkaya Kristo oko baholĩ, nʼerĩmũhĩra oko kĩtũmbĩ oko luhande luwe lwʼamali omo lubula.

²¹ Kristo akatabala eyo, endata oko batabalĩ bosĩ nʼabakama bosĩ, nʼabʼehamũlĩ bosĩ, nʼabenye obũtokĩ bosĩ. Nʼerĩna liwe lĩlabĩre oko buli rĩna erikahulawa oko mugulu ono, kutse oko mugulu owakandisyasa.

²² Nyamuhanga abĩrĩhĩra emyatsi yosĩ omo hamũlĩ yiwe, kandi abĩrĩmũhĩra mo mukulu wʼemyatsi yosĩ busana nʼekanĩsa.

²³ Ekanĩsa eyĩ ni mubiri wa Kristo, kandi nĩ ʼhĩkana lyʼoyũkahĩkanaya ebyosĩ ehosĩ.