Abalawĩ 8 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihigula abahererĩ

¹ Neryo Omwami Mukulu mwabũga na Musa, ati

² Wĩmaye Harũnĩ nʼabagala buwe, nʼesyongimba, nʼamagũta wʼerĩhakabya, nʼenume yʼende yʼobuhere bwʼebibi, nʼesyombangale ĩbĩrĩ, nʼekĩbo kyʼobundu obute mo kĩhamya;

³ kandi ũhĩndanaye endeko yosĩ yʼoko lũkyo lwʼeHema yʼerĩhĩndanamo.

⁴ Neryo Musa mwakola ngoko Mwami Mukulu amuhana. Endeko yabere yabĩhĩndanĩbwa oko lũkyo lwʼeHema yʼerĩhĩndanamo,

⁵ neryo Musa mwabũga nʼendeko eyo ati, Oyũ go mwatsi Omwami Mukulu abirihana erikolwa.

⁶ Na Musa mwaleta Harũnĩ nʼabagala buwe, mwakosabo omo magetsi.

⁷ Neryo mwamwambalya erĩkotĩ, mwamũkũndĩka kʼomukoba, kandi mwamwambalya ekanzu, kandi mwamũhĩra kwʼeefodĩ, kandi mwamũkũndĩka olukoba lwʼeefodĩ olũlũkĩre nʼamenge, mobamũkũndĩkalo.

⁸ Kandi mwamũhĩra kwʼekyuma kyʼekĩkũba; nʼomo kyuma kyʼekĩkũba mwahĩramo Ũrĩmũ na Thũmĩmũ.

⁹ Neryo mwahĩra embĩta yʼoko mutwe wuwe; nʼendata oko mbĩta, embere mwahĩra akasayi kʼesyamagetsi, ka kakĩra kabũyĩrĩre; ngoko Mwami Mukulu ahana Musa.

¹⁰ Neryo Musa mwĩmya amagũta wʼerĩhakabya, mwahakabya ahabũyĩrĩre nʼebyosĩ byabyamo, mwahigulabyo.

¹¹ Kandi mwatsatsanga amagũta gʼoko kiherero ngendo sirinda, kandi mwahakabya ekiherero nʼebindu byakyo byosĩ kwʼamagũta, nʼekinabiro, nʼendĩna yakyo, erihigulabyo.

¹² Neryo mũta amagũta wʼerĩhakabya oko mutwe wa Harũnĩ, mwamũhakabya, erimuhigula.

¹³ Neryo Musa mwaleta abagala ba Harũnĩ, mwambalyabo amakotĩ, nʼerĩkũndĩka emikoba nʼeriboha kubo kwʼemiremba ngoko Mwami Mukulu ahana Musa.

¹⁴ Neryo mwaleta enume yʼende yʼobuhere bwʼebibi, na Harũnĩ nʼabagala buwe mobahĩra ebyala byabo oko mutwe wʼenume yʼende yʼobuhere bwʼebibi.

¹⁵ Neryo Musa mwĩtayo; kandi Musa mwĩmya omusasi, mwahĩrago oko mahembe wʼekiherero nʼerĩtĩmbyago ehosĩ omo munwe wuwe, mwahotsya ekiherero. Neryo mũta omusasi gʼomo ndĩna yʼekiherero, nʼerĩhotsyakyo, nʼeririha embanulo busana nakyo.

¹⁶ Neryo mwĩmya ebĩsabũ ebyabya oko bila byʼomo nda, nʼendulu yʼoko bulepe, nʼesyombĩko ĩbĩrĩ, nʼebĩsabũ byasyo, na Musa mwahĩsĩriryabyo omo mũkĩ ngʼobuhere oko kiherero.

¹⁷ Nĩkwa enume yʼende nʼekihu kyayo nʼeyĩswĩ yayo, nʼebise byayo, mwahĩsĩrĩryabyo omo muliro ekyaswa kyʼekilaliriro ngoko Mwami Mukulu ahana Musa.

¹⁸ Neryo mwaleta embangale yʼobuhere bwʼerĩokererya; na Harũnĩ nʼabagala buwe mobahĩra ebyala byabo oko mutwe wʼembangale.

¹⁹ Neryo Musa mwakerayo; kandi Musa mwatsatsanga omusasi oyo gʼoko kiherero erĩtĩmbya goko.

²⁰ Neryo mwatsũtsanga embangale eyo mo bitswe-bitswe; neryo Musa mwahĩsĩrĩrya omutwe, nʼebitswe-bitswe, nʼebĩsabũ omo mũkĩ mo buhere.

²¹ Neryo mwerya ebila byʼomo nda nʼeminono omo magetsi; neryo Musa mwahĩsĩrĩrya embangale yosĩ eyo yʼoko kiherero: yabya buhere bwʼerĩokererya busana nʼekikumbo kyʼerisiha; yabya buhere obũkokĩbawa oko muliro oko Mwami Mukulu; ngoko Mwami Mukulu ahana Musa.

²² Neryo mwaleta eyindi mbangale yʼakabiri, embangale yʼerihigula. Neryo Harũnĩ nʼabagala buwe mobahĩra ebyala byabo oko mutwe wʼembangale eyo.

²³ Neryo Musa mwĩtayo; na Musa mwĩmya oko musasi wayo, mwahĩrago oko mutwe wʼokũtũ kwʼamali kwa Harũnĩ, nʼoko kikumo kyʼebyala biwe byʼamali, nʼokwʼĩno lyʼobulume ryʼekisando kiwe kyʼamali.

²⁴ Neryo Musa mwaleta bagala ba Harũnĩ; neryo mwahĩra omusasi gʼoko mitwe-mitwe yʼamatwĩ wabo wʼamali, nʼoko bikumo byʼebyala byabo byʼamali, nʼoko mano wʼobulume wʼebisando byabo byʼamali; na Musa mwatsatsanga omusasi gʼoko kiherero erĩtĩmbyago ehosĩ.

²⁵ Neryo mwĩmya ebĩsabũ, nʼomukira wʼebĩsabũ, nʼebĩsabũ byosĩ ebyabya oko bila byʼomo nda nʼendulu yʼoko bulepe, nʼesyombĩko ĩbĩrĩ, nʼebĩsabũ byasyo, nʼekihinga kyʼamali;

²⁶ neryo mwĩmya akatole kaguma akate mo kĩhamya, omo kĩbo kyʼobundu obute mo kĩhamya, ekyabya embere syʼOmwami Mukulu, nʼakatole kaguma akali mwʼamagũta, nʼakatole kaguma akangũhĩrĩre, neryo Musa mwahĩrabyo oko magabo wʼebĩsabũ, nʼoko kihinga kyʼamali.

²⁷ Neryo mwahĩra ebyosĩ omo byala bya Harũnĩ, nʼomo byala byʼabagala buwe, neryo mwaletabyo ngʼobuhere bwʼerĩhũnga-hũngya embere syʼOmwami Mukulu.

²⁸ Neryo Musa mwalũsyabyo omo byala byabo nʼerĩhĩsĩrĩryabyo omo mũkĩ oko kiherero haguma nʼobuhere bwʼerĩokererya. Byabya buhere bwʼerihigula busana nʼekikumbo kĩsĩhĩre; bwabya buhere obwabĩrĩokererĩbwa oko muliro busana nʼOmwami Mukulu.

²⁹ Neryo Musa mwĩmya ekĩkũba ekyo, mwahũnga-hũngyakyo busana nʼobuhere bwʼerĩhũnga-hũngya embere syʼOmwami Mukulu; lyabya ĩgabo lya Musa oko mbangale yʼerihigula; ngoko Mwami Mukulu ahana Musa.

³⁰ Neryo Musa mwĩmya oko magũta wʼerĩhakabya nʼoko musasi owabya endata oko kiherero, mwatsatsangago uku Harũnĩ nʼoko ngimba siwe, nʼoko bagala buwe nʼoko ngimba syabo, kandi mwahigula Harũnĩ, nʼesyongimba siwe, nʼabagala buwe, nʼesyongimba syʼabagala buwe.

³¹ Neryo Musa mwabũga na Harũnĩ nʼabagala buwe ati, Ũhũke esĩswĩ oko lũkyo lwʼeHema yʼerĩhĩndanamo; mulire syoho nʼobundu obuli omo kĩbo kyʼobuhere bwʼerihigula ngoko nahana nyiti, Harũnĩ nʼabagala buwe basyalyabo.

³² Nʼebikasaka oko sĩswĩ nʼoko bundu mwasyahĩsĩrĩryabyo oko muliro.

³³ Nenyũ simusyehulukira eyĩhya oko lũkyo lwʼeHema yʼerĩhĩndanamo ebiro birinda, erĩhĩka aho ebiro byʼerihigulwa lyenyũ byasyahĩkĩra; kusangwa asyabahigula ebiro birinda.

³⁴ Omwami Mukulu abirihana ati kikolawe ngoko kiriakolawa mũnabwĩre, eririha embanulo busana nenyũ.

³⁵ Kandi oko lũkyo lwʼeHema yʼerĩhĩndanamo mwasyasiba omo musibo nʼomo kiro ebiro birinda, nʼerĩteya erihana lyʼOmwami Mukulu, mukasyahola, kusangwa nabirihanwa nyitya.

³⁶ Neryo Harũnĩ nʼabagala buwe mabakola emyatsi yosĩ eyo Mwami Mukulu ahana Musa.