Abalawĩ 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritegeka lyʼamahere

¹ Ekihano kyʼobuhere bwʼolubanza kyekĩ: kĩbũyĩrĩre kutsibu.

² Aho bakakerera obuhere bwʼerĩokererya ha nʼaho basyakerera obuhere bwʼolubanza, asyatsatsanga omusasi wabo oko kiherero erĩtĩmbya ehosĩ.

³ Kandi asyaherera kubo ebĩsabũ byabo byosĩ; nʼomukira wʼebĩsabũ, nʼebĩsabũ ebĩswĩkĩre ebila byʼomo nda,

⁴ kandi asyalũsyaho esyombĩko ĩbĩrĩ, nʼebĩsabũ ebiri kusyo, ebiri hakũhĩ nʼesyombĩko, nʼendulu eyiri oko bulepe.

⁵ Nʼomũhererĩ asyahĩsĩrĩryabo oko kiherero busana nʼobuhere obwabĩrĩokĩbwa omo muliro busana nʼOmwami Mukulu; ni buhere bwʼolubanza.

⁶ Obuli mulume omo katĩkatĩ kʼabahererĩ asyalya kubo; bwasyalirwa ahabũyĩrĩre; nĩ bũbũyĩrĩre kutsibu.

⁷ Ngoko buhere bwʼebibi buli, nʼobuhere bwʼolubanza ko bune butya; ekihano kyago ni kiguma; omũhererĩ oyukaliha embanulo mubo yo wasyĩmyabo.

⁸ Nʼomũhererĩ oyukahera obuhere bwʼerĩokererya bwʼomundundi, omũhererĩ oyo asyayĩmĩrya engobĩ yʼobuhere bwʼerĩokererya obo alialeta.

⁹ Nʼobuli buhere bwʼerĩokererya obũkotsĩrye oko luyo, nʼebyosĩ bĩkakotsĩbawa oko luyo lwʼekisanzali, nʼoko luyo lwʼerĩgũmbĩka, byasyabya byʼomũhererĩ ulyaherabyo.

¹⁰ Nʼobuli buhere bwʼeyĩsyano yʼengano, obũtũlũngene nʼamagũta, kutse obũmĩre, abagala ba Harũnĩ bosĩ basyayĩmĩryabyo, omuguma ngʼogundi.

¹¹ Kandi ekĩ ni kihano kyʼerihonga lyʼamahere wʼobuholo, ago mundu asyaherera Omwami Mukulu.

¹² Amaherabo busana nʼeriha ewasĩngya, asyaherabo haguma nʼehongo yʼewasĩngya, otutole otute mo kĩhamya ehĩtũlũngene nʼamagũta, nʼotutole otũhakabĩbwe nʼamagũta, nʼotutole twʼeyĩsyano yʼenzelele otũtũlũngene nʼamagũta.

¹³ Asyaleta obuhere buwe haguma nʼehitole ehiri mwʼekĩhamya haguma nʼehongo yʼamahere wuwe wʼobuholo busana nʼeriha ewasĩngya.

¹⁴ Asyaleta kubo kwʼekiguma omo buli buhere busana nʼobuhere bwʼerisumbira Omwami Mukulu; bwasyabyaʼbwʼomũhererĩ oyukatsatsanga omusasi wʼamahere wʼobuholo.

¹⁵ Nʼesĩswĩ syʼehongo yʼamahere wʼobuholo busana nʼeriha ewasĩngya syasyalibwa oko kiro ekyo kyʼobuhere buwe; sĩendĩsyasakya kubo erĩhĩka oko ngyakya.

¹⁶ Nĩkwa ehongo yʼobuhere buwe yamabya yʼerĩlahĩrya, kutse obuhere bwʼeriyitswa bwasyalibwa oko kiro ekyo alyahera obuhere bwʼehongo yiwe; nʼengyakya ebikasaka kubo byanganalibwa;

¹⁷ nĩkwa ebiryasaka oko sĩswĩ syʼehongo byasyahĩsĩbwa omo muliro oko kiro kyʼebisatu.

¹⁸ Nʼeyĩswĩ yʼehongo yʼamahere wʼobuholo yamalibwako oko kiro kyʼebisatu, oyukaherabo sĩendĩsyalĩgwa, kutse siyendisyaganzwa busana nʼoyukaherabo. Kyasyabya kindu kyʼesyonye, nʼomundu oyukalya kubo asyaheka obubi buwe.

¹⁹ Nʼeyĩswĩ eyĩkatũla oko kindu kĩtĩsĩrĩre sisyeribawa; yasyahĩsĩrĩrĩbwa omo muliro. Kandi busana nʼeyindi ĩswĩ obuli mundu oyo werĩre asyalya kuyo.

²⁰ Nĩkwa omundu oyukalya okwʼĩswĩ yʼehongo yʼamahere wʼobuholo wʼOmwami Mukulu, oyũtĩsĩrĩre, omundu oyo asyahigwa oko bandu buwe.

²¹ Nʼomugulu Omundundi akatũla oko kindu kĩtĩsĩrĩre, ekĩtowene kyʼomundu, kutse enyama ĩtowene, kutse ebyʼesyonye ebĩtĩsĩrĩre, neryo akalya oko sĩswĩ syʼehongo yʼamahere wʼobuholo, ago Mwami Mukulu, omundu oyo asyahigwa oko bandu buwe.

Ebĩsabũ nʼomusasi sibiribawe

²² Neryo Omwami Mukulu mwabũga na Musa ati,

²³ Ubwire abana ba Ĩsraelĩ, uti, Simusyerya ebĩsabũ byʼende, kutse ebyʼembũlĩ, kutse ebyʼembene.

²⁴ Nʼebĩsabũ byʼenyama eyiryayiholera, nʼebĩsabũ byʼeyĩrĩtawa nʼesyonyama, byanganakola ogundi mũbĩrĩ; nĩkwa Simusyerya kubyo nʼahake.

²⁵ Kusangwa Omundundi oyukalya ebĩsabũ byʼenyama eyo abandu bakaherera mo buhere bũlyokĩbawa oko muliro busana nʼOmwami Mukulu, omundu oyukalyabyo asyahigwa oko bandu buwe.

²⁶ Kandi Simusyerya emĩsĩndo yosĩ yʼomusasi, amabya wʼenyonyũ kutse wʼenyama, ehosĩ mũkĩkala.

²⁷ Kandi omundu gʼũkwʼĩnywe oyukalya omusasi, omundu oyo asyahigwa oko bandu buwe.

Erĩgabo lyʼabahererĩ

²⁸ Kandi Omwami Mukulu mwabũga na Musa, ati,

²⁹ Ubwire abana ba Ĩsraelĩ, uti, Oyukaherera ehongo yʼamahere wʼobuholo wuwe oko Mwami Mukulu asyaletera Omwami Mukulu yʼobuhere obũkalũa oko syohongo syʼamahere wuwe wʼobuholo.

³⁰ Ebyala biwe byasyaleta amahere oko Mwami Mukulu awakokĩbawa omo muliro. Ebĩsabũ haguma nʼekĩkũba asyaletabyo, ekĩkũba kitoke eriretwa eribya buhere bwʼerĩsũka-sũkĩbwa embere syʼOmwami Mukulu.

³¹ Nʼomũhererĩ asyahĩsĩrya ebĩsabũ byʼoko kiherero; nĩkwa ekĩkũba kyasyabya kya Harũnĩ nʼabagala buwe.

³² Kandi mwasyaha omũhererĩ ekihinga kyʼamali busana nʼobuhere bwʼerisumba erĩlũa oko hongo yʼamahere gʼobuholo.

³³ Oyukahera omusasi wʼamahere wʼobuholo nʼebĩsabũ omo katĩkatĩ kʼabagala ba Harũnĩ, neryo ekihinga kyʼamali kyasyabya ĩgabo liwe.

³⁴ Kusangwa ekĩkũba kyʼerĩsũkĩbwa nʼekihinga kyʼerisumba nabĩrĩmyabyo oko bana ba Ĩsraelĩ mo hongo yʼamahere wabo wʼobuholo, nabirihabyo uku Harũnĩ omũhererĩ, nʼoko bagala buwe ngʼerĩgabo lyabo erĩlũa oko bana ba Ĩsraelĩ busana nʼemigulu yosĩ.

³⁵ Erĩ nĩ ʼgabo likahigulawa busana na Harũnĩ, nʼerĩgabo lyʼabagala buwe likahigulawa busana nabo, erĩkalũa omo mahere wʼOmwami Mukulu awakokĩbawa oko muliro, oko kiro ekyo ahĩrabo erikolera Omwami Mukulu ngʼabahererĩ.

³⁶ Omwami Mukulu mwahana ati abana ba Ĩsraelĩ bahebyo kubo omo kiro ekyo ahakabayabo amagũta. Nĩ ʼgabo lyabo busana nʼemigulu yosĩ omo katĩkatĩ kʼesyondengo syabo.

³⁷ Ekĩ ni kihano kyʼobuhere bwʼerĩokererya, nʼobuhere bwʼengano nʼobuhere bwʼebibi, nʼobuhere bwʼolubanza, nʼobuhere bwʼerihigula, nʼobwʼehongo yʼamahere wʼobuholo.

³⁸ Ekĩ kyo Mwami Mukulu ahana Musa oko kitwa kyʼeSĩnaĩ ekiro ahana abandu ba Ĩsraelĩ eriretera Omwami Mukulu yʼamahere wabo, omo mbwarara yʼeSĩnaĩ.