Abalawĩ 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihana lyʼamahere

¹ Neryo Omwami Mukulu mwabũga na Musa ati,

² Kandi omugulu omundu akakola ekibi, nʼerĩhalya oko Mwami Mukulu, akateba mũlĩkyabo omo mwatsi wʼeribika, kutse omwʼilagana, kutse omwʼĩba, kutse erinyega mũlĩkyabo,

³ kutse akabana ekiryatala akateba mukyo, ĩnĩalahĩrya omo mabehĩ, omo myatsi yosĩ eyo mundu akakola, iniakakola ebibi muyo;

⁴ neryo amakola ebibi iniali kʼolubanza, asyasũbũlya ebyo ĩmaya omwʼĩba, kutse ekindu ekyo abana erinyegakyo, kutse kindu abĩkĩbawa, kutse kindu ekyatala naye mwakibana,

⁵ kutse ekĩndũkĩ ekyo alahĩraya omo mabehĩ asyasũbũlya ebyosĩ, kandi asyatomeka kukyo ko kitswe kiguma kyʼomo bitanu oko mwenyekyo. Asyamuhakyo oko kiro akaleta obuhere bʼolubanza.

⁶ Naye asyaletera omũhererĩ yʼobuhere buwe bwʼerĩlolya, busana nʼOmwami Mukulu, embangale eyite ko bulema eyĩkalũa omo kĩhyo, ngʼeriganza lyawe, lyʼobũgũlĩ bwayo, busana nʼobuhere bwʼerĩhalya,

⁷ nʼomũhererĩ asyamũsanganĩa omo mbanulo oko Mwami Mukulu; naye asyabuyirwa busana nʼomwatsi wahi akakola owakaleka iniabya kʼolubanza.

⁸ Kandi Omwami Mukulu mwabũga na Musa ati,

⁹ Uhane Harũnĩ nʼabagala buwe, uti, Erĩ niʼhana lyʼobuhere bwʼerĩokererya; obuhere bwʼerĩokererya bwasyabya endata oko lĩko oko kiherero omo kiro kyosĩ erĩhĩka omo ngyakya; nʼomuliro wʼekiherero asyasĩnganĩbwa ĩsĩalĩma.

¹⁰ Nʼomũhererĩ asyambala olukimba luwe lwʼekĩtanĩ, kandi asyambala ehipitula hyʼekĩtanĩ; kandi asyakuka erĩbũ eryo muliro aliahĩsaya omo buhere bwʼerĩokererya oko kiherero, nʼerĩhĩralyo oko mũsĩke wʼekiherero.

¹¹ Neryo asyambula esyongimba siwe, nʼeriambala esindi ngimba, nʼerihekera erĩbũ lyʼekyaswa kyʼekilaliriro ahowene.

¹² Nʼomuliro owali oko kiherero asyasĩnganĩbwaho endambĩ yosĩ, syasyerĩma; nʼomũhererĩ asyakya esyongwĩ syoho obuli ngyakya-ngyakya; kandi asyatondekaho obuhere bwʼerĩokererya, kandi asyahĩsĩrĩryaho ebĩsabũ byʼamahere wʼobuholo.

¹³ Omuliro asyasĩnganĩbwa oko kiherero endambĩ yosĩ; syasyerĩma.

¹⁴ Nʼekihano kyʼobuhere bwʼeyĩsyano yʼengano kyekĩ: abagala ba Harũnĩ basyahererabo embere syʼOmwami Mukulu, embere syʼekiherero.

¹⁵ Naye asyĩmya kubo kwʼekiganza kyʼeyĩsyano yʼenzelele yʼobuhere bwʼeyĩsyano, nʼoko magũta wabo, nʼobukwa bosĩ obuli oko buhere bwʼeyĩsyano yʼengano, nʼerĩhĩsĩryabyo oko kiherero busana nʼekikumbo kikasiha, ngʼekĩbũkyo kyabo oko Mwami Mukulu.

¹⁶ Eyiriasaka kubo Harũnĩ nʼabagala buwe basyalyabo; yasyalibwa butsira kĩhamya ahabũyĩrĩre; basyalira omo kibuga kyʼeHema yʼerĩhĩndanamo.

¹⁷ Sĩbwendĩsyagũmbĩkwa nʼekĩhamya. Nabiriha bobo ngʼerĩgabo lyabo omo mahere wage awabiriyirwa omo muliro; nĩ bũbũyĩrĩre kutsibu ngʼobuhere bwʼebibi, kandi ngʼobuhere bwʼolubanza.

¹⁸ Obuli mulume omo katĩkatĩ kʼabana ba Harũnĩ basyalya kubo ngʼerĩgabo liwe kera na kera omo syondengo syenyũ syosĩ, omo mahere wʼOmwami Mukulu awabiriyirwa omo muliro; obuli mundu oyũkatũla kubyo asyahigulwa.

¹⁹ Neryo Omwami Mukulu mwabũga na Musa, ati,

²⁰ Obũ ni buhere obo Harũnĩ nʼabagala buwe, basyaherera Omwami Mukulu omo kiro ekyo Harũnĩ asyahakabĩbwa amagũta; ekiguma kyʼomwʼĩkũmĩ, ekitiri kyʼeyĩsyano yʼenzelele busana nʼobuhere bwʼeyĩsyano ebiro byosĩ, ekitswe kyabo omo ngyakya, nʼekitswe kyabo omwʼĩgolo.

²¹ Bwasyakokotĩbwa nʼamagũta erĩkotsya oko luyo, Bwasyabya bwabitsapa, wasyaleta bomo. Omo bitswe bĩgũmbĩkĩre, wasyaherera obuhere bwʼeyĩsyano busana nʼekikumbo ekikasiha oko Mwami Mukulu.

²² Nʼomũhererĩ oyo wabĩrĩhakabĩbwa amagũta oyo Wasyabya omo mwanya wuwe omo katĩkatĩ kʼabagala buwe asyaherabo. Omo mugambo wʼemigulu yosĩ, obosĩ; bwasyokererĩbwa busana nʼOmwami Mukulu.

²³ Nʼobuli buhere bwʼeyĩsyano yʼengano bwʼomũhererĩ bwasyokererĩbwa obosĩ sibusyeribawa.

²⁴ Kandi Omwami Mukulu mwabũga na Musa, ati,

²⁵ Ubwire Harũnĩ nʼabagala buwe, uti, Ekĩ ni kihano kyʼobuhere bwʼebibi; omo mwanya aho obuhere bwʼerĩokererya bũkĩtĩrawa obuhere bwʼebibi bwasyokererĩbwa embere syʼOmwami Mukulu; nĩ bũbũyĩrĩre kutsibu.

²⁶ Omũhererĩ oyukaherererabo busana nʼebibi asyalyabo; bwasyalibwa omo mwanya wʼahabũyĩrĩre, omo kibuga kyʼeHema yʼerĩhĩndanamo.

²⁷ Obuli mundu oyũkasyatũla okwʼĩswĩ yabo asyahigulwa; nʼomugulu omusasi wabo akatsatsangawa oko lukimba lwahi, wasyerya owatsatsangawa omo mwanya wʼahabũyĩrĩre.

²⁸ Nikwa enyunga yʼeribumba eyiryatsumbawamo iyatulwa; kandi bwamahũkwa omo nyungu yʼomulinga, yasyakurutwa, nʼerĩlabyayo omo magetsi.

²⁹ Obuli mulume omo katĩkatĩ kʼabahererĩ asyalya kubo; nĩ bũbũyĩrĩre kutsibu.

³⁰ Nĩkwa obuhere bwʼebibi obuwite omusasi owakaletawa omo Hema yʼerĩhĩndanamo eririha embanulo omo mwanya wʼahabũyĩrĩre isibwalibawa, bwasyahĩsĩrĩrĩbwa omo muliro.