Abalawĩ 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekihano kyʼamahere wʼebibi

¹ Neryo Omwami Mukulu mwabũga na Musa ati,

² Ubwire abandu ba Ĩsraelĩ uti, Omundu amahalya butsira eriyiririra, oko mwatsi muguma oko eyo Mwami Mukulu abirihana ati siyikolawe, akakola omuguma wa kuyo;

³ omũhererĩ oyo wabĩrĩhakabĩbwa amagũta amahalya okwʼiletera bandu olubanza, neryo aherere Omwami Mukulu busana nʼebibi biwe ebyo abirikola, enume yʼende eyite ko bulema busana nʼobuhere bwʼebibi.

⁴ Neryo asyaleta enume eyo oko lũkyo lwʼeHema yʼerĩhĩndanamo embere syʼOmwami Mukulu; neryo asahĩra ebyala biwe oko mutwe wʼenume eyo, nʼerĩĩtĩra enume eyo embere syʼOmwami Mukulu.

⁵ Nʼomũhererĩ oyo wabĩrĩhakabĩbwa amagũta asyĩmya oko musasi wʼenume eyo, nʼeriretago omo Hema yʼerĩhĩndanamo;

⁶ nʼomũhererĩ asyakolya omunwe wuwe omo musasi, nʼeritsatsanga omusasi engendo sirinda embere syʼOmwami Mukulu, embere wʼolukimba olũkasũkũlĩraya ahabũyĩrĩre.

⁷ Nʼomũhererĩ asyahĩra omusasi gʼoko mahembe wʼekiherero kyʼobukwa obũsĩhĩre embere syʼOmwami Mukulu, ekiri omo Hema yʼerĩhĩndanamo; nʼomusasi gosĩ wʼenume eyo asyũtago oko ndĩna yʼekiherero kyʼobuhere bwʼerĩokererya, ekiri oko lũkyo lwʼeHema yʼerĩhĩndanamo;

⁸ nʼebĩsabũ byosĩ byʼenume eyo yʼobuhere bwʼebibi asyalũsya byoko; nʼebĩsabũ ebĩswĩkĩre ebila byʼomo nda nʼebĩsabũ byosĩ ebyo ebiri endata oko bila byʼomo nda,

⁹ kandi asyalũsyamo esyombĩko ĩbĩrĩ, nʼebĩsabũ ebiri kusyo, ebiri hakũhĩ nʼembindi, nʼendulu eyiri oko bulepe, haguma nʼesyombĩko,

¹⁰ ngoko bĩkalũsĩbawa omo nde yʼerihera yʼamahere gʼobuholo; nʼomũhererĩ asyokereryabyo omo mũkĩ oko kiherero kyʼobuhere bwʼerĩokererya.

¹¹ Nĩkwa ekihu kyʼenume eyo, nʼesĩswĩ syayo syosĩ haguma nʼomutwe wayo, nʼemihimbi yayo, nʼebila byayo, nʼebise byayo,

¹² ebyosĩ byʼenume eyo asyaletabyo ekyaswa kyʼekilaliriro, aherĩre, aho erĩbũ lĩkũtawa, nʼerĩhĩsĩrĩryabyo endata oko ngwĩ omo muliro, byasyahĩsĩrĩrĩbwa aho erĩbũ lĩkũtawa.

¹³ Kandi endeko yosĩ ya Ĩsraelĩ yamahalya, nʼomwatsi oyo amabĩsama omo meso wʼendeko, kandi ibabirikola oko myatsi eyo Mwami Mukulu abirihana ati siyikolawe, ibali kʼolubanza;

¹⁴ omugulu ekibi ekyo babirikola kyamaminyikala, endeko yasyahera enume yʼende busana nʼobuhere bwʼebibi nʼeriretayo embere wʼeHema yʼerĩhĩndanamo.

¹⁵ Neryo abakulu bʼendeko basyahĩra ebyala byabo oko mutwe wʼenume eyo embere syʼOmwami Mukulu; nʼenume eyo yasyakererwa embere syʼOmwami Mukulu.

¹⁶ Nʼomũhererĩ oyo wahakabĩbawa magũta asyaleta oko musasi wʼenume eyo omo Hema yʼerĩhĩndanamo:

¹⁷ nʼomũherererĩ asyakolya omunwe wuwe gʼomo musasi, nʼeritsatsangago engendo sirinda embere syʼOmwami Mukulu, embere syʼolukimba olũkasũkũlĩraya.

¹⁸ Kandi omũhererĩ asyahĩra omusasi gʼoko mahembe wʼekiherero ekiri embere syʼOmwami Mukulu, ekiri omwisi wʼeHema yʼerĩhĩndanamo; nʼomusasi gosĩ asyũtago omo ndĩna yʼekiherero kyʼobuhere bwʼerĩokererya ekiri oko lũkyo lwʼeHema yʼerĩhĩndanamo.

¹⁹ Kandi asyalũsyaho ebĩsabũ byosĩ byayo, nʼerĩhĩsĩrĩryabyo omo mũkĩ oko kiherero.

²⁰ Kwʼasyakola atya nʼenume; ngoko akola nʼenume yʼobuhere bwʼebibi, kwʼasyakola ekĩ kyʼatya. Nʼomũhererĩ asyabanirabo embanulo, nabo basyabuyirwa.

²¹ Kandi asyahekera enume eyo yʼekyaswa kyʼekilaliriro, nʼerĩhĩsĩrĩryayo ngoko ahĩsĩrĩraya enume yʼerĩmbere; ni buhere bwʼekibi busana nʼendeko.

²² Omugulu omũsondolĩ akahalaya, atalyayiririra erikola mwatsi muguma gʼoko ebyo Mwami Mukulu Nyamuhanga wuwe ahana eritindakola, iniali kʼolubanza;

²³ ekibi kiwe, ekyo abirikola amamĩnyĩsĩbwakyo asyaleta embene busana nʼobuhere buwe, embaya eyite ko bulema.

²⁴ Neryo asyahĩra ebyala biwe oko mutwe wʼembene, nʼerikererayo aho bakakerera obuhere bwʼerĩokererya embere syʼOmwami Mukulu; ni buhere bwʼebibi.

²⁵ Nʼomũhererĩ asyĩmya oko musasi wʼobuhere obo bwʼebibi omo munwe wuwe, nʼerĩhĩrago oko mahembe wʼekiherero kyʼobuhere bwʼerĩokererya; kandi asyũta omusasi wayo gʼomo ndĩna yʼekiherero kyʼobuhere bwʼerĩokererya.

²⁶ Kandi asyahĩsĩrya ebĩsabũ byayo byosĩ oko kiherero, ngʼebĩsabũ byʼehongo yʼamabere wʼobuholo; nʼomũhererĩ asyamũsanganĩa omo mbanulo busana nʼebibi biwe, naye iniabuyirwa.

²⁷ Kandi omuguma gʼoko bandu bʼekihugo amahalya butsira eriyiririra, akakola oko myatsi eyo Mwami Mukulu abirihana ati siyikolawe, naye iniali kʼolubanza;

²⁸ ekibi kiwe ekyo abirikola, amamĩnyĩsĩbwakyo, neryo asyaleta embene yʼobũkalĩ busana nʼobuhere buwe, eyite ko bulema, busana nʼebibi biwe alyakola.

²⁹ Neryo asyahĩra ebyala biwe oko mutwe wʼobuhere bwʼebibi nʼerikera obuhere bwʼebibi aho bakakerera obuhere bwʼerĩokererya.

³⁰ Nʼomũhererĩ asyĩmya oko musasi wayo omo munwe wuwe, nʼerĩhĩrago oko mahembe wʼekiherero kyʼobuhere bwʼerĩokererya; kandi asyũta omusasi wayo gosĩ omo ndĩna yʼekiherero.

³¹ Kandi asyalũsyaho ebĩsabũ byayo byosĩ ngoko bĩsabũ byalũsĩbawaho oko hongo yʼamahere wʼobuholo; nʼomũhererĩ asyahĩsĩrĩryabyo oko kiherero busana nʼekikumbo kĩsĩhĩre busana nʼOmwami Mukulu; nʼomũhererĩ asyamũsanganĩa omo mbanulo busana naye, naye asyabuyirwa.

³² Nʼakandi amaleta ekyana kyʼembũlĩ ngʼobuhere buwe busana nʼobuhere bwʼebibi, asyaleta etsugutsi eyite ko bulema.

³³ Kandi asyahĩra ebyala biwe oko mutwe wʼobuhere bwʼebibi, nʼerikerayo busana nʼobuhere bwʼebibi aho bakakerera obuhere bwʼerĩokererya.

³⁴ Nʼomũhererĩ asyĩmya oko musasi wʼobuhere bwʼebibi omo munwe wuwe nʼerĩhĩrago oko mahembe wʼekiherero kyʼobuhere bwʼerĩokererya; kandi asyũta omusasi wayo gosĩ omo ndĩna yʼekiherero.

³⁵ Kandi asyalũsyaho ebĩsabũ byayo byosĩ ngʼebĩsabũ byʼekyana kyʼembũlĩ ebĩkalũsĩbawa omwʼĩsĩnza lyʼamahere wʼobuholo; nʼomũhererĩ asyahĩsĩryabyo omo mũkĩ oko kiherero ngʼamahere wʼOmwami Mukulu awalĩokĩbawa oko muliro. Nʼomũhererĩ asyamũsanganĩa omo mbanulo ngʼebibi biwe abirikola, naye asyabuyirwa.