Abalawĩ 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Obuhere bʼobuholo

¹ Neryo obuhere obo bwamabya ini buhere bʼobuholo; bwamabya ini bwʼende, enume kutse eyʼobũkalĩ, asyahera eyite ko bulema embere syʼOmwami Mukulu.

² Kandi asyahĩra ebyala biwe oko mutwe wʼobuhere buwe, nʼerĩĩtĩrayo oko lũkyo lwʼeHema yʼerĩhĩndanamo; nʼabahererĩ, abagala ba Harũnĩ basyatsatsanga omusasi oko kiherero erĩtĩmbyago ehosĩ.

³ Kandi oko buhere bwʼobuholo asyaleta obuhere obukayirawa omo muliro busana nʼOmwami Mukulu; ebĩsabũ ebĩswĩkĩre ebila byʼomo nda, nʼebĩsabũ byosĩ ebiri endata oko bila

⁴ nʼesyombĩko ĩbĩrĩ, nʼebĩsabũ ebiri kusyo, ebiri hakũhĩ nʼembindi, nʼendulu eyiri oko bulepe haguma nʼesyombĩko, asyalũsya byomo.

⁵ Nʼabagala ba Harũni basyahĩsĩryabo oko kiherero oko buhere bwʼerĩokererya, obuli oko ngwĩ esiri oko muliro; ni buhere bulyayirawa omo muliro, bwʼekikumbo ekĩsĩhĩre busana nʼOmwami Mukulu.

⁶ Kandi obuhere buwe busana nʼerihera amahere wʼobuholo busana nʼOmwami Mukulu bwamabya bwʼekĩhyo kyʼesyombũlĩ; embangale, kutse eyʼobũkalĩ, asyahera eyite ko bulema.

⁷ Akahera ekyana kyʼembũlĩ busana nʼobuhere buwe, asyaherakyo embere syʼOmwami Mukulu;

⁸ naye asyahĩra ebyala biwe oko mutwe wʼobuhere buwe nʼerĩĩtĩrayo embere syʼeHema yʼerĩhĩndanamo; nʼabagala ba Harũnĩ basyatsatsanga omusasi wayo oko kiherero erĩtĩmbyago ehosĩ.

⁹ Kandi asyahera eyʼeriherera lyʼamahere wʼobuholo, asyaleta ngʼobuhere obũkokĩbawa oko muliro busana nʼOmwami Mukulu, asyaleta ebĩsabũ byayo, nʼomukira wʼebĩsabũ erĩlũsyago hakũhĩ nʼerĩkũha lyʼomugongo; nʼebĩsabũ ebĩswĩkĩre ebyʼomo nda, nʼebĩsabũ byosĩ ebiri endata oko bila byʼomo nda.

¹⁰ Kandi esyombĩko ĩbĩrĩ, nʼebĩsabũ ebiri kusyo, ebiri hakũhĩ nʼembindi, nʼendulu eyiri oko bulepe, asyalũsya yomo haguma nʼesyombĩko.

¹¹ Nʼomũhererĩ asyokereryabyo oko kiherero; ni kalyo kʼobuhere obukayirawa omo muliro busana nʼOmwami Mukulu.

¹² Kandi obuhere buwe bwamabya ini bwʼembene asyahererayo embere syʼOmwami Mukulu.

¹³ Neryo asyahĩra ebyala biwe oko mutwe wayo nʼerikererayo embere syʼeHema yʼerĩhĩndanamo; nʼabagala ba Harũnĩ basyatsatsanga omusasi wayo oko kiherero erĩtĩmbyago ehosĩ.

¹⁴ Neryo asyaleta kuyo obuhere buwe, ngʼobuhere obũkokĩbawa oko muliro busana nʼOmwami Mukulu; ebĩsabũ ebikaswika ebila byʼomo nda, nʼebĩsabũ byosĩ ebiri endata oko bila omo nda,

¹⁵ asyalũsyamo esyombĩko ĩbĩrĩ, nʼebĩsabũ biri kusyo, ebiri hakũhĩ nʼembindi, nʼendulu yʼoko bulepe, haguma nʼesyombĩko.

¹⁶ Nʼomũhererĩ asyokereryabyo oko kiherero; ni kalyo kʼobuhere obũkokĩbawa oko muliro busana nʼekikumbo kĩsĩhĩre; ebĩsabũ byosĩ ni byʼOmwami Mukulu.

¹⁷ Ekĩ kyasyabya mugambo owatehwaho omo katĩkatĩ kʼesyondengo syenyũ syosĩ omo manyũmba wenyũ gosĩ, ati Simusyerya ekĩsabũ kutse omusasi.