Abalawĩ 27 - AMASAKO ABOYTRTRE WA NYAMUHANGA AWAKAHULAWA MO BIBLIA

Enzwere yʼeĩlahĩrya

¹ Kandi Omwami Mukulu mwabũga na Musa ati,

² Ũbũge nʼabana ba Ĩsraelĩ, ubwirebo uti, Omugulu omundu asyalahĩrya ekĩkalĩre basyabya busana nʼOmwami Mukulu ngoko wabirimuganzira omo nzwere yʼabandu.

³ Nʼeriganza enzwere yawe lyasyabya busana nʼomulume wʼemyaka makũmĩ abiri erĩhĩka oko myaka makũmĩ ndatu, erĩtwa enzwere yawe lyasyabya esyosekelĩ makũmĩ atanu syʼebĩtsĩpa ngʼesekelĩ yʼahabũyĩrĩre.

⁴ Amabya ĩnĩ mũkalĩ, neryo erĩtwa enzwere yawe lyasyabya esyosekelĩ makũmĩ asatu.

⁵ Kandi amabya wʼemyaka ĩtanu erĩhĩka oko myaka makũmĩ abiri, neryo erĩtwa enzwere yawe lyasyabya oko mulume esyosekelĩ makũmĩ abiri, nʼoko mũkalĩ esyosekelĩ ĩkũmĩ.

⁶ Kandi amabya wʼomukera muguma erĩhĩka oko myaka ĩtanu, neryo erĩtwa enzwere yawe lyasyabya esyosekelĩ ĩtanu syʼebĩtsĩpa oko mulume, kandi busana nʼomũkalĩ erĩtwa enzwere yawe lyasyabya esyosekelĩ ĩsatu syʼebĩtsĩpa.

⁷ Kandi amabya wʼemyaka makũmĩ ndatu na kwilaba aho; amabya mulume, erĩtwa enzwere yawe lyasyabya esyosekelĩ ĩkũmĩ nʼĩtanu, na busana nʼomũkalĩ esyosekelĩ ĩkũmĩ.

⁸ Nĩkwa amabya mwera kwilaba enzwere yawe, neryo wasyamũhĩra embere syʼomũhererĩ, nʼomũhererĩ asyamũhĩra kwʼenzwere: ngʼobũtokĩ bʼoyo walahĩraya ko buli.

⁹ Kandi yamabya ini nyama eyo bakaha Omwami Mukulu mo buhere, esyosĩ syʼomuhanda oyo esyo mundu akaletera Omwami Mukulu syasyabya sĩbũyĩrĩre.

¹⁰ Siendisyabindulayo, kutse erĩhĩnganĩayo, eyowene busana nʼenyibi, kutse enyibi busana nʼeyowene; kandi amahĩnganĩa enyama busana nʼenyama, neryo iye nʼeyahĩnganĩbawa nayo, esyosĩ ĩbĩrĩ syasyabya sĩbũyĩrĩre.

¹¹ Kandi, yamabya nyamakĩ eyĩtowene, oko syo muteherera Omwami Mukulu mo buhere, asyahĩra enyama eyo embere syʼomũhererĩ.

¹² Neryo omũhererĩ asyahĩra enzwere kuyo yamabya yowene kutse nyibi; ngoko mũhererĩ akatswerayo, ko yasyabya itya.

¹³ Nĩkwa amasonda erĩtongolyayo kwenene, asyatomeka muyo mwʼekihande kiguma kyʼomo bitanu byayo oko nzwere yawe.

¹⁴ Neryo mugulu omundu asyahigula enyũmba yiwe eribya ĩbũyĩrĩre oko Mwami Mukulu, omũhererĩ asyahĩra enzwere kuyo, yamabya yowene kutse nyibi; ngoko mũhererĩ asyatswerayo, ko yasyabya itya.

¹⁵ Nʼoyo wahigulayo amanza erĩtongolya enyũmba yiwe, asyatomeka kuyo erĩgabo liguma lyʼomo bitanu lyʼesyofranka lyʼenzwere yawe, nayo yasyabya yiwe.

¹⁶ Nʼomundu oyo Wasyahigulira Omwami Mukulu oluhande lwʼeririma lyʼobũsokĩ buwe, neryo erĩtwa enzwere yawe lyasyabya ngʼembuto yalyo; embuto yʼehomerĩ yʼekisusu yasyaganzirwa esyosekelĩ makũmĩ atanu syʼekĩtsĩpa.

¹⁷ Amahigula eririma liwe erĩtsũka oko mwaka wʼeYũbĩle, nʼerĩtwa enzwere yawe ko lyasyahangana litya.

¹⁸ Nĩkwa amahigula eririma liwe enyũma wʼeYũbĩle, omũhererĩ asyamuganzira esyofranka ngʼemyaka eyĩkĩsĩya erĩhĩka oko mwaka wʼeYũbĩle; erĩtwa enzwere yawe lyasyakehĩbwa.

¹⁹ Kandi oyo wahigula eririma amanza erĩtongolyalyo, asyatomeka kulyo kwʼekihande kiguma kyʼomo bitanu kyʼesyofranka syʼenzwere yawe, neryo lyasyabya liwe kũndũ.

²⁰ Kandi atanzĩre erĩtongolya eririma eryo, kutse amabya abĩrĩgũlyalyo oko gundi mundu, siryendisyaswatongolĩbwa.

²¹ Nĩkwa eririma eryo, omugulu likahuluka oko Yũbĩle, lyasyabya lĩbũyĩrĩre oko Mwami Mukulu ngʼeririma lĩbũyĩrĩre lyasyabya obũsokĩ bwʼomũhererĩ.

²² Kandi, amahigulira Omwami Mukulu eririma eryo agula, isi ririma lyʼobũsokĩ buwe;

²³ omũhererĩ asyamuganzira enzwere yiwe erĩhĩka oko mwaka wʼeYũbĩle; naye asyaha enzwere yawe oko kiro ekyo, ngʼekindu kĩbũyĩrĩre oko Mwami Mukulu.

²⁴ Nʼoko mwaka wʼeYũbĩle eririma eryo lyasyabya oko yo wagulalyo, yo nʼomũsokĩ wʼekitaka ekyo.

²⁵ Nʼerĩtwa esyonzwere syawe syosĩ syasyabya ngʼolulengo lwʼesekelĩ yʼahabũyĩrĩre; esyogera makũmĩ abiri syasyabya sekelĩ nguma.

²⁶ Akambere kasa omo katĩkatĩ kʼesyonyama, akakayirawa mo kambere oko Mwami Mukulu, sihali mundu oyo wasyahigulako; kutse kamabya kʼenume yʼende kutse embũlĩ ni kʼOmwami Mukulu.

²⁷ Kandi kamabya kʼenyama eyĩterĩre, asyatongolyako ngʼenzwere yawe, kandi asyatomeka kuyo kwʼekihande kiguma kyʼebitanu; kutse kamatendĩsyatongolĩbwa, kasyagũlĩbwa, ngʼenzwere yawe.

²⁸ Nĩkwa, sihali kindu ekĩhĩwĩre, ekyo mundu akasyahigulira Omwami Mukulu oko byosĩ awite, amabya ini mundu kutse enyama, kutse eririma lyʼobũsokĩ buwe, sĩkyendĩsyagũlĩbwa kutse erĩtongolĩbwa. Obuli kindu kĩhĩwĩre kĩbũyĩrĩre kutsibu oko Mwami Mukulu.

²⁹ Sihali mundu omo bandu oyo wabirihigulwa eritswerwa lubi oyo wasyaswatongolĩbwa; kwenene asyĩtwa.

³⁰ Nʼekihande kiguma kyosĩ kyʼomwʼĩkũmĩ kyʼekitaka, kyamabya ini mbuto yʼekitaka, kutse ebĩgũma byʼomuti, ni byʼOmwami Mukulu, nĩ bĩbũyĩrĩre oko Mwami Mukulu.

³¹ Kandi omundu amasonda erĩtongolya kyahi kyʼekiguma kyʼomwʼĩkũmĩ kiwe, asyatomeka kukyo kwʼekihande kiguma kyʼomo bitanu kyakyo.

³² Nʼekiguma kyʼomwʼĩkũmĩ kyosĩ kyʼende kutse ekyʼesyombũlĩ, ekĩndũkĩ ekikalaba omwisi wʼomũtso wʼeriganza, ekiguma kyʼomwʼĩkũmĩ kyasyabya kĩbũyĩrĩre oko Mwami Mukulu.

³³ Sĩendĩsyalebya nga yĩnowene kutse nga ni nyibi, kutse siendisyahĩnganĩayo; kandi amahĩnganĩayo, neryo esĩbĩrĩ syosĩ, eyĩ nʼeyahĩnganĩbawa byasyabya bĩbũyĩrĩre. Sĩkyendĩsyatongolĩbwa.

³⁴ Ebĩ ni bihano ebyo Mwami Mukulu ahana Musa busana nʼabana ba Ĩsraelĩ omo kitwa kyʼeSĩnaĩ.