Abalawĩ 26 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũyĩsa wʼabakowa

¹ Simuyikolere esyosanamu, kutse sĩmũyĩhanganĩraye omuhimba owabatsĩrwe, kutse endũyĩ, kutse sĩmũsyehĩra erĩbwe erĩtĩka-tĩkĩrye omo kihugo kyenyũ, erĩũnamiralyo; kusangwa indi Mwami Mukulu Nyamuhanga wenyũ.

² Mwasyateya esyo Sabato syage, nʼerikenga ahʼerĩĩkala habũyĩrĩre hage; ĩngye indi Mwami Mukulu.

³ Mwamalendera omo migambo yage, nʼerĩteya ebihano byage, nʼerikolabyo;

⁴ neryo nasyabaha embũla oko birimo byayo, nʼekitaka kyasyalasya emĩlasĩrya yakyo, nʼemiti yʼomwʼirima yasyabuta ebĩgũma byayo.

⁵ Nʼerĩhũmba lyenyũ lyasyahĩka oko mugulu wʼerigesa ebĩnyũ, nʼerioha lyʼebĩnyũ lyasyahĩka oko mugulu wʼeribiba; nenyũ mwasyalya akalyo kenyũ nʼerĩũgũta, nʼerĩĩkala omo kihugo kyenyũ nʼobuholo.

⁶ Nage nasyabaha Obuholo omo kihugo, nenyũ mwasyalambama erigotsera, isihali oyo wasyabatĩtĩmanĩa. Kandi nasyaleka esyonyama nyibi ĩsyũmbya omo kihugo, kutse omũyalĩ siendisyalaba omo kihugo kyenyũ.

⁷ Nenyũ mwasyahiga esyonzĩgũ syenyũ, nabo basyawa embere syenyũ omo mũyalĩ.

⁸ Nʼabandu batanu ba kwĩnywe basyahiga erĩgana (100), nʼerĩgana lyʼũkwʼĩnywe basyahiga elfu ĩkũmĩ (10,000); nʼesyonzĩgũ syenyũ basyawa embere syenyũ omo mũyalĩ.

⁹ Nage nasyabasĩkya nasyabaha ebĩgũma, nʼerĩbakanyĩrĩrya, nʼerĩhanganĩa endagano yage haguma nenyũ.

¹⁰ Kandi mwasyalya esyonyamukuru esyabikawa kera, nenyũ mwasyahũlũkya ebya kera busana eʼbihyabihya.

¹¹ Kandi nasyayira ahʼerĩĩkala hage omo katĩkatĩ kenyũ, nʼomutima wage siendisyabagana.

¹² Nasyalendera omo katĩkatĩ kenyũ nʼeribya Nyamuhanga wenyũ, nenyũ mwasyabya bandu bage.

¹³ Ĩngye indi Mwami Mukulu Nyamuhanga wenyũ, oyo wabalũsaya omo kihugo kyʼeMĩsĩrĩ, isimwabya bakobe babo; kandi nabĩrĩbũnanga emiti yʼengomo yʼobukobe bwenyũ, nʼerireka imwalendera ĩmũnayĩsĩngĩkĩre.

Erisuyira busana nʼerĩtĩndĩowa

¹⁴ Nĩkwa mwamatĩndanyowa, nʼeritindakola ebihano byosĩ ebĩ;

¹⁵ kandi mwamagana emigambo yage, nʼebĩrĩmũ byenyũ bĩkakwa ebilayiro byage byʼesyonye, muti, simwekola ebihano byage byosĩ, nĩkwa mũkatwa endagano yage;

¹⁶ nage, nasyabakolera ekĩ nibya; nyiti nasyabahĩra kwʼerĩũbahĩrĩrya lũba-lũba, nʼendwala yʼekĩkũba nʼekĩhũhanĩ, ebikandisyabuga ameso wenyũ, nʼerireka ebĩrimu byenyũ ibyabulirayo; kandi mwasyabiba esyombuto syenyũ syo busa, kusangwa esyonzĩgũ syenyũ syasyalyasyo.

¹⁷ Nasyabahĩnĩra, nenyũ mwasyĩtwa embere wʼesyonzĩgũ syenyũ; nʼabakabakwa obusu basyabatabalako; kandi mwasyatibita omugulu hate mundu oyukabatibitako.

¹⁸ Kandi mwamatĩndĩowa busana nʼemyatsi eyĩ, nasyaswabasuyira ngendo sirinda busana nʼebibi byenyũ.

¹⁹ Nasyatwa eriyiheka lyʼamaka wenyũ; nasyayira olubula lwenyũ mo kyuma, nʼekihugo kyenyũ ngʼomulinga.

²⁰ Nʼamaka wenyũ asyakwa busa; kusangwa ekitaka kyenyũ sĩkyendĩsyalasya emĩlasĩrya yakyo, kutse emiti sĩyendĩsyahetya ebĩgũma byayo.

²¹ Kandi mwamalendera hali kwĩngye, ĩsĩmwanzĩre erĩnyowa, nasyabaletera ebĩhũnzo kandi ngendo sirinda ngʼebibi byenyũ.

²² Kandi nasyatuma omo katĩkatĩ kenyũ esyonyama syʼomolĩ, esĩkandĩsyabahũnga kwʼabana benyũ, nʼerĩherya esyonde syenyũ, nʼerĩkehya emiganzo yenyũ; nʼesyonzira syenyũ syasyabya bĩhũma.

²³ Neryo busana nʼemyatsi eyĩ mwamatindanyibindukako, nĩkwa mukalendera hali kwĩngye;

²⁴ nage nasyalwa nenyũ; kandi nĩna ngye nasyabaswĩrya ngendo sirinda busana nʼebibi byenyũ.

²⁵ Nage nasyabaletera omũyalĩ owakakola erĩkĩsya lyʼendagano; kandi omugulu mũkasyahĩndana omo mĩyĩ yenyũ; nasyatuma obũkonĩ bwʼakasũsũ omo katĩkatĩ kenyũ; nenyũ mwasyahĩrwa omo byala byʼenzĩgũ.

²⁶ Omugulu nasyakehya obundu bwenyũ, abakalĩ ĩkũmĩ basyokya obundu bwenyũ oko luyo luguma, kandi basyaswabaha obundu bwenyũ mo lulengo luke-luke nenyũ mwasyalya, nĩkwa sĩmwendĩsyũgũta.

²⁷ Kandi mwamatĩndanyowa busana nʼebyosĩ ebĩ, imukalendera hali kwĩngye;

²⁸ nage nasyalendera bwage omwʼihitana erilwa nenyũ; kandi nage nasyabasuyira ngendo sirinda busana nʼebibi byenyũ.

²⁹ Kandi, mwasyalya esĩswĩ syʼabagala benyũ, nʼesĩswĩ syʼabali benyũ.

³⁰ Nasyaherya emyanya yenyũ yʼendata, nʼerikondera ahisi ebiherero byenyũ byʼobukwa, nʼerigusa ebĩnda byenyũ oko bĩnda byʼesyosanamu syenyũ; nʼomutima wage asyabakwa nye.

³¹ Kandi nasyayira emĩyĩ yenyũ mo bĩma, nʼahabũyĩrĩre henyũ nasyatsandyaho, kandi sindiendisyakumbirwa oko bumba bwʼekikumbo kĩsĩhĩre kyenyũ.

³² Kandi nasyayira ekihugo mo mulala; nʼesyonzĩgũ syenyũ esĩkere mukyo syasyasweka busana nakyo.

³³ Nĩkwa, Ĩnywe, nasyabapanza-panzira omo bihanda, kandi nasyabakulira omũyalĩ; nʼekihugo kyenyũ kyasyabya mulala, nʼemĩyĩ yenyũ yasyasinduka.

³⁴ Neryo ekitaka kyasyatsema omo syoSabato syakyo omugulu gosĩ kikabya omũsĩndo wʼomulala, nenyũ imuli omo byala byʼesyonzĩgu syenyũ; oko mugulu oyo ekitaka kyasyaluhuka, nʼeritsemera esyo Sabato syakyo.

³⁵ Omugulu gosĩ kiri mulala kyasyaluhuka, eriluhuka eryo kitabana omo syoSabato syenyũ, omugulu mwabya mwĩkere kukyo.

³⁶ Neryo abandu abasyasĩgalira ũkwʼĩnywe, nasyũbahya emitima yabo omo bihugo byʼesyonzĩgũ syabo. Nʼomulenge wʼekikoma kikaguluka asyahigabo isihali oyukakwamabo; nabo basyatibita ngʼoyukasaga omũyalĩ kandi basyawa.

³⁷ Kandi basyatwĩkalanako, ngʼabandu abakasaga omũyalĩ, ahate oyukakwamabo; kandi isimwendisyabya nʼamaka erihangana embere wʼesyonzĩgũ syenyũ.

³⁸ Kandi mwasyaherera omo katĩkatĩ kʼebihanda, nʼekihugo kyʼesyonzĩgũ syenyũ kyasyabamera.

³⁹ Nʼabakasĩgalira omo katĩkatĩ kenyũ basyahwerekerera omo bibi byabo omo bihugo byʼesyonzĩgũ syenyũ; nʼomo bibi byʼabotata wabo basyahwerekerera haguma nabo.

⁴⁰ Nabo bamakangya ebibi byabo, nʼebibi byʼabotata wabo, omwʼĩhalya lyabo eryo banyĩhalayako, kandi nibya kusangwa mobalwa nage.

⁴¹ Nage monalwa nabo, eriretabo omo kihugo kyʼesyonzĩgũ syabo; neryo emitima yabo itabwene yamayĩkehya, nabo basyaliha olubanza lwʼebibi byabo;

⁴² neryo nasyibuka endagano yage haguma na Yakobo; kandi nasyibuka nʼendagano yage haguma na Ĩsaka, kandi nʼendagano yage haguma na Abrahamũ nasyibukayo; nage nasyibuka ekihugo ekyo.

⁴³ Nabo basyasĩganĩa ekihugo, nakyo kyasyatsemera esyo Sabato syakyo, omugulu kikabya mulala bateho. Nabo, basyaliha olubanza lwʼebibi byabo, kusangwa bagana ebilayiro byage, nʼomutima wabo mwakwa emigambo yage yo nye.

⁴⁴ Nomo ebyo byangabya bitya, omugulu bali omo kihugo kyʼesyonzĩgũ syabo, sindiendisyaganabo, kutse erĩbakwa nye erĩheryabo kũndũ, erĩĩta endagano yage haguma nabo; kusangwa indi Mwami Mukulu Nyamuhanga wabo.

⁴⁵ Nĩkwa busana nabo nasyibuka endagano yʼabotata wabo, abo nalũsaya omo kihugo kyʼeMĩsĩrĩ omo meso wʼebihanda, inatoka eribya Nyamuhanga wabo. Ĩngye indi Mwami Mukulu.

⁴⁶ Eyĩ ye migambo nʼebilayiro nʼebihano ebyo Mwami Mukulu ahĩra uku Musa omo katĩkatĩ kʼabana ba Ĩsraelĩ naye, omo kitwa kyʼeSĩnaĩ.