Biblia Todo Logo
Bìoball air-loidhne

- Sanasan -

Abalawĩ 21 - AMASAKO ABOYTRTRE WA NYAMUHANGA AWAKAHULAWA MO BIBLIA


Ebihano oko bahererĩ

1 Kandi Omwami Mukulu mwabũga na Musa ati, Ubwire abahererĩ, abana ba Harũnĩ, uti, Sihabye oyũkayĩtsandaya busana nʼekĩnda omo katĩkatĩ kʼabandu buwe;

2 kyamabya kite busana nʼekĩtũnga kiwe, ekiri hakũhĩ naye, busana na nyĩnya, na tata wuwe, na busana na mugala wuwe, na busana namwali wuwe, na busana na mugala wabo,

3 na busana na mwali wabo, omumbesa oyuli hakũhĩ naye, oyũtahĩkĩbwe; anganayĩtsandya busana naye.

4 Syasyeyĩtsandaya ngʼoyũhĩkĩrye omo katĩkatĩ kʼabandu buwe, nʼerĩyĩtsandya atya.

5 Sĩbayĩhĩre ko luhala omo mutwe kutse erĩsĩsa esyonũnga syʼesyonderũ syabo, kutse eriyisakanga oko mibiri yabo.

6 Basyabya babũyĩrĩre uku Nyamuhanga wabo, nʼerĩtĩndatsandya erĩna lya Nyamuhanga wabo; kusangwa bakahera amahere oko Mwami Mukulu awakokĩbawa oko muliro, obundu bwa Nyamuhanga wabo; busana nʼekyo basyabya babũyĩrĩre.

7 Sĩbasyĩmaya omũkalĩ mũtetĩ, oyũtsandĩre; kutse ĩsĩbĩmaya omũkalĩ oyuliahigawa nʼĩba wuwe; kusangwa omũhererĩ abũyĩrĩre uku Nyamuhanga wuwe.

8 Busana nʼekyo wasyamuhigula, kusangwa akaherera akalyo ka Nyamuhanga wawe; asyabya mũbũyĩrĩre ukʼuwe; kusangwa ĩngye Mwami Mukulu, oyukabahigula, nyĩbũyĩrĩre.

9 Nʼomwali wʼomũhererĩ wahi amayĩtsandya omo luteto, akahemula tata wuwe; asyahĩsĩbwa omo muliro.

10 Nʼoyuli mũhererĩ mukulu omo katĩkatĩ kʼabagala babo, oyo gũtũlĩrawa kwʼamagũta oko mutwe, nʼoyukasololawa busana nʼeriambala esyongimba esĩ, siendisyambula omutwe wuwe, kutse eritulanga esyongimba siwe;

11 kutse siendisyasegera ahali ekĩnda, kutse erĩyĩtsandya busana nʼĩse wuwe, kutse busana na nyĩnya wuwe;

12 kutse sĩalũe ahʼerĩĩkala habũyĩrĩre, kutse erĩtsandya ahʼerĩĩkala habũyĩrĩre ha Nyamuhanga wuwe; kusangwa erihigula lyʼamagũta wʼerĩhakabya lya Nyamuhanga wuwe limuliko. Ĩngye indi Mwami Mukulu.

13 Naye asyĩmya omũkalĩ omo bumbesa buwe.

14 Ĩsyĩmaya omũkwakalĩ, kutse oyuliahigawa, kutse omũkalĩ mutya-mutya omũtetĩ, nĩkwa asyahĩkya omumbesa wʼekĩtũnga kyabo.

15 Ĩsĩatsandaya abana buwe omo kĩtũnga kiwe; kusangwa ĩngye indi Mwami Mukulu oyukamusolola.


Sihabye ebirema oko bahererĩ

16 Neryo Omwami Mukulu mwabũga na Musa ati,

17 Ubwire Harũnĩ, uti, Sihabye omundu wʼoko bana bawe omo syondengo syabo syosĩ oyuli kʼobulema, kandi sĩahĩke hakũhĩ eriherera akalyo ka Nyamuhanga wuwe.

18 Kusangwa omundu oyuli nʼobulema sĩahĩke hakũhĩ; endĩmatĩme, kutse oyukahinira, kutse oyuwite obũsũ obuli kʼobulema, kutse ekĩtsũko ekiri kʼobulema,

19 kutse omundu ũtwĩkĩre ko kisando, kutse ebyala bĩbũnĩkĩre,

20 kutse wʼomugongo akondomĩre, kutse omũkũhĩ, kutse owʼerĩsongo, kutse wʼobuhere, kutse omunyora, kutse oyũbũnĩkĩre kwʼemihege.

21 Sihabye omundu wʼabana ba Harũnĩ omũhererĩ, oyuwite obulema oyũkahĩka hakũhĩ nʼeriherera amahere awakokĩbawa oko muliro wʼOmwami Mukulu; kusangwa awite obulema, ĩsĩahĩka hakũhĩ eriherera akalyo ka Nyamuhanga wuwe.

22 Anganalya akalyo ka Nyamuhanga wuwe, oko kabũyĩrĩre kutsibu, nʼoko kabũyĩrĩre.

23 Nĩkwa isyingira enyũma wʼolukimba olũkasũkũlĩraya, kutse erĩhĩka hakũhĩ nʼekiherero, kusangwa alehemĩre; akasyatsandya ahabũyĩrĩre hage. Kusangwa indi Mwami Mukulu oyukahigulabo.

24 Neryo Musa mwabũga atya na Harũnĩ, nʼoko bagala buwe, nʼoko bandu bosĩ ba Ĩsraelĩ.

Bible in Kinandi © Bible Society of the Democratic Republic of Congo, and Bible Society of Uganda, 1980.

Bible Society of the Democratic Republic of Congo
Lean sinn:



Sanasan