Abalawĩ 19 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebikakagawa erikolwa

¹ Neryo Omwami Mukulu mwabũga na Musa ati,

² Ũbũge nʼendeko yosĩ yʼabana ba Ĩsraelĩ, ubwirebo uti, Mwasyabya babũyĩrĩre; kusangwa ĩngye Mwami Mukulu Nyamuhanga wenyũ nyĩbũyĩrĩre.

³ Obuli mundu asyakenga nyĩnya wuwe nʼĩse wuwe; mwasyateya esyo Sabato syage; Ĩngye indi Mwami Mukulu Nyamuhanga wenyũ.

⁴ Simubindukire esisumba, kutse erĩyĩkokoterya esyonyamuhanga esĩnũnĩrye; Ĩngye indi Mwami Mukulu Nyamuhanga wenyũ.

⁵ Kandi omugulu mukahera ehongo yʼamahere wʼobuholo oko Mwami Mukulu, mwasyaherayo imwatoka erĩrĩgwa.

⁶ Yasyalibwa ekiro ekyo mukaherayo, kutse nʼengyakya, neryo yamasakako oko kiro kyʼakasatu, yasyahĩsĩbwa omo muliro.

⁷ Neryo yamalibwa ko kake oko kiro kyʼakasatu; ni mwaga sĩyendĩsyalĩgwa.

⁸ Nĩkwa obuli mundu oyukalyayo asyaheka ebibi biwe, kusangwa abĩrĩtsandya ekindu kĩbũyĩrĩre kyʼOmwami Mukulu; nʼomundu oyo asyahigwa omo bandu buwe.

⁹ Nʼomugulu mukagesa obugese bwʼekitaka kyenyũ, sũsyegesa esyongonde syʼeririma lyawe, kutse susyekumakuma emĩsĩgalira yʼerigesa lyawe.

¹⁰ Kandi susyoha emĩsĩgalira yʼeririma lyawe lyʼebĩnyũ; wasyasĩgayo busana nʼabera na busana nʼomubunga. Ĩngye indi Mwami Mukulu Nyamuhanga wenyũ.

¹¹ Ĩsĩmwĩba; kutse ĩsĩmwatebaya, kutse eribihirana.

¹² Sĩmũsyelahĩraya omo lĩna lyage nʼamabehĩ, nʼerisunata erĩna lya Nyamuhanga wawe; Ĩngye indi Mwami Mukulu.

¹³ Sũsyenũbaya mũlĩkyenyũ, kutse erimunyega; sũsĩgale nʼebihembo byʼomũhĩngĩ erĩhĩka omo ngyakya.

¹⁴ Susyetakira omutsiha, kutse erĩhĩra endwĩkale embere syʼendĩmatĩme; nĩkwa wasyubaha Nyamuhanga wawe; Ĩngye indi Mwami Mukulu.

¹⁵ Susyekola ebitatunganene omwʼitswera. Susyesombola mundu mwera, kutse erĩsĩkya omundu wʼamaka; nĩkwa wasyatswera mũlĩkyenyũ omo litunganene.

¹⁶ Susyegenda-genda eyĩ nʼeyĩ omo katĩkatĩ kʼabandu bawe ngʼomũtsongerĩ; kutse susyehangana okwʼĩtĩsya omusasi wa mũlĩkyenyũ. Ĩngye indi Mwami Mukulu.

¹⁷ Sũsyekwa mugala wenyũ yʼobusu omo mutima wawe; wasyakunga mũlĩkyenyũ kwenene, kandi suhingane nʼebibi biwe.

¹⁸ Sũsyekĩsaya, kutse subye nʼobwĩko busana nʼabana bʼabandu bawe; wanze mũlĩkyenyũ ngoko ũyanzĩre. Ĩngye indi Mwami Mukulu.

¹⁹ Mwasyateya emigambo yage. Susyereka ebihangulo byawe bikasambwako nʼesindi nyama; susyebiba omwʼirima lyawe mwʼemihanda ĩbĩrĩ yʼesyombuto; kutse erĩambalya omubiri wawe olukimba olũlũkĩre mo mihanda ĩbĩrĩ yʼengohe.

²⁰ Nʼomundu oyukagotsera nʼomukobe wʼobũkalĩ omo buragane ĩnĩabĩrĩsĩmolĩbwa nʼogundi ĩsĩalyamũtongolya, kutse isialyahabwa obwĩranda; basyasuyirwa; sĩbendĩsyĩtwa, kusangwa siabya nʼobwĩranda.

²¹ Neryo asyaleta obuhere buwe bʼomusango oko Mwami Mukulu; oko lũkyo lwʼeHema yʼerĩhĩndanamo, embangale busana nʼobuhere bwʼolubanza.

²² Nʼomũhererĩ asyamũsanganĩa omo mbanulo nʼembangale yʼobuhere bwʼolubanza embere syʼOmwami Mukulu busana nʼekibi kiwe ekyo alyakola; nʼekibi ekyo asyabuyirwakyo.

²³ Kandi omugulu mwasyingira omo kihugo, imwamabihera emiti yʼemihanda yosĩ busana nʼakalyo, mwasyaganza ebĩgũma byayo nga sibyangalibwa; emyaka ĩsatu byasyabya butsira eriribwa busana nenyũ; sibiribaweko.

²⁴ Nĩkwa oko mwaka wʼakani ebĩgũma byosĩ byayo byasyabya bĩbuyĩrĩre, busana nʼeriha Omwami Mukulu yʼeripipa.

²⁵ Nʼoko mwaka wʼakatanu mwasyalya oko bĩgũma byayo, iyatoka eribahetera erikanya lyayo. Ĩngye indi Mwami Mukulu Nyamuhanga wenyũ.

²⁶ Simusyerya ekindu nʼekiguma haguma nʼomusasi; kutse simusyeyira obusaki, kutse erilagula.

²⁷ Sĩmũsyesĩsa esyondambi syʼemitwe yenyũ, kutse erĩtsandya esyonũnga syʼesyonderũ syenyũ.

²⁸ Simusyesakanga oko mibiri yenyũ busana nʼabaholĩ, kutse eriyisaka esyonzole nʼoluguma; ĩngye indi Mwami Mukulu.

²⁹ Sũtsandaye mwalĩ wawe, erimuyira mo mũmalaya; ekihugo kikasyawa omo luteto, nʼekihugo ĩkyũsũla nʼobubi.

³⁰ Mwasyateya esyo Sabato syage, nʼerikenga eHema yage; Ĩngye indi Mwami Mukulu.

³¹ Simubindukire abʼesyombĩnga, kutse abakũmũ; simusonda-sondayebo, mũkasyatsandĩbwa nabo. Ĩngye indi Mwami Mukulu Nyamuhanga wenyũ.

³² Uhanganire owʼomutwe wʼesyombwĩ, nʼerikenga obũsũ bʼomũsyakulu, wasyubaha Nyamuhanga wawe. Ĩngye indi Mwamĩ Mukulu.

³³ Owʼehandi amĩkala haguma nawe, susyemukola nabi.

³⁴ Owʼehandi oyukakubungira omo katĩkatĩ kenyũ abye kwĩnywe ngʼoyũbũtĩrwe eka omo katĩkatĩ kenyũ, wasyamwanza nga we; kusangwa nenyũ mwabya babunga omo kihugo kyʼeMĩsĩrĩ. Ĩngye indi Mwami Mukulu Nyamuhanga wenyũ.

³⁵ Simusyekola ebitatunganene omwʼitswera mundu, omo kĩlo kyʼekindu, kutse omo lulengo lwʼekindu.

³⁶ Mwasyabya nʼesyondengero situnganene, esyongũlĩngo esiringirirene, nʼekitiri kitunganene, nʼetsũpa eyitunganene. Ĩngye indi Mwami Mukulu Nyamuhanga wenyũ, oyo wabalũsaya omo kihugo kyʼeMĩsĩrĩ.

³⁷ Mwasyateya emigambo yage yosĩ, nʼerilayira lyage ryosĩ, nʼerikolabyo. Ĩngye indi Mwami Mukulu.