Abalawĩ 17 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekihano busana nʼerikera esyonyama

¹ Kandi Omwami Mukulu mwabũga na Musa, ati,

² Ubwire Harũnĩ, nʼabagala buwe, nʼoko bana bosĩ ba Ĩsraelĩ, ubwirebo uti, Oyũ ni mwatsi ogo Mwami Mukulu abirihana, ati,

³ Omunduni owʼekĩtũnga kya Ĩsraelĩ, oyukakera enume yʼende, kutse ekyana kyʼembũlĩ, kutse embene, omo kilaliriro, kutse akakererayo ekyaswa,

⁴ isialitaletayo oko lũkyo lwʼeHema yʼerĩhĩndanamo erihererayo ngʼobuhere oko Mwami Mukulu embere syʼeHema yʼOmwami Mukulu; olubanza lwʼomusasi lwasyaganzirwa oko mundu oyo; abĩrĩũta omusasi; omundu oyo asyahigwa oko bandu buwe.

⁵ Kyangaleka abana ba Ĩsraelĩ ibatoka erireta esyohongo syabo esyo babya bakakerera omolĩ, kandi ibatoka eriretabyo oko Mwami Mukulu, oko lũkyo lwʼeHema yʼerĩhĩndanamo, oko mũhererĩ, nʼerikerabyo busana nʼesyohongo syʼamahere wʼobuholo oko Mwami Mukulu.

⁶ Nʼomũhererĩ asyatsatsangira omusasi oko kiherero kyʼOmwami Mukulu oko lũkyo lwʼeHema yʼerĩhĩndanamo, nʼerĩokererya ebĩsabũ busana nʼekikumbo kĩsĩhĩre busana nʼOmwami Mukulu.

⁷ Neryo sibasyehonga kandi amahere wabo oko mbĩnga syʼesyombaya, esyo bakakwama omo bũsĩngĩrĩ. Oyũ ni mugambo wʼemigulu yosĩ busana nabo omo syondengo syabo.

⁸ Kandi wasyabwirabo uti, Omundu wahi oyuli wʼekĩtũnga kya Ĩsraelĩ, kutse abatasĩbwe abakabungira omo katĩkatĩ kabo, oyukahera obuhere bwʼerĩokererya kutse ehongo,

⁹ isialiretabo oko lũkyo lwʼeHema yʼerĩhĩndanamo, erikererabo Omwami Mukulu; omundu oyo asyahigwa oko bandu buwe.

Omusasi sialibawe

¹⁰ Kandi omundu wahi oyuli wʼekĩtũnga kya Ĩsraelĩ, kutse oko batasĩbwe abakabungira omo katĩkatĩ kabo oyukalya omũsĩndokĩ wʼomusasi, ngandĩsyahĩnĩa obũsũ bwage oko mundu oyukalya omusasi, nʼerimugaba oko bandu buwe.

¹¹ Kusangwa engebe yʼomubiri iri omo musasi; nage nabiribahago oko kiherero eririha embanulo yʼemitima yenyũ; kusangwa ni musasi owakaliha embanulo busana nʼengebe eyo.

¹² Kyaleka inabwira abana ba Ĩsraelĩ nyiti, Sihabye mundu ũkwʼĩnywe oyo wasyalya omusasi, kutse Sihabye oyũtasĩbwe oyukabungira omo katĩkatĩ kenyũ oyo wasyalya omusasi.

¹³ Nʼomundu wahi gʼoko bana ba Ĩsraelĩ, kutse oyũtasĩbwe omo katĩkatĩ kenyũ oyukahiga enyama akahamba enyama eyo kutse enyonyũ eyangalibwa, asyũta omusasi wayo, nʼerĩkũnĩngĩrago omo lũtũtũ.

¹⁴ Kusangwa engebe yʼomubiri gosĩ go musasi wago, kyaleka inabwira abana bosĩ ba Ĩsraelĩ, nyiti, Simusyerya omusasi wʼomũsĩndokĩ wʼenyama kusangwa engebe yʼomubiri gosĩ go musasi, nʼoyukalyago asyahigwa.

¹⁵ Nʼomundu wahi oyukalya ekĩnda ekikayiholera, kutse ekikatulangawa nʼesyonyama, kutse amabya embutirwa yʼeka, kutse omubunga, asyerya esyongimba siwe nʼeriyikosa omo magetsi, iniabya mũtsandĩrya erĩhĩka omwʼĩgolo-golo; neryo asyabya oyo werĩre.

¹⁶ Nĩkwa amatendĩeryasyo, kutse erikosa omubiri wuwe, asyaheka olubanza luwe.