Abalawĩ 13 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebihano busana nʼabahaga

¹ Neryo Omwami Mukulu mwabũga na Musa na Harũnĩ, ati,

² Omugulu omundu akakwa ekĩsũsũ oko ngoba yʼomũbĩrĩ wuwe, kutse ekĩkokyo, kutse ekĩtĩngũ kĩhenĩrye, nakyo kikahinduka mo bũkonĩ bwʼebihaga omo ngoba yʼomubiri wuwe, asyaletwa uku Harũnĩ omũhereri kutse oko muguma wʼabagala buwe abahererĩ.

³ Nʼomũhererĩ asyayĩtegererya obũkonĩ oko ngoba yʼomubiri ngʼolweya omo bũkonĩ nga lwabiribinduka mo lweru, nʼerisosa lyʼobũkonĩ nga buli omwisi kwilaba engoba yʼomubiri wuwe, nĩ bũkonĩ bwʼekihaga; nʼomũhererĩ asyayĩtegereryaye, nʼerimwahula mo mũtsandĩrya.

⁴ Kandi ekĩtĩngũ ekĩhenĩrye kyamabya kyeru omo ngoba yʼomubiri wuwe, nʼerisosa lyakyo lyamabya omwisi kwilaba engoba yʼomubiri, nʼolweya lwakyo lũtahĩndũkĩre mo lweru, neryo omũhererĩ asyakingira oyũkwĩre obũkonĩ ebiro birinda.

⁵ Nʼomũhererĩ asyayĩtegereryaye ekiro kyʼebirinda; neryo omo meso wuwe obũkonĩ bwamabya bwabĩrĩtũlera, nʼobũkonĩ isibwetatanda omo ngoba, neryo omũhererĩ asyamukingira kandi ebiro birinda.

⁶ Neryo omũhererĩ asyayĩtegereryaye kandi, ekiro kyʼebirinda; neryo, obũkonĩ bwamabya nga bubulirene, nʼobũkonĩ isibwetatanda omo ngoba, neryo omũhererĩ asyamwahula mʼoyo werĩre, nĩ kĩkokyo; neryo asyerya esyongimba siwe, iniere.

⁷ Nĩkwa ekĩkokyo kyamatanda omo ngoba, enyũma wʼerĩkangyakyo oko mũhererĩ busana nʼeriera liwe, asyahĩka kandi oko mũhererĩ.

⁸ Nʼomũhererĩ asyayĩtegererya, neryo, ekĩkokyo kyamabya kyabiritanda omo ngoba, omũhererĩ asyamwahula mo mũtsandĩrya; ni bihaga.

⁹ Omugulu obũkonĩ bwʼebihaga buli oko mundu, asyaletwa oko mũhererĩ.

¹⁰ Nʼomũhererĩ asyayĩtegererya; neryo, hamabya ekĩsũsũ kĩhenĩrye ekikayisumba omo ngoba, nakyo ikyabirihindula olweya mo lweru, ihali omũnyokũ omo kĩsũsũ kĩbĩmbĩre,

¹¹ ini bihaga bya kera omo ngoba yʼomubiri wuwe, nʼomũhererĩ asyamwahula mo mũtsandĩrya; siendisyamukingira, kusangwa nĩ mũtsandĩrya.

¹² Kandi ebihaga byamahuluka ehandi omo ngoba yiwe, nʼebihaga byamatsungana esyongoba syosĩ oko yũkwĩre obũkonĩ erĩtsũka oko mutwe nʼerĩhĩka oko bisando, aho mũhererĩ akayĩtegereraya,

¹³ neryo omũhererĩ asyayĩtegererya; neryo kwesĩ ebihaga ibyabiritsungana omubiri wuwe gosĩ, asyamwahula mʼoyo werĩre, oyo wabya nʼobũkonĩ; bwabirihinduka mo bweru-bweru ehosĩ, erĩre.

¹⁴ Nĩkwa omugulu omũnyokũ akamuhulukako, asyabya mũtsandĩrya.

¹⁵ Nʼomũhererĩ asyayĩtegererya omubiri mubisi, neryo asyamwahula mo mũtsandĩrya; omũnyokũ mubisi nĩ mũtsandĩrya, ini bihaga.

¹⁶ Kutse omubiri mubisi amasuba, iniahinduka mo mweru, neryo asyahĩka oko mũhererĩ;

¹⁷ nʼomũhererĩ asyayĩtegereryaye; neryo, obũkonĩ bwamabya ibwabirihinduka mo bweru, omũhererĩ asyahula oyo wabya nʼobũkonĩ mo mundu werĩre, abirilama.

¹⁸ Neryo omugulu omubiri akwĩre ekihute omo ngoba yago, kikabala,

¹⁹ nʼomo mwanya wʼekihute ihali ekĩsũsũ kyeru-kyeru, kutse ekĩtĩngũ kĩhenĩrye, ekĩsasũkĩre nga ngula, neryo kyasyakangĩbwa oko mũhererĩ;

²⁰ nʼomũhererĩ asyayĩtegererya; neryo, erisosa lyaho lyamabya omwisi wʼengoba, nʼolweya lwaho lwamahinduka mo lweru, neryo omũhererĩ asyamwahula mo mũtsandĩrya; nĩ bũkonĩ bwʼebihaga, bwabirihuluka mo kihute.

²¹ Nĩkwa omũhererĩ amalebyakyo neryo isihali bweya bweru-bweru mukyo, kandi isikiri omwisi wʼengoba kutsibu, nĩkwa kikasonda eribulirana; omũhererĩ asyamukingira ebiro birinda;

²² kandi kyamatanda omo ngoba, neryo omũhererĩ asyamwahula mo mũtsandĩrya, nĩ bũkonĩ.

²³ Nĩkwa akatĩngũ akahenĩrye kamĩkala omo mwanya wako isiketatanda, nĩ ngolũ yʼekihute; nʼomũhererĩ asyamwahula mʼoyo werĩre.

²⁴ Kutse omubiri amabya kwʼengolũ yʼobuhye bwʼomuliro, nʼobuhye bukabya kĩtĩngũ kĩhenĩrye, obweru bwʼengula, kutse obweru;

²⁵ neryo omũhererĩ asyayĩtegereryakyo; neryo olweya lʼomo kĩtĩngũ kĩhenĩrye lwamahinduka mo lweru, nʼerisosa lyaho likabya omwisi wʼengoba, ini kihaga, kyabirihuluka omo buhye. Neryo omũhererĩ asyamwahula mo mũtsandĩrya; nĩ bũkonĩ bwʼebihaga.

²⁶ Nĩkwa omũhererĩ amayĩtegereryakyo, neryo, isihali lweya lweru omo kĩtĩngũkĩhenĩrye, nʼakandi isikiri omwisi wʼengoba, ikikasonda eribulirana; neryo omũhererĩ asyamukingira biro birinda.

²⁷ Kandi omũhererĩ asyayĩtegereryaye ekiro kyʼebirinda; kyamatsungana ehandi omo ngoba omũhererĩ asyamwahula mo mũtsandĩrya; nĩ bũkonĩ bwʼebihaga.

²⁸ Nʼekĩtĩngũ kĩhenĩrye ekyo kyamabya omo mwanya wakyo, isikyetatanda omo ngoba, nĩkwa ikikasonda eribulirana; nĩ kĩsũsũ kyʼobuhye, nʼomũhererĩ asyamwahula mo mundu werĩre; kusangwa nĩ ngolũ yʼobuhye.

²⁹ Kandi omulume kutse omũkalĩ amakwa obũkonĩ oko mutwe kutse omo nderũ,

³⁰ neryo omũhererĩ asyalangira obũkonĩ; neryo, erisosa lyaho lyamabya omwisi mo hali omo ngoba, ihali nʼolweya luke-luke ngʼerangĩ yʼekisande, omũhererĩ asyamwahula mo mũtsandĩrya; nĩ kĩsũlĩ, ni kihaga kyʼomutwe kutse kyʼesyonderũ.

³¹ Nʼomũhererĩ amasamalira obũkonĩ bwʼekĩsũlĩ, neryo erisosa lyakyo isiri omwisi mo hali omo ngoba, isihali olweya Kĩkĩnĩre omwisi wakyo, omũhererĩ asyakingira oyũkwĩre obũkonĩ bwʼekĩsũlĩ ebiro birinda.

³² Oko kiro kyʼakalinda omũhererĩ asyayĩtegererya obũkonĩ; neryo ekĩsũlĩ kyamabya isikyetatanda, hamabya hate olweya lwʼekisande omwisi wakyo, nʼerisosa lyʼekĩsũlĩ nga siriri omwisi wʼengoba,

³³ neryo asyayĩsĩsa, nĩkwa sĩendĩsyasĩsa ekĩsũlĩ, nʼomũherererĩ asyakingira oyũkwĩre obũkonĩ ebindi biro birinda.

³⁴ Nʼomo kiro kyʼakalinda omũhererĩ asyayĩtegererya ekĩsũlĩ; neryo, ekĩsũlĩ kyamabya kitetanda omo ngoba, nʼerisosa lyakyo isiriri omwisi mo hali omo ngoba; omũhererĩ asyamwahula mʼoyo werĩre; naye asyerya esyongimba siwe, iniera.

³⁵ Nĩkwa ekĩsũlĩ kyamatanda ehandi omo ngoba enyũma wʼeriera liwe,

³⁶ omũhererĩ asyayĩtegereryaye; neryo, ekĩsũlĩ kyamatsungana omo ngoba, omũhererĩ siendisyasonda olweya lwʼerangĩ yʼekisande; ĩnĩ mũtsandĩrya.

³⁷ Nĩkwa omo meso wuwe ekĩsũlĩ kyamagasama, nʼolweya lũkĩnĩre lwamabilasamo; ekĩsũlĩ ikyabiribala, omundu oyo erĩre, nʼomũhererĩ asyamwahula mo mundu werĩre.

³⁸ Kandi omugulu omulume kutse omũkalĩ akakwa ebĩtĩngũ bĩhenĩrye omo ngoba syʼomubiri, bye bĩtĩngũ byeru-byeru bĩhenĩrye,

³⁹ omũhererĩ asyayĩtegereryaye, neryo ebĩtĩngũ ebĩhenĩrye omo ngoba yʼomubiri wabo byamabya ini byeru hake, ni buhere, bwabiributuka omo ngoba; ĩnĩerĩre.

⁴⁰ Kandi esyonzwiri syʼomundu syamalagala oko mutwe wuwe, ni wʼoluhala; nĩkwa omundu oyo ĩnĩerĩre.

⁴¹ Kandi esyonzwiri siwe syamalagala oko luhande lwʼembere lʼomutwe wuwe, iye ni wʼoluhala lwʼemitwana; nĩkwa erĩre.

⁴² Nĩkwa omo luhala kutse omo mitwana mwamabya obũkonĩ bweru ngʼengula, ni bihaga bikahuluka omo luhala luwe kutse omo luhala lwʼemitwana yiwe.

⁴³ Neryo omũhererĩ asyayĩtegereryaye; neryo ekĩsũsũ kyʼobũkonĩ kyamabya kyeru ngʼengula omo luhala luwe, kutse omo luhala lwʼemitwana yiwe, ekĩsosĩre ebihaga omo ngoba yʼomubiri.

⁴⁴ Iye ni mundu wʼebihaga, nĩ mũtsandĩrya. Omũhererĩ asyamwahula kwenene mo mũtsandĩrya; obũkonĩ buwe buli oko mutwe wuwe.

⁴⁵ Nʼomuhaga oyũkwĩre obũkonĩ, esyongimba siwe syasyasatangĩbwa, nʼesyonzwiri syʼomutwe wuwe syasyaswikulwa sitya, naye asyaswika esyonderũ syʼomũnywa wuwe wʼendata, nʼerilaka, ati, Indi Mũtsandĩrya! Indi Mũtsandĩrya!

⁴⁶ Omo biro byosĩ obũkonĩ buli kwiye asyabya mũtsandĩrya; nĩ mũtsandĩrya. Asyĩkala ĩyowene; erĩĩkala liwe lyasyabya ekyaswa kyʼekilaliriro.

⁴⁷ Nʼolukimba oluli ahali ekihaga, lwamabya lukimba lʼobweya bwʼesyombũlĩ, kutse olukimba lwʼekĩtanĩ;

⁴⁸ kutse lwamabya lũlũkĩre butambi-tambi kutse buli-buli, olwʼekisohe, kutse olʼobweya bwʼembũlĩ; kutse omo ngobĩ, kutse omo kĩndũkĩ kĩkokotĩrye omo ngobĩ;

⁴⁹ ekibute kyamabya kĩsosĩre ebiti bibisi kutse ngʼengula omo lukimba, kutse omo ngobĩ, kutse omo butambi-tambi, kutse omo buli-buli kutse omo kĩndũkĩ kyʼengobĩ; ini kibute kyʼebihaga, kyasyakangĩbwa omũhererĩ.

⁵⁰ Nʼomũhererĩ asyayĩtegereryakyo nʼeriingira ekindu ekyo, ekiwite ekibute, ebiro birinda;

⁵¹ neryo asyayĩtegererya ekibute oko kiro kyʼakalinda; ekibute kyamatandirira omo lukimba, kutse omo butambi-tambi, kutse omo buli-buli, kutse omo ngobĩ, nʼomo ngobĩ eyo, eyikakola omũbĩrĩ; ekibute ekyo ni bihaga bĩkalĩre, ĩnĩ mũtsandĩrya.

⁵² Neryo asyahĩsya olukimba olo, olũlũkĩre butambitambi kutse buli-buli, omo bweya bwʼembũlĩ kutse omo kĩtanĩ, kutse kĩndũkĩ kyʼengobĩ, ekiri oko kibute ekyo; kusangwa ni bihaga bĩkalĩre; lwasyahĩsĩbwa omo muliro.

⁵³ Kandi omũhererĩ amayĩtegererya, neryo, kwenene ekibute ĩsĩkĩtandĩre omo lukimba, kutse omo lũlũkĩre butambitambi, kutse olʼobuli-buli, kutse omo kĩndũkĩ kyʼengobĩ;

⁵⁴ omũhererĩ asyahana ati beraye ekindu ekyo ekiri omo kibute ekyo, neryo asyakingirakyo ebindi biro birinda.

⁵⁵ Neryo ekindu ekyo ekirimo ekibute kyamabĩerĩbwa, omũhererĩ asyaswalangirakyo, neryo ekibute ekyo kyamabya sikirikyabindula omũsĩndo wakyo, nomo ekibute sikyetatanda, nĩ kĩtĩndũ; wasyahĩsyakyo omo muliro, nomo eritsanda lyabĩrĩhĩra oluhala endata kukyo kutse embere wakyo.

⁵⁶ Neryo omũhererĩ amasamalira, neryo ekibute ekyo ikirimubulirana enyũma wʼerĩeryakyo, neryo asyatulakyo omo lukimba, kutse omo ngobĩ, kutse omo lũlũkĩre butambi-tambi, kutse omo buli-buli;

⁵⁷ neryo kyamahuluka kandi omo lukimba, kutse aho lũlũkĩre butambi-tambi, kutse buli-buli, kutse omo kĩndũkĩ kyʼengobĩ, kyamaswahuluka; Wasyalũsya ekindu ekyo ekirimo ekibute, omo muliro.

⁵⁸ Nʼolukimba olo, olũlũkĩre butambi-tambi, kutse buli-buli, kutse ekindu kyʼengobĩ, ekyo wasyerya, nʼekibute kyamabĩlũa kukyo, neryo lwasyerĩbwa engendo yʼakabiri, ilwasyera.

⁵⁹ Ekĩ kye kihano kyʼekibute kyʼebihaga omo lukimba lʼobweya bwʼembũlĩ kutse kĩtanĩ, kutse omo lũlũkĩre butambitambi, kutse buli-buli, kutse kĩndũkĩ kyʼengobĩ, eriahulalo mo lwerĩre, kutse eriahulalo mo lubi.