Abalawĩ 11 - AMASAKO ABOYTRTRE WA NYAMUHANGA AWAKAHULAWA MO BIBLIA

Esyonyama syowene nʼesĩtowene

¹ Neryo Omwami Mukulu mwakanĩa na Musa na Harũnĩ ati,

² Ũbũge nʼabana ba Ĩsraelĩ, uti, Esĩ sye syonyama esyo mwangalya omo katĩkatĩ kʼesyonyama syosĩ esiri omo kihugo.

³ Ekĩndũkĩ ekiwite ekigere, ekiwite ekisando kĩtũlĩre, ekikalya nʼerĩsũbũlya, omo katĩkatĩ kʼesyonyama, kyo mwasyalya.

⁴ Nĩkwa Simusyerya esĩ oko sĩkasũbũlaya, kutse oko sĩtũlĩre ekisando; engamia, kusangwa ĩkasũbũlaya, nĩkwa sĩyĩtũlĩre kisando, sĩyowene ũkwʼĩnywe.

⁵ Nʼewĩbarĩ, kusangwa ĩkasũbũlaya, nĩkwa sĩyĩtũlĩre kisando, nayo sĩyowene busana nenyũ,

⁶ nʼesungura kusangwa ĩkasũbũlaya nĩkwa siwite kigere, nayo sĩyowene busana nenyũ,

⁷ nʼengulube, kusangwa inawĩte ekigere, kandi ĩnatũlĩre ekisando, nĩkwa sĩrĩsũbũlaya, nayo sĩyowene busana nenyũ.

⁸ Simusyerya esĩswĩ syasyo, nʼebĩnda byasyo sĩmũsyetũla kubyo; esyo sĩsyowene busana nenyũ.

⁹ Esĩ syo mwasyalya oko syosĩ esiri omo magetsi; ekĩndũkĩ ekiwite ehikibi nʼebikora omo magetsi, nʼomo syongetsi, nʼomo syonyũsĩ, esyo syo mwasyalya.

¹⁰ Nĩkwa esyosĩ esitawite ehikibi nʼebikora omo syongetsi nʼomo syonyũsĩ, oko syosĩ sikalendera omo magetsi, nʼoko syonyama syosĩ, sĩhangĩkĩre esiriho esiri omo magetsi, ni nye busana nenyũ.

¹¹ Nasyo syasyabya nye busana nenyũ Simusyerya esĩswĩ syasyo, nʼebĩnda byasyo mwasyaganzabyo ngʼesyonye.

¹² Ekĩndũkĩ ekitawite ehikibi, kutse ebikora omo magetsi, ebyo ni nye busana nenyũ.

Esyonyonyũ esyowene nʼesĩtowene

¹³ Esĩ syo mwasyaganza mo nye omo katĩkatĩ kʼesyonyonyũ; sisisyeribawa, erĩsamba, nʼenguranga, nʼekĩpũngũ,

¹⁴ nʼekihungu, nʼekĩkolĩ omo mũsĩndo wakyo,

¹⁵ ekĩkolobĩro omo mũsĩndo wakyo,

¹⁶ nʼembũnĩ, nʼakasara kʼekiro, nʼedũdũmĩzĩ, nʼakatelũlĩ omo mũsĩndo wako,

¹⁷ nʼenyarũtũtũ, nʼekĩbũkũlũ, nʼekĩsohĩ,

¹⁸ nʼekĩbũkũlũ kyʼamahembe, nʼamwalĩ, nʼekihungu

¹⁹ nʼekĩrobĩ, nʼemongo omo mũsĩndo wayo, nʼehũdĩ-hũdĩ, nʼomulimalima.

²⁰ Nʼebindu byosĩ ebiwite ebĩpũpa, ebikayikura ebikagendera oko magulu ani ni byʼesyonye busana nenyũ.

²¹ Nĩkwa ebĩ byo mwangalya oko byosĩ ebiwite ebĩpũpa ebikagenda omo magulu ani, ebiwite amagulu mali-mali, ebyangatwa ekika oko kitaka.

²² Ebĩ byo mwangalyako; engĩke omo mũsĩndo wayo, nʼakanyamutsere omo mũsĩndo wako nʼerituta omo mũsĩndo walyo.

²³ Nĩkwa ebindi byosĩ ebiwite ebĩpũpa ebiwite amagulu ani ni byʼesyonye kwĩnywe.

²⁴ Kandi busana nʼesyonyama esĩ mwasyabya batĩsĩrĩre; Omundundi oyo wasyatũla oko kĩnda kyasyo asyabya mũtĩsĩrĩre erĩhĩka omwʼĩgolo-golo.

²⁵ Nʼomundundi oyo wasyaheka oko kĩnda kyasyo ĩnĩerya esyongimba siwe, iniabya mũtsandĩrya erĩhĩka omwʼĩgolo-golo.

²⁶ Obuli nyama eyĩtũlĩre ekisando, isiwite ekisando kyʼekigere, kutse sĩrĩsũbũlaya, nĩ nyĩtsandĩrya ũkwʼĩnywe, nʼobuli mundu oyo wasyatũla kusyo asyabya mũtsandĩrya.

²⁷ Nʼekĩndũkĩ ekikagendera oko binono byakyo, omo katĩkatĩ kʼesyonyama syosĩ esikagenda omo magulu ani, byasyabya bĩtsandĩrya kwĩnywe; nʼoyũkatũla oko kĩnda kyasyo asyabya mũtsandĩrya erĩhĩka okwʼĩgolo-golo.

²⁸ Nʼoyukaheka ekĩnda kyasyo asyerya esyongimba siwe, kandi iniabya mũtsandĩrya erĩhĩka omwʼĩgolo-golo; ebyo nĩ bĩtsandĩrya busana nenyũ.

Esyonyama syowene nʼesĩtsandĩre

²⁹ Esĩ syo nyĩtsandĩrya busana nenyũ omo katĩkatĩ kʼebindu ebikakululuka oko kitaka; omunyerere, nʼembeba, nʼomusiribaba munene omo mũsĩndo wago,

³⁰ nʼendĩko, nʼomwamba nʼomusiribaba, nʼomusiribaba gʼomo musege, nʼakanyalũngũ.

³¹ Esĩ syo nyĩtsandĩrya busana nenyũ omo katĩkatĩ kʼebyosĩ ebikakululuka; oyo wasyatũla kubyo, omugulu bĩholĩre, asyabya mũtsandĩrya erĩhĩka okwʼĩgolo-golo.

³² Nʼoko kĩndũkĩ ekyasyatogerwako ekiguma kyʼebĩholĩre, kyasyabya kĩtsandĩrya; kutse kyamabya ekibindi kyʼomuti, kutse omwenda, kutse engobĩ, kutse engunza, nomo kyangabya kĩndũkĩ, ekikakolerawamo omũbĩrĩ kitolere ĩkyahĩrwa omo magetsi, neryo kyasyabya kĩtsandĩrya erĩhĩka omwʼĩgologolo; neryo kyasyowana.

³³ Nʼobuli nyungu yʼeribumba eyiryatogerawamo ekindu kiguma kya kubyo ekindu ekiri muyo kyasyabya kĩtsandĩrya, nenyũ mwasyatulayo.

³⁴ Nʼakalyo kosĩ akalimo akakalibawa, akahĩkĩre kwʼamagetsi, kasyabya katsandĩrya; nʼebyʼerĩpũlya byosĩ ebyangapũlĩbwa omo buli kindu ngʼekyo byasyabya bĩtsandĩrya.

³⁵ Nʼebyosĩ ebikatogerawako nʼekitswekĩ kyʼekĩnda kyabyo byasyabya bĩtsandĩrya; kutse erĩko, kutse amahĩga wʼesyonyungu, byasyatsũtsangwa mo bitswe-bitswe; nĩ bĩtsandĩrya, kandi byasyabya bĩtsandĩrya busana nenyũ.

³⁶ Nĩkwa eyĩsoko kutse erĩrĩba aho amagetsi akahĩndana byasyabya bibuya; nĩkwa oyũkatũla oko kĩnda kyabyo asyabya mũtsandĩrya.

³⁷ Kandi akandu kʼekĩnda kyabyo kamatogera oko mbuto yʼerihera eyikandisyaherwa, yerĩre.

³⁸ Nĩkwa amagetsi amahĩrwa oko mbuto, nʼakandu kʼebĩnda byabyo kamatogerako, nĩ nyĩtsandĩrya busana nenyũ.

³⁹ Nʼenyama, yʼoko syo mukalya, yamahola, oyũkatũla oko kĩnda kyayo asyabya mũtsandĩrya erĩhĩka omwʼĩgolo-golo.

⁴⁰ Nʼoyukalya oko kĩnda kyayo asyerya esyongimba siwe, iniabya mũtsandĩrya erĩhĩka omwʼĩgolo-golo; nʼoyukaheka ekĩnda kyayo asyerya esyongimba siwe, iniabya mũtsandĩrya erĩhĩka omwʼĩgologolo.

⁴¹ Nʼobuli kindu ekikakululuka oko kitaka ni nye; isikyalibawa.

⁴² Nʼekĩndũkĩ ekikakululuka oko nda yakyo, nʼekĩndũkĩ ekikagendera oko magulu ani, kutse ekĩndũkĩ ekiwite amagulu mangi, nʼebindu ebikakululuka nʼeriyikura oko kitaka, isimwalyabyo kusangwa ni nye.

⁴³ Simusyeyiyira mo nye omo kĩndũkĩ ekikakululuka oko kitaka, kutse simusyeyiyira mo mĩtĩndũ mubyo, ĩmũkayĩtsandaya mubyo.

⁴⁴ Kusangwa ĩngye indi Mwami Mukulu Nyamuhanga wenyũ. Neryo muyihigule, mubye babũyĩrĩre; kusangwa indi mũbũyĩrĩre. Kandi sĩmũsyeyĩtsandaya omo muhandakĩ wʼekindu ekikakululuka oko kitaka.

⁴⁵ Kusangwa ĩngye indi Mwami Mukulu oyo wabalũsaya omo kihugo kyʼeMĩsĩrĩ, eribya Nyamuhanga wenyũ; neryo mwasyabya babũyĩrĩre, kusangwa indi mũbũyĩrĩre.

⁴⁶ Ekĩ kye kihano busana nʼenyama, nʼekyʼenyonyũ, nʼobuli kihangikwa ekiriho ekikagendera omo magetsi, nʼobuli kihangikwa ekikakululuka oko kitaka;

⁴⁷ erisombola omo katĩkatĩ kʼebĩtowene nʼebyowene, nʼomo katĩkatĩ kʼekindu ekiriho ekyangalibwa nʼekindu ekiriho ekite kyangalibwa.