Abalawĩ 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩhalya lya Nadabũ na Abĩhũ

¹ Neryo Nadabũ na Abĩhũ, abagala ba Harũnĩ, mobĩmya obuli mundu oruho luwe, mobahĩramo omuliro, neryo mobahĩra kugo kwʼobukwa, mobahara omuliro wʼogundi mũsĩndo embere syʼOmwami Mukulu, ngoko atahanabo.

² Neryo muliro mwalũa oko Mwami Mukulu, mwabugabo, nabo mobaholera embere syʼOmwami Mukulu.

³ Neryo Musa mwabũga na Harũnĩ, ati, Ekĩ kyo Mwami Mukulu abũga ati, Nasyaganzwa mo mũbũyĩrĩre oko bakasa hakũhĩ nage, nʼembere syʼabandu bosĩ nasyakengwa. Na Harũnĩ mwabya bũkũtũ.

⁴ Neryo Musa mwabirikira Mĩsaelĩ na Elĩsafanĩ, nʼabagala ba Ũsĩelĩ nyĩnya-lume wa Harũnĩ, mwabũga nabo ati, Musegere hakũhĩ, muheke abagala benyũ balũe embere syʼahʼerĩĩkala habũyĩrĩre, mutwalebo eyĩhya wʼekilaliriro.

⁵ Neryo mobasegera hakũhĩ, mobahekerabo ekyaswa kyʼekilaliriro omo makotĩ wabo ngoko Musa abũga.

⁶ Neryo Musa mwabũga na Harũnĩ nʼabagala buwe ye Eleazarĩ na Ĩtamarĩ, ati, Simuswikule emitwe yenyũ, kutse simutulange emyenda yenyũ, mukasyahola, nʼakandi akasyahitana oko ndeko yosĩ. Nĩkwa abagala benyũ, ekĩtũnga kyosĩ kya Ĩsraelĩ, basyasũsũmanira erĩhĩsya eryo Mwami Mukulu abĩrĩakya.

⁷ Nenyũ sĩmũsyelũa oko lũkyo lwʼeHema yʼerĩhĩndanamo mukasyahola; kusangwa amagũta wʼerĩhakabya wʼOmwami Mukulu ali kwĩnywe. Neryo mobakola ngʼekĩnywa kya Musa.

Abahererĩ bakakagawa obwabũ

⁸ Neryo Omwami Mukulu mwabũga na Harũnĩ, ati,

⁹ Sũsyepũlaya ebĩnyũ kutse obwabũ, uwe nʼabagala bawe, omugulu mukingira omo Hema yʼerĩhĩndanamo, mukasyahola; kyasyabya kihano kyʼemigulu yosĩ omo syondengo syenyũ syosĩ,

¹⁰ imwatoka erisombola omo katĩkatĩ kʼebĩbũyĩrĩre nʼebĩtowene, nʼomo katĩkatĩ kʼebĩtĩsĩrĩre nʼebyowene

¹¹ imwatoka erĩkangĩrĩrya abana ba Ĩsraelĩ emigambo yosĩ eyo Mwami Mukulu abĩrĩbũga nabo busana na Musa.

Amahano wʼabahererĩ nʼamagabo wabo

¹² Neryo Musa mwabwira Harũnĩ, na Eleazarĩ, na Ĩtamarĩ, abagala buwe ababala, ati, Mwĩmaye obuhere bwʼeyĩsyano obuliasaka oko mahere wʼOmwami Mukulu awokĩbwe oko muliro, nʼeriryabo butsira kĩhamya oko mũsĩke wʼekiherero; kusangwa bũbũyĩrĩre kutsibu.

¹³ Kandi mwasyalirabo ahabũyĩrĩre, kusangwa nĩ ʼgabo lyawe, nʼerĩgabo lyʼabagala bawe, oko mahere wʼOmwami Mukulu awakokĩbawa oko muliro; kusangwa ko nahanawa nyitya.

¹⁴ Nĩkwa ekĩkũba kyʼerĩhũnga-hũngya nʼekihinga kyʼerisumba wasyalirabyo omo mwanya owerĩre, uwe nʼabagala bawe, nʼabali bawe; kusangwa byabirihabwa ngʼerĩgabo lyawe, nʼerĩgabo lyʼabagala bawe, mo hongo syʼamahere wʼobuholo wʼabana ba Ĩsraelĩ.

¹⁵ Basyaleta ekihinga kyʼerisumba nʼekĩkũba kyʼerĩhũnga-hũngya haguma nʼamahere awakokĩbawa omo muliro oko magabo wʼebĩsabũ, eriretabyo busana nʼobuhere bwʼerĩhũnga-hũngya embere syʼOmwami Mukulu; kandi lyasyabya ĩgabo lyawe, nʼabagala bawe haguma, ebiro byosĩ; ngoko Mwami Mukulu abirihana.

¹⁶ Nĩkwa Musa mwasonda-sonda embene yʼobuhere bwʼebibi, neryo, ibwamabiakirira! Neryo Musa mwahitana uku Eleazarĩ na Ĩtamarĩ, abagala ba Harũnĩ ababala, ati,

¹⁷ Busana nakĩ simwetalya obuhere bwʼebibi bwʼahabũyĩrĩre kwehĩ? Kusangwa bũbũyĩrĩre kutsibu, naye abiribahabo eriheka ebibi byʼendeko, eririhirabo embanulo embere syʼOmwami Mukulu.

¹⁸ Kusangwa omusasi wayo alwe isialialetwa omwisi, omo habũyĩrĩre, mũlũe ĩmwangalĩrĩrebo ahabũyĩrĩre ngoko nahana.

¹⁹ Neryo Harũnĩ mwabwira Musa ati, Lebaya, mũnabwĩre, babirireta obuhere bwabo bwʼebibi nʼobuhere bwabo bwʼerĩokererya embere syʼOmwami Mukulu. Omugulu emyatsi yingaha eyĩ yamambĩkako, kumbe indialya obuhere bwʼebibi mũnabwĩre, nga bĩlwe byowene omo meso wʼOmwami Mukulu kwehĩ?

²⁰ Neryo omugulu Musa owa ebĩ, mobyowana omo meso wuwe.