Abalawĩ 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Amahano wʼobuhere bwʼerĩokererya

¹ Neryo Omwami Mukulu mwabirikira Musa, mwakanĩa naye akabũgĩra omo Hema yʼerĩhĩndanamo, ati,

² Ũbũge nʼabandu ba Ĩsraelĩ, ubwirebo uti, Omugulu Omundu gʼũkwʼĩnywe akaherera Omwami Mukulu yʼobuhere, mwasyahera obuhere bwenyũ bʼomo nyama syʼomo kihangulo Kyʼesyonde nʼekĩhyo kyʼesyombũlĩ.

³ Obuhere buwe bwamabya ini buhere bwʼerĩokererya bwʼende, asyahera enume eyite ko bulema; asyaherayo oko lũkyo lwʼeHema yʼerĩhĩndanamo, iniatoka erĩrĩgwa embere syʼOmwami Mukulu.

⁴ Kandi asyahĩra ebyala biwe oko mutwe wʼobuhere bwʼerĩokererya; ibwatoka erĩrĩgwa eribya mbanulo busana naye.

⁵ Naye asyĩta enume eyo embere syʼOmwami Mukulu; nʼabagala ba Harũnĩ, abahererĩ basyaleta omusasi hakũhĩ, nʼeritsatsangago oko kiherero erĩtĩmbyago ehosĩ aho oko lũkyo lwʼeHema yʼerĩhĩndanamo.

⁶ Kandi asyakera obuhere bwʼerĩokererya nʼerĩtsũtsangabo mo bitswe-bitswe.

⁷ Nʼabagala bʼomũhererĩ ye Harũnĩ basyahĩra omuliro oko kiherero, nʼeritondeka esyongwĩ syʼoko muliro.

⁸ Neryo abahererĩ, abagala ba Harũnĩ, basyahĩra ebitswe ebyo, omutwe nʼebĩsabũ, eritondekabyo oko syongwĩ esiri oko muliro owali oko kiherero.

⁹ Nĩkwa ebyʼomo nda nʼemihimbi yayo asyeryabyo omo magetsi. Nʼomũhererĩ asyahĩsĩrĩrya ebyosĩ endata oko kiherero busana nʼobuhere bwʼerĩokererya, obuhere, obũkokĩbawa oko muliro, ekikumbo kĩsĩhĩre oko Mwani Mukulu.

¹⁰ Kandi obuhere buwe bwamabya ini bʼomo kihangulo, omo mbũlĩ, kutse omo mbene-hene, busana nʼobuhere bwʼerĩokererya iniahera embangale eyite ko bulema.

¹¹ Asyakererayo oko ndambi yʼekiherero eyikalola elutambi lwʼendata embere syʼOmwami Mukulu; kandi abahererĩ, abagala ba Harũnĩ, basyatsatsanga omusasi wayo oko kiherero erĩtĩmbyago ehosĩ.

¹² Kandi asyatsũtsangayo mo bitswe-bitswe, haguma nʼomutwe wayo nʼebĩsabũ byayo; nʼomũhererĩ asyatondekabyo endata oko ngwĩ esiri oko muliro owali oko kiherero.

¹³ Nĩkwa ebyʼomo nda nʼemihimbi asyeryabyo omo magetsi. Nʼomũhererĩ asyahera ebyosĩ nʼerĩokereryabyo oko kiherero; ni buhere bwʼerĩokererya, obuhere obũkokĩbawa oko muliro, ekikumbo kĩsĩhĩre busana nʼOmwami Mukulu.

¹⁴ Nʼobuhere buwe oko Mwami Mukulu bwamabya ini buhere bwʼerĩokererya bwʼesyonyonyũ, neryo asyahera obuhere bwʼehitungula, kutse bwʼehyana hyʼehĩrĩkũkũ.

¹⁵ Nʼomũhererĩ asyaletabo oko kiherero, iniakonyola omutwe wako, nʼerĩhĩsĩrĩryako oko kiherero; nʼomusasi wako asyasononokerĩbwa oko ndambi yʼekiherero;

¹⁶ kandi asyalũsya kuko kwʼekitolero kyako haguma nʼebĩpũpa byako, nʼerigusabyo oko mũsĩke wʼekiherero oko luhande lwʼendata, aho wʼerĩbũ.

¹⁷ Kandi asyakatulira omo bĩpũpa byako, nĩkwa isiatulako mo bihande bibiri. Nʼomũhererĩ asyokereryako oko kiherero, endata oko ngwĩ esiri oko muliro; ni buhere bwʼerĩokererya, obuhere obũkokĩbawa oko muliro, ekikumbo ekĩsĩhĩre busana nʼOmwami Mukulu.