AbaEbrania 8 - AMASAKO ABOYTRTRE WA NYAMUHANGA AWAKAHULAWA MO BIBLIA

Yesu omũhererĩ wetu mukulu

¹ Neryo enzumwa yʼomwatsi tũkabũga yeyĩ: tuwite omũhererĩ mukulu oko bahererĩ bosĩ wʼomũsĩndo oyũ. Ĩkere oko luhande lwʼamali lwʼekĩtũmbĩ kyʼOmwenye Obukulu omo lubula.

² Omũhererĩ mukulu oko bahererĩ bosĩ oyo, akakola omũbĩrĩ ahabũyĩrĩre, nʼomo Hema yʼekwenene eyo Mukama ahanda, butsira bandu.

³ Obuli mũhererĩ mukulu oko bahererĩ bosĩ, akahamulawa erihera olũsũnzo nʼamahere uku Nyamuhanga. Neryo kitolere omũhererĩ mukulu oko bahererĩ bosĩ oyũ iniabya nʼekindu kyʼeriha uku Nyamuhanga.

⁴ Kumbe alibya muna-kihugo, kumbe siangabere mũhererĩ nʼahake. Kusangwa hali abahererĩ abakaha olũsũnzo uku Nyamuhanga ngʼEmigambo ko yikategeka.

⁵ Bakakola omo kĩsosekanĩo nʼomo kyũtsũtsũ kyʼemyatsi yʼelubula. Ngoko Nyamuhanga ahana Musa omugulu abya akatsũka erihanda eHema ati, Ũlebaye, Ukole emyatsi yosĩ omo lulengo olo wakanganĩbawa oko kitwa.

⁶ Nĩkwa Yesu abiribana omũbĩrĩ mubuya wʼobũhererĩ kwilaba aho, ngoko kandi Yesu nĩ mũsanganĩa wʼendagane yowene kwilaba eyabo, kusangwa ihangene okwʼerilaga libuya kwʼaho.

⁷ Kusangwa kumbe endagane yʼerĩmbere yitabya mwʼekyʼerikungirwa, kumbe Sihangabya obwaga bwʼeyindi ndagane.

⁸ Kusangwa Nyamuhanga akakunga abandu ati, Omwami Mukulu ati, Lebaya ebiro bikasa, Nage nasyayira endagane nyihya-nyihya nʼekĩtũnga kya Ĩsraelĩ, Kandi nʼekĩtũnga kya Yũda.

⁹ Eyĩ siyendisyasosa endagane eyo nayira nʼabotata wabo. Oko kiro ekyo nawatabo oko byala nʼerisondolabo omo kihugo kyʼeMĩsĩrĩ. Nĩkwa mobatakwama endagane eyo nahĩra kubo, Neryo Omwami Mukulu ati, Nage namaponabo.

¹⁰ Neryo Omwami Mukulu ati, Enyũma wʼebiro ebyo, nasyayira endagane haguma nʼekĩtũnga kya Ĩsraelĩ; Nasyahĩra Emigambo yage omo malengekanĩa wabo, Kandi nasyasakayo omo mitima yabo. Nasyabya Nyamuhanga wabo, Nabo basyabya bandu bage.

¹¹ Nabo sibendĩsyakangĩrĩranĩa obuli mundu na mũlĩkyabo, Kutse obuli mundu na mugala wabo, bati, Muminye Omwami Mukulu, Kusangwa abosĩ basyanyiminya, Erĩtsũka oko muke erĩhĩka oko mukulu wabo.

¹² Nasyaganyira amalolo wabo, Kandi sindiendisyaswibuka ebibi byabo.

¹³ Omugulu abũga ati, Endagane nyihya-nyihya, Nyamuhanga mwaganza eyʼerĩmbere mo ngulu-kulu. Nĩkwa ekikabya kikulu-kulu, ekĩkakwa, kikasonda erihwaho.