AbaEbrania 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Omuhanda wʼobũhererĩ bwa Melkĩsedekĩ

¹ Melkĩsedekĩ oyũ, abya mwami wʼeSalemũ, kandi abya omũhererĩ wa Nyamuhanga Owendata Kutsibu. Neryo omugulu Abrahamũ abya akasubula akalũa eyo ayĩtĩra abami, mwahĩndana na Melkĩsedekĩ naye mwamutsumula.

² Kandi Abrahamũ mwamugabira ekihande kiguma ekyʼomwʼĩkũmĩ kyʼebyosĩ. Erĩna lya Melkĩsedekĩ riti, Omwami Wʼeritunganene; kandi abya mwami wʼeSalemũ, erĩna liti, Omwami wʼobuholo.

³ Melkĩsedekĩ siabya awite ĩse, isiawite nyĩnya isiawite abotata-kulu, isiawite omugulu abutawa kutse erihwa lyʼengebe. Nĩkwa ahangikawa ngʼomugala wa Nyamuhanga. Akabya mũhererĩ ebiro byosĩ.

⁴ Nĩkwa mũlebaye ngoko mundu oyũ abya mukulu. Abrahamũ, tata-kulu, mwamuha ekihande kiguma kyʼomwʼĩkũmĩ kyʼebindu ebyo ahũnga.

⁵ Kandi abana ba Lawĩ abali bahererĩ bakahanawa omo Migambo erĩmya ekihande kiguma kyʼomwʼĩkũmĩ oko bandu abali bʼekihanda kyabo, nomo bangabya bʼolubuto lwa Abrahamũ.

⁶ Melkĩsedekĩ mwatabya wʼekihanda kyabo, nĩkwa mwĩmya ekihande kiguma kyʼomwʼĩkũmĩ uku Abrahamũ, kandi mwatsumula Omwenye ndagane ya Nyamuhanga.

⁷ Nĩkwa butsira buhaka omundu muke akatsumulawa nʼomukulu.

⁸ Abahererĩ ni bandu bakahola nĩkwa bakahamba ekihande kiguma kyʼomwʼĩkũmĩ. Nĩkwa kĩsakĩre ko Melkĩsedekĩ oyuliho, mwĩmya ekihande kiguma kyʼomwʼĩkũmĩ.

⁹ Kandi omundu anganabũga ati, omugulu Abrahamũ aliha ekihande kiguma kyʼomwʼĩkũmĩ, ye Lawĩ (oyũkĩmayakyo) naye mwalihakyo.

¹⁰ Kusangwa Lawĩ abya isialiabutwa, abya iniakine omo mubiri wa Abrahamũ omugulu Melkĩsedekĩ ahĩndana naye.

¹¹ Kumbe erĩhĩkana lyatokekana busana nʼomũbĩrĩ wʼobũhererĩ bwa Lawĩ, kusangwa Emigambo yahabawa nʼabandu ba Ĩsraelĩ haguma nʼobũhererĩ bwa Lawĩ, kumbe Sihangabya obwaga bwʼerĩhanganĩa ogundi mũhererĩ oko muhanda wa Melkĩsedekĩ oyute wʼekihanda kya Harũnĩ.

¹² Kusangwa omugulu obũhererĩ bukabindulawa, litolere eribindula Emigambo nibya.

¹³ Kandi Omukama wetu, oyukahulawa omo myatsi eyĩ, abya wʼekindi kihanda kyʼAbayũda. Kandi sihali mundu wʼekihanda ekĩ oyo wabya akahera amahere oko kiherero.

¹⁴ Kusangwa kyasĩbwe ndeke kwʼOmukama wetu ni wʼomo kihanda kya Yũda. Musa mwatahula abahererĩ omo kihanda ekĩ.

Ogundi mũhererĩ omo muhanda wa Melkĩsedekĩ

¹⁵ Omwatsi akũmayĩre ndeke ngoko ogundi mũhererĩ abirihuluka, oyuli nga Melkĩsedekĩ.

¹⁶ Mwatayirwa mo mũhererĩ omo bihano byʼabandu, nĩkwa mwabya mũhererĩ omo bũtokĩ bwʼengebe eyitendisyahwa.

¹⁷ Kusangwa kĩkatũlawa busana naye kiti, Uli mũhererĩ kera na kera Ngʼomuhanda wʼobũhererĩ bwa Melkĩsedekĩ.

¹⁸ Kusangwa ekihano kyʼerĩmbere kĩkalũsĩbawaho busana nʼobolo bwakyo, kandi sikiri nʼendũndĩ.

¹⁹ Kusangwa Emigambo ya Musa moyĩtahĩkanĩa kindu. Nĩkwa lino amaha awalengĩre abiriretwa; kandi busana nago tukasegera hakũhĩ na Nyamuhanga.

²⁰ Kandi hali erĩlahĩrya lya Nyamuhanga.

²¹ Kusangwa abandi bahererĩ mobahĩrwaho butsira erĩlahĩrya. Nĩkwa Yesu mwahĩrwa mo mũhererĩ nʼerĩlahĩrya, kusangwa Nyamuhanga mwamubwira ati, Omwami Mukulu abĩrĩlahĩrya, Isiendĩsyakũbyalyo ati, Uli mũhererĩ kera na kera.

²² Ekĩ kikatuma ndeke Yesu iniabya muwato wʼendagane eyĩlabĩre eyindi.

²³ Kandi abahererĩ ba kera babya bangi kusangwa babya bakahola isibetoka erikola omũbĩrĩ wʼebiro byosĩ.

²⁴ Nĩkwa Yesu kusangwa akakota syalĩũmbaya erikola omũbĩrĩ wuwe wʼobũhererĩ.

²⁵ Busana nʼekyo akatoka erĩlamya lino nʼebiro byosĩ abakahĩka uku Nyamuhanga busana naye. Kandi akakota busana nʼerisabirabo.

²⁶ Kusangwa Yesu yo Mũhererĩ Mukulu oko bahererĩ bosĩ, oyutolere. Kandi abũyĩrĩre, oyute ko mwatsi, oyute ko kibi, oyo wabirihigulwa oko bakola-nabi, nʼerĩhamĩbwa endata oko matũkũ.

²⁷ Yesu siali ngʼabandi bahererĩ bakulu oko bahererĩ bosĩ. Ibo bakahera amahere ebiro byosĩ busana nʼebibi byabo, nʼakandi busana nʼebibi byʼabandu. Kusangwa Kristo mwahera obuhere bo ngendo nguma nyisa omugulu ayiha.

²⁸ Kandi Emigambo ya Musa ĩkahĩra abandu abali bolo, ngʼabahererĩ bakulu oko bahererĩ bosĩ. Nĩkwa ekĩnywa ekyalahĩrĩbawa mokyahĩka enyũma wʼEmigambo, kĩkahĩra Omugala, oyo wayirawa ahĩkene, erĩhĩka na kera.