AbaEbrania 6 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Neryo tugende embere omo myatsi eyĩhĩkene, tũsĩganaye erĩkangĩrĩrya lyʼerĩtsũka lyʼengulu ya Kristo. Situsibe omo myatsi eyĩ yʼekibanza: eribinduka nʼerireka ebibi byʼemĩbĩrĩ yʼobusa, nʼerĩkĩrĩrya uku Nyamuhanga,

² nʼerĩkangĩrĩrya lyʼerĩbatĩsya mũsĩndo-mũsĩndo, nʼeryʼerĩhĩra kwʼebyala, nʼerĩlũbũka lyʼabaholĩ, nʼeritswera lya kera na kera.

³ Netu twasyakola tutya, nʼerilaba embere, Nyamuhanga amalĩga.

⁴ Kusangwa siritokekene erĩsũbya abandu bʼokwʼibinduka, ababiritoga kwenene. Kusangwa babya erĩmbere omo kyakakala kya Nyamuhanga. Babirirenga olũsũnzo lwʼelubula, kandi babirisangira oko Mũlĩmũ Abũyĩrĩre.

⁵ Kandi babirirenga ebibuya byʼekĩnywa kya Nyamuhanga, kandi babirirenga obũtokĩ bwʼomugulu owakandisyasa.

⁶ Neryo bamabitoga, siryetokekana kubo eriswabinduka nʼerireka ebibi kusangwa bakaswabamba Omugala wa Nyamuhanga oko musalaba, nʼeriswamuhemula.

⁷ Nyamuhanga akatsumula ekitaka ekikabana embũla eyikawa kukyo engendo nyingi, ekitaka ekyo kĩkalasaya esyombuto syowene busana nʼabakalima kukyo.

⁸ Nĩkwa ekitaka ekyo kyamalasya amahwa nʼamatolũ, sikiwite ndũndĩ. Kiri hakũhĩ nʼeritakirwa na Nyamuhanga, nʼendũlĩ yakyo nĩʼhĩsĩbwa.

⁹ Nomo twangabũga tutya, abanze, nĩkwa busana nenyũ, tũnasĩ ndeke ngoko munawite emyatsi yowene eyikakwama erilama.

¹⁰ Kusangwa Nyamuhanga sialikola ekitatunganene. Siangibirirwa omũbĩrĩ wenyũ, nʼolwanzo olo mwakangaya busana naye, imwabirikolera, kandi mukinakolera abandu ba Nyamuhanga.

¹¹ Kandi twanzĩre kutsibu obuli mundu gʼũkwʼĩnywe akangaye omũhwa wuwe erĩhĩka oko ndũlĩ, nʼerĩberererya amaha wuwe.

¹² Tuti Simubye nʼobũtowa nĩkwa mubye mũkagerereraya abĩkĩrĩraya nʼerĩyĩyĩnĩa nʼeriangirira ebyo Nyamuhanga alaga.

Erilaga lyʼekwenene lya Nyamuhanga

¹³ Kusangwa omugulu Nyamuhanga alaga Abrahamũ, mwayĩlahĩryako, kusangwa sihabya ogundi mukulu ukwʼiye wʼerĩlahĩryako.

¹⁴ Mwabũga ati, Kwenene nasyakutsumula, kandi kwenene nasyakanyĩrĩrya abana bawe.

¹⁵ Abrahamũ mwalindirira nʼeritindaluha, neryo mwasunga ebyo Nyamuhanga alaga.

¹⁶ Kusangwa abandu bakalahĩraya oko mundu mukulu kubo, kandi erĩlahĩrya likabuga obuhaka.

¹⁷ Litya Nyamuhanga abya anzĩre erĩkangya abalagawa ngoko ate angabindula eriyisoha liwe, neryo mwalahĩrya kulyo.

¹⁸ Neryo hali myatsi ĩbĩrĩ eyĩ eyitetoka eribinduka, kandi Nyamuhanga sialitoka eribiha muyo. Busana nʼemyatsi eyĩ, tukahanda emitima yo kutsibu, ĩtwe twabirisagira uku Nyamuhanga, tuhambe ndeke amaha awabĩrĩhĩrwa embere syetu.

¹⁹ Tuwite amaha aya awakasĩkaya emitima yetu. Amaha aya ni wʼekwenene, asĩkĩre, kandi akingira enyũma wʼekĩsũkũlĩryo kyʼeHekalũ,

²⁰ aho Kristo abiriingira busana netu, iniabiribya mũhererĩ mukulu oko bahererĩ bosĩ, wa kera na kera omo muhanda wa Melkĩsedekĩ.