AbaEbrania 5 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Obuli mũhererĩ mukulu oko bahererĩ bosĩ akayisogawa omo katĩkatĩ kʼabandu, akahĩrawa erikolera Nyamuhanga busana nʼabandu. Naye akaha olũsũnzo nʼamahere busana nʼebibi.

² Akatoka erikola lyolo-lyolo nʼabandu abatasĩ kindu nʼabakatala, kusangwa naye ni molo nibya.

³ Neryo litolere iniahera amahere busana nʼebibi biwe ngoko akaherera ebibi byʼabandu.

⁴ Kandi sihali omundu oyukayisoga erĩsĩkĩbwa ngʼomũhererĩ mukulu oko bahererĩ bosĩ, nĩkwa ni Nyamuhanga oyukabirikira omundu busana nʼomũbĩrĩ oyũ, ngoko abirikira Harũnĩ.

⁵ Litya Kristo mwatayĩhamya eribya mũhererĩ mukulu oko bahererĩ bosĩ, nĩkwa Nyamuhanga mwamubwira ati, Uli Mugala wage, Namakubuta mũnabwĩre.

⁶ Kandi mwabũga ehandi ati, Uli mũhererĩ kera na kera Ngʼomuhanda wʼobũhererĩ bwa Melkĩsedekĩ.

⁷ Omugulu Yesu abya eno ngʼomundu, mwasaba nʼeriremba-lemba uku Nyamuhanga, omwʼilakirira nʼemĩsonĩa, ukwʼoyo abya nʼamaka wʼerĩmũlamya oko luholo, kandi Nyamuhanga mwamowa busana nʼobugenge buwe.

⁸ Nomo anabya Mugala wa Nyamuhanga, mwiga erĩowa omo myatsi agalawamo.

⁹ Kandi abere abiyirwa mʼoyũhĩkene, mwabya nzũko yʼerilama erya kera na kera busana nʼabosĩ abakamowa.

¹⁰ Nyamuhanga mwamwahula mo mũhererĩ mukulu oko bahererĩ bosĩ omo muhanda wa Melkĩsedekĩ.

Ehe-e-e busana nʼabakatoga

¹¹ Busana nʼomwatsi oyũ tuwite bingi byʼerĩbũga, kandi bĩkalĩre erĩbamĩnyĩsyabyo, kusangwa mwabiribya nʼobũtowa.

¹² Kusangwa manga-hano ĩnywe mwangabere abakangĩrĩrya, kwesĩ mwangaswakangĩrĩrĩbwa emyatsi yʼerĩmbere yʼebĩnywa bya Nyamuhanga. Mukinatolere amabere butsira akalyo.

¹³ Kusangwa oyukalya amabere akine mwana, isialiabegera ebĩnywa byʼeritunganene.

¹⁴ Nĩkwa akalyo ni kʼabandu bakulu, ababirikola nʼerĩgĩsĩbwa omo myatsi mingi, ibabiritoka erisombola ekibuya nʼekibi.