AbaEbrania 4 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Nyamuhanga abirituha endagane yʼeriluhuka liwe. Neryo tubahe hakasyabya omuguma gʼũkwʼĩnywe oyukabula eriingira omwʼiluhuka eryo.

² Kusangwa Engulu Yowene moyatũhĩkako ngoko yahĩka kubo; nĩkwa ekĩnywa ekyo bowa mokitetawatĩkyabo kusangwa mobagana erĩkĩrĩryakyo.

³ Nĩkwa ĩtwe twĩkĩrĩraya tukingira omwʼiluhuka lya Nyamuhanga; ngoko kĩsakĩre kiti, Monalahĩrya omwʼihitana lyage nyiti, Sibendisyingira omo kihugo ekyo aho nangaherebo eriluhuka. Mwabũga atya nomo emĩbĩrĩ yiwe yanahwa oko mugulu ahangika ekihugo.

⁴ Kusangwa kĩbũgĩre ehandi busana nʼekiro kyʼebirinda kiti, Nyamuhanga mwaluhuka oko kiro kyʼebirinda oko mĩbĩrĩ yiwe yosĩ akola.

⁵ Kandi busana nʼomwatsi oyũ ati, Sibendisyingira omo kihugo ekyo aho nangaherebo eriluhuka.

⁶ Neryo abakangĩrĩrĩbawa Engulu Yowene erĩmbere mobatingira omwʼiluhuka eryo busana nʼerĩtendĩkĩrĩrya. Nĩkwa abandi bakingira omwʼiluhuka eryo.

⁷ Neryo Nyamuhanga akahula kandi ekiro ati, Mũnabwĩre. Enyũma wʼebiro bingi Nyamuhanga mwabũga omo bĩnywa bya Dawĩdĩ ati, Lero mũnabwĩre, mwamowa omulenge wuwe, Sĩmũkalaye emitima yenyũ.

⁸ Kusangwa kumbe Yosũa aha abandu eriluhuka lya Nyamuhanga, kumbe Nyamuhanga siangasyahula ekindi kiro enyũma wʼaho.

⁹ Neryo hane eriluhuka busana nʼabandu ba Nyamuhanga eriri ngʼeriluhuka lyʼeSabato.

¹⁰ Kusangwa oyukingira omwʼiluhuka lya Nyamuhanga naye akaluhuka oko mĩbĩrĩ yiwe, ngoko Nyamuhanga aluhuka oko mĩbĩrĩ yiwe.

¹¹ Neryo tuyitsinge kutsibu eriingira omwʼiluhuka eryo. Sihabye omundu oyukagana erĩowa ngoko bakola, nʼeritaluka eriingira mulyo.

¹² Kusangwa ekĩnywa kya Nyamuhanga kiriho, kandi kinemukola omũbĩrĩ, kandi kĩtwĩre kwilaba omũyalĩ owawite amoya abiri. Kikatsimita erĩhĩka okwʼigaba omutima nʼekĩrĩmu; kandi erĩhĩka okwʼigaba esyonungo nʼomungoso. Kandi kikatoka eritswera erisonda nʼamalengekanĩa gʼomutima.

¹³ Sihali ekĩhangĩkĩre ekĩbĩsamĩre uku Nyamuhanga. Nĩkwa ebyosĩ bisanzukere, kandi biminyikere omo meso wa Nyamuhanga. Kandi twasyayĩbalya ukwʼiye.

Yesu omũhererĩ mukulu

¹⁴ Tuhambe ndeke emyatsi eyo twabĩrĩkĩrĩrya, kusangwa tuwite omũhererĩ mukulu oko bahererĩ bosĩ, oyo wabirilaba omo lubula, Ye Yesu Mugala wa Nyamuhanga.

¹⁵ Kusangwa omũhererĩ wetu mukulu oko bahererĩ bosĩ si mundu oyũtetũkwĩra obũlĩge omo bolo-bolo bwetu. Nĩkwa tuwite omũhererĩ mukulu oko bahererĩ bosĩ oyo walengawako omo myatsi yʼemĩsĩndo yosĩ eyikatulengako netu, nĩkwa mwatakola ebibi.

¹⁶ Neryo tuyitwale hakũhĩ nʼobwĩranda oko kĩtũmbĩ kyʼobwami kya Nyamuhanga, ahali olukogo. Tutoke eribana eriganyira, kandi twangirire olukogo lwʼerĩtũwatĩkya oko mugulu wʼobwaga.