AbaEbrania 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Yesu ni mukulu uku Musa

¹ Neryo balĩkyetu, bana ba Nyamuhanga, abo Nyamuhanga abirikira nibya, mũganĩraye ndeke Yesu, omukwenda nʼomũhererĩ mukulu oko bahererĩ bosĩ, owʼemyatsi eyo tũkĩkĩrĩraya.

² Yesu abya butsira eriregula uku Nyamuhanga, ngoko Musa naye abya butsira eriregula omo nyũmba yosĩ ya Nyamuhanga.

³ Nĩkwa Yesu atolere eribana olukengerwa lunene kwilaba Musa, ngoko mũlũmbĩ wʼenyũmba akasĩkĩbawa kwilaba enyũmba.

⁴ Kusangwa obuli nyũmba ĩkahĩmbawa nʼomundu, nĩkwa Nyamuhanga nĩ mũhĩmbĩ wʼemyatsi yosĩ.

⁵ Neryo Musa abya butsira eriregula ngʼomugombe omo nyũmba yosĩ ya Nyamuhanga; Musa mwatũla emyatsi eyo Nyamuhanga akasyabũga enyũma.

⁶ Nĩkwa Kristo abya butsira eriregula ngʼomugala oyũkategaya enyũmba ya Nyamuhanga. Netu tuli enyũmba eyo, twamahanda omutima, kandi tukayiketera nʼeriyihalamba omo maha wetu.

Eriluhuka busana nʼabandu ba Nyamuhanga

⁷ Neryo, ngoko Mũlĩmũ Abũyĩrĩre akabũga ati, Lero mũnabwĩre, mwamowa omulenge wuwe,

⁸ Sĩmũkalaye emitima yenyũ ngʼomugulu bayisamambula uku Nyamuhanga. Ngʼekiro balengawako omo mbwarara.

⁹ Eyo abotata wenyũ banyĩsĩsĩrĩraya nʼerinyirengako. Mobalangira emĩbĩrĩ yage emyaka makũmĩ ani.

¹⁰ Neryo monahitana oko bandu abo, Monabũga nyiti, Bakatala ebiro byosĩ omo mitima yabo; Sibetaminya esyonzira syage.

¹¹ Monalahĩrya omwʼihitana lyage nyiti, Sibendisyingira omo kihugo ekyo, Ekyo nangaherebo eriluhuka.

¹² Neryo balĩkyetu, mũtegaye, Sihabye mundu muguma omo katĩkatĩ kenyũ, owʼomutima mubi nʼowʼerĩtendĩkĩrĩrya, ebikaleka akalũa uku Nyamuhanga oyuliho.

¹³ Nĩkwa mũsĩkanaye emitima omugulu bukinahulawa mũnabwĩre, hakasyabya omundu muguma omo katĩkatĩ kenyũ akatebĩbwa nʼebibi nʼerĩkalya omutima wuwe.

¹⁴ Kusangwa twabirisangira uku Kristo, twamasĩka ndeke omwʼiyiketera lyetu erĩhĩka oko ndũlĩ.

¹⁵ Ngoko Amasako akabũga ati, Mũnabwĩre mwamowa omulenge wuwe, Sĩmũkalaye emitima yenyũ ngʼomugulu bayisamambula uku Nyamuhanga.

¹⁶ Kusangwa ni bahi abowa Nyamuhanga, nʼeriyisamambula ukwʼiye kwehĩ? Kwenene si ba bosĩ abalũa eMĩsĩrĩ haguma na Musa kwehĩ?

¹⁷ Nyamuhanga ahitana uku bahi oko myaka makũmĩ ani kwehĩ? Si ba bandu abakola ebibi abahwera omo mbwarara kwehĩ?

¹⁸ Mwatahula abagana erĩowa kwehĩ omugulu alahĩrĩraya ati, Sibendisyingira nʼahake omwʼiluhuka liwe.

¹⁹ Neryo tukalangira ko bataluka eriingira busana nʼerĩtendĩkĩrĩrya lyabo.