AbaEbrania 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Erilama lĩnene

¹ Busana nʼomwatsi oyũ, litolere ĩtwateya ndeke ebyo twabĩrĩowa, tukasyayihengeka, tũkalũa oko kwenene.

² Kusangwa ekĩnywa ekyabũgawa nʼabamalaĩka mokyahangana ndeke, nʼobuli ĩlolo nʼerĩtendĩowa mobyasuyirwa ngoko litolere.

³ Netu twasyabala tuti twamapona erilama linene ringaha kwehĩ? Omukama mwatsũka erĩtũla engulu yʼerilama erĩ, neryo abamowa mobahanganĩayo ndeke.

⁴ Kandi Nyamuhanga mwatũlago haguma nabo iniakakola ebiminyikalo, byʼobũtokĩ, nʼebyʼeriswekera, nʼebitiko-tiko mĩsĩndomĩsĩndo. Kandi mwaha olũsũnzo lwʼOmũlĩmũ Abũyĩrĩre ngʼerisonda liwe.

Kristo mwasa ngʼomundu erĩtũlamya

⁵ Kusangwa Nyamuhanga mwatahĩra abamalaĩka mo bakama bʼekihugo ekyo abya akandihangika, ekyo tukahula.

⁶ Kusangwa kĩsakĩre kiti, Ko mundu nĩkĩ kwehĩ? uti ukamwibuka kwehĩ? Kutse omwana wʼomundu nindi kwehĩ? uti ukamutsomana kwehĩ?

⁷ Wabirimuyira mo muke oko bamalaĩka busana nʼakatambĩ kake; Kandi wabĩrĩmũsĩngya omo lukengerwa nʼerĩsĩkya lyʼOmwami, Wabĩrĩmũhĩra mo mũtabalĩ oko myatsi wahangika,

⁸ Wabĩrĩhĩra emyatsi yosĩ omo hamũlĩ yiwe. Kusangwa omugulu ahĩra emyatsi yosĩ omo hamũlĩ yiwe, mwatasĩganĩa kindu ekite omo hamũlĩ yiwe. Nĩkwa lino situlitwalangira emyatsi yosĩ omo hamũlĩ yiwe.

⁹ Nĩkwa tukalangira Yesu, oyo wayirawa mo muke oko bamalaĩka busana nʼakatambĩ kake, iniatoka omo lukogo lwa Nyamuhanga erihola busana nʼabandu bosĩ. Neryo Yesu busana nʼeriagalwa liwe lyʼoluholo, abiribana olukengerwa nʼerĩsĩkya lyʼOmwami.

¹⁰ Kusangwa lyabya litolere busana na Nyamuhanga, oyo wahangika ebindu byosĩ nʼoyũkategaya ebindu byosĩ, eriyira Yesu mo mundu oyũhĩkene busana nʼeriagalwa liwe. Neryo Yesu oyo wakokotaya erilama lyabo, atoke erireta abana bangi erisangira olukengerwa luwe.

¹¹ Kusangwa oyukahigula nʼabakahigulawa bawite Tata muguma; busana nʼomwatsi oyũ, Yesu sialibana esĩsonĩ eriahulabo mo bagala babo,

¹² ati, Nasyakanganĩa erĩna lyawe oko bagala betu, Nasyakwimbira nʼerikupipa embere wʼendeko yosĩ.

¹³ Nʼakandi ati, Nasyayiketera Nyamuhanga. Nʼakandi ati, Ĩngye yono nʼabana abo Nyamuhanga abirimba.

¹⁴ Neryo kusangwa abana ni bandu bʼomubiri nʼomusasi, Yesu ĩyowene mwĩmya omubiri nʼomusasi ngʼabo. Mwakola atya iniatoka omo luholo luwe erĩherya Satanĩ oyo wabya nʼobũtokĩ bwʼoluholo.

¹⁵ Kandi iniatoka eribohola abosĩ ababya ngʼabakobe omo biro byabo byosĩ busana nʼeriubaha oluholo.

¹⁶ Kusangwa kwenene si bamalaĩka bo akawatĩkaya, nĩkwa kĩsakĩre kiti, Akawatĩkaya abana ba Abrahamũ.

¹⁷ Kyaleka Yesu iniayirwa ngʼabalĩkyabo omo myatsi yosĩ, kandi iniatoka eribya omũhererĩ mukulu oko bahererĩ bosĩ oyukaganyira, nʼoyuteregula omo mũbĩrĩ wa Nyamuhanga, ebibi byʼabandu bibuyirawe.

¹⁸ Kusangwa iye abiriagalwa omwʼirengwako, akatoka erĩwatĩkya abakalenga wako.