AbaEbrania 12 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga Tata wetu akatusuyira

¹ Nĩkwa ĩtwe, kusangwa tũtĩmbĩrweko nʼendeko nene yʼabalangĩrĩ, tũyĩlũsaye kwʼebyosĩ ebĩkatũkakĩraya, nʼebibi ebikatuhamba, tutibite nʼerĩyĩyĩnĩa omo matangwa awali embere syetu.

² Neryo tũhĩre ameso wetu uku Yesu oyukatuleta okwʼĩkĩrĩrya nʼoyũkaberererayalyo. Kusangwa Yesu mwayĩyĩnĩa oko musalaba, abya asĩ obutseme obwasyabya buwe, kandi mwatalebya esĩsonĩ syago nga kindu. Lino ĩkere oko luhande lwʼamali lwʼekĩtũmbĩ kyʼobwami kya Nyamuhanga.

³ Neryo mũganĩraye Yesu oyo wayĩyĩnaya omo bũyĩgũ bwʼabakola-nabi, neryo simuluhe kutse erioloba omo mitima yenyũ.

⁴ Omo malwa wenyũ nʼebibi, sĩmwetahĩka aho bakũta omusasi wenyũ.

⁵ Mwabiribirirwa ebĩnywa ebyo ebĩkasĩkaya omutima, ebĩkabũgawa nenyũ ngʼabagala biti, Mugala wage, supone erisuyira lyʼOmwami Mukulu, Kutse Suleke omutima erioloba omugulu akakukunga.

⁶ Kusangwa Omwami Mukulu akakunga oyo anzĩre, Kandi akaswĩraya obuli mugala oyũkamũkokaya.

⁷ Neryo mũyĩyĩnaye omwʼikungwa erĩ, kusangwa Nyamuhanga akabakola ngʼabagala buwe. Kusangwa omugala ni wahi oyo tata wuwe sialikunga kwehĩ?

⁸ Nĩkwa mwamabya butsira erikungwa haguma nʼabandi bosĩ, kwesĩ isimuli bagala, imuli basa-na-nyĩnya.

⁹ Kandi twabya nʼabotata wetu bʼekihugo ibakatukunga, netu motwakengabo. Sĩtwangowa kwilaba aho Tata wʼebĩrĩmũ byetu, itwabyaho kwehĩ?

¹⁰ Kusangwa abotata wetu mobatukunga akatambĩ kake ngoko baganĩraya bati litolere. Nĩkwa Nyamuhanga akatukunga eritukola ndeke, itwatoka erisangira obũbũyĩrĩre buwe.

¹¹ Erikunga lyosĩ riri nga bũlĩge oko katambĩ kake, butsira obutseme. Nĩkwa enyũma likaleta emĩbĩrĩ yʼobuholo nʼeritunganene omo mitima yabo, ukwʼabo babĩrĩkangĩrĩrĩbwa mulyo.

Erĩkangĩrĩrya nʼerihana

¹² Neryo mũsĩkaye ebyala byolobyolo nʼamarwĩ awakatitimana!

¹³ Mubye mukakwama enzira eyitunganene, ekirema sĩkĩkwe, nĩkwa kĩlamĩbawe.

¹⁴ Mukwamirire nʼomũhwa eribya nʼobuholo nʼabandu bosĩ, kandi mukwamirire eribya nʼengebe ĩbũyĩrĩre. Oyũtabũyĩrĩre siendisyalola oko Mukama.

¹⁵ Mũlebaye Sihabye omundu oyukabula oko lukogo lwa Nyamuhanga. Kandi mũlebaye Sihabye omundu oyũkalĩre omo mutima, oyukaleta obũlĩge, neryo abangi bakatsanda.

¹⁶ Kandi Sihabye mundu mũsĩngĩrĩ, kutse oyutekenga Nyamuhanga nga Esaũ, oyo wagũlaya omwandu wuwe wʼobukulu busana nʼekisa kiguma.

¹⁷ Kusangwa mũnasĩ ngoko enyũma wʼaho, mwasonda eribana omũyĩsa wa tata wuwe nĩkwa mwatalĩgĩrwa. Kusangwa mwatabana enzira yʼeribindula omwatsi akola, nomo anasondayago omwʼirira lyʼemĩsonĩa.

¹⁸ Kusangwa sĩmwetahĩka oko kitwa ekyangatũlwako, nʼoko muliro owakagulumira, nʼoko mwĩrĩmya nʼekĩtũ kĩkĩnĩre, nʼoko kanyabungu,

¹⁹ nʼomulenge wʼengubi, nʼomulenge wʼoyũkabũga. Omugulu abandu bowa omulenge oyo mobalemba-lemba bati, omulenge oyo syasyeswabwirabo ekindi kĩnywa.

²⁰ Kusangwa mobataluka erĩowa eritegeka eryo lyabũga liti, Enyama yamatũla oko kitwa ekyo, ĩyĩtwa omo mabwe.

²¹ Omwatsi oyo abya akũbahya abandu bo kutsibu. Kyaleka Musa ĩnĩabũga ati, Namubaha kutsibu nʼerititimana.

²² Nĩkwa ĩnywe mwabĩrĩhĩka oko kitwa kyʼeSĩonĩ, nʼomũyĩ wa Nyamuhanga oyuliho, nʼoko Yerũsalema yʼelubula, nʼoko bamalaĩka abateganzika.

²³ Kandi mwabĩrĩhĩka okwʼĩhĩndana lyʼehimbere hya Nyamuhanga, ehĩsakĩre elubula, kandi mwabĩrĩhĩka uku Nyamuhanga Omũtswerĩ wʼabandu bosĩ, nʼoko bĩrĩmũ byʼabandu batunganene abahĩkene.

²⁴ Kandi mwabĩrĩhĩka uku Yesu omũsanganĩa wʼerilagana lihya-lihya, nʼoko musasi owʼerĩlagalĩrya, owakakanganaya omwatsi owene kwilaba erĩtũlago lyʼomwatsi gʼomusasi wa Abele.

²⁵ Mũlebaye simugane oyũkabũga. Abagana erĩowa oyo wabũga ekĩnywa kya Nyamuhanga oko kihugo, mobatabala. Kwilaba aho netu sitwendisyabala twamagana erĩowa omulenge wʼoyo wʼelubula.

²⁶ Oko mugulu oyo, omulenge wa Nyamuhanga mwasũka-sũkanĩa ekihugo, nĩkwa lino abirilaga ati, Nasyasũka-sũkya kandi, butsira ekihugo ĩkyokyene, nĩkwa nʼolubula nibya.

²⁷ Omugulu akabũga ati, Akandi, akakangaya ndeke ngoko ebyahangikawa ebĩkasũka-sũkanĩbawa byasyalũsĩbwaho, neryo ebindu ebyo ebitetoka erĩsũka-sũkanĩbwa ĩbyasĩgalaho.

²⁸ Neryo tubye nʼewasĩngya, kusangwa tukabana obwami obutetoka erĩsũka-sũkanĩbwa. Tukolere Nyamuhanga nʼerĩmũtsemesya, tumukenge nʼerĩmũsĩkya.

²⁹ Kusangwa Nyamuhanga wetu ni muliro owakatogotaya.