AbaEbrania 11 - AMASAKO ABOYTRTRE WA NYAMUHANGA AWAKAHULAWA MO BIBLIA

Eribya nʼErĩkĩrĩrya

¹ Nĩkwa erĩkĩrĩrya ni ʼminya kũndũ emyatsi eyo tũkahĩra kwʼamaha, kandi nĩʼriga kwenene emyatsi eyo tutelangira.

² Kusangwa busana nʼerĩkĩrĩrya lyabo, abandu ba kera mobabana erĩsĩmwa lya Nyamuhanga.

³ Ni busana nʼerĩkĩrĩrya tukaminya kwʼekihugo kyahangikawa omo kĩnywa kya Nyamuhanga, neryo ebikalolawako mobyalũa ukwʼebyo ebitelolawako.

⁴ Busana nʼerĩkĩrĩrya Abele mwaherera Nyamuhanga obuhere bowene kwilaba obwa Kaĩna. Neryo Nyamuhanga mwamwahula mo mutunganene kusangwa Nyamuhanga mwatũlago kwʼamalĩga olũsũnzo luwe. Kandi busana nʼerĩkĩrĩrya liwe, Abele nomo anahola, akĩnabũga.

⁵ Busana nʼerĩkĩrĩrya, Enoka mwatwalwa endata butsira erihola, naye mwatabanika, kusangwa Nyamuhanga mwamutwala endata; nĩkwa embere wʼeritwalwa endata liwe, mokyatũlwa busana naye bati mwatsemesya Nyamuhanga.

⁶ Kandi ahate erĩkĩrĩrya omundu siangatoka erĩtsemesya Nyamuhanga, kusangwa litolere oyũkahĩka uku Nyamuhanga ĩnĩkĩrĩrya ko Nyamuhanga aneho, kandi kwʼakahemba abakamusonda-sonda.

⁷ Kandi busana nʼerĩkĩrĩrya, Noa iniakahanawa na Nyamuhanga busana nʼemyatsi eyite yalolwako, mwakenga Nyamuhanga; neryo mwakokotya obwato busana nʼerĩlamya ekĩtũnga kiwe. Busana nʼekĩ mwahĩra olubanza oko kihugo, neryo mwabana eritunganene erĩkahĩka omo nzira yʼerĩkĩrĩrya.

⁸ Busana nʼerĩkĩrĩrya, Abrahamũ omugulu abirikirawa, mwowa, nʼeriya oko kihugo ekyo Nyamuhanga amulaga erimuhakyo. Neryo mwalũa omo kihugo kiwe, ĩsĩasĩ eyo akaya.

⁹ Busana nʼerĩkĩrĩrya, Abrahamũ mwĩkala ngʼomubunga omo kihugo ekite kiwe, ekyalagawa. Mwĩkala omo mahema haguma na Ĩsaka, na Yakobo, abasangira erilaga eryo.

¹⁰ Kusangwa Abrahamũ abya akalindirira omũyĩ Wʼebibanza ebĩsĩkĩre. Omũyĩ ogo Nyamuhanga akokotaya nʼerĩhĩmbago.

¹¹ Busana nʼerĩkĩrĩrya, Sara mwabana amaka wʼeriheka obukule, nomo anabya ĩnĩabĩrĩlabya omugulu wʼeributa abana, kusangwa mwayiketera Nyamuhanga oyo wamulaga.

¹² Neryo Abrahamũ nomo mubiri wuwe abya ngʼabirihola, mwabuta abandu bangi ngʼesyongũnũnũ esiri omo kyanya, abateganzika ngʼemisege eyiri oko mũsĩke wʼengetsi.

¹³ Abosĩ aba mobahola omwʼĩkĩrĩrya, isibetabana ebyalagawa na Nyamuhanga, nĩkwa mobalangirabyo hali, nʼerĩrĩgabyo, kandi mobakangya ngoko babya balalĩrĩrĩ, nʼabĩkalanĩ muna-kihugo.

¹⁴ Kusangwa abakabũga emyatsi eyĩ, bakakangaya ndeke ngoko bakaronda ekihugo kyabo.

¹⁵ Kandi kumbe balibya bakibuka ekihugo ekyo balũamo, nga babiribana omwanya wʼerisuba mukyo.

¹⁶ Nĩkwa lino, bakwĩre olukando lwʼekihugo kyowene ukwʼaho, ekihugo kyʼelubula. Kikaleka Nyamuhanga ĩnĩatakwa esĩsonĩ eriahulwa mo Nyamuhanga wabo; kusangwa abĩrĩkokoteryabo omũyĩ.

¹⁷ Busana nʼerĩkĩrĩrya, Abrahamũ omugulu alengawako, mwaha mugala wuwe Ĩsaka mo buhere. Kandi oyo wabana esyondagane, mwabya akahera ekyusa kiwe mo buhere.

¹⁸ Kusangwa Nyamuhanga mwabwira Abrahamũ ati, Abana ba Ĩsaka basyahulwa mo bana bawe.

¹⁹ Abrahamũ mwaganza ngoko Nyamuhanga angatoka erĩlũbũkya Ĩsaka oko baholĩ, kandi liri ngʼeriswamubana ngʼoyũkalũbũka oko baholĩ.

²⁰ Busana nʼerĩkĩrĩrya, Isaka mwatsumula Yakobo na Esaũ omo myatsi eya­syasa.

²¹ Busana nʼerĩkĩrĩrya, Yakobo abere asonda erihola mwatsumula obuli mugala wa Yosefũ. Neryo mwaramya Nyamuhanga iniakahanganira oko mũtso wuwe.

²² Busana nʼerĩkĩrĩrya, Yosefũ abere asonda erihola, mwahula erĩlũa lyʼAbaĩsraelĩ omo kihugo kyʼeMĩsĩrĩ, kandi mwahana busana nʼamakũha wuwe.

²³ Busana nʼerĩkĩrĩrya, ababũtĩ ba Musa mobamũbĩsa emikera ĩsatu, ekiro abutawa. Kusangwa mobalangira kwʼali mwana mubuya, kandi mobatubaha eriketa ekihano kyʼOmwami.

²⁴ Busana nʼerĩkĩrĩrya, Musa abere abikula mwagana eribirikirwa mo mugala wa mwali wa Farao.

²⁵ Musa mwayisoga erĩendererĩbwa haguma nʼabandu ba Nyamuhanga, kwilaba erĩyĩtsemesya akatambĩ kake omo bitsange byʼebibi.

²⁶ Musa mwaganza erĩsekererĩbwa busana na Kristo nga ndũndĩ nene eyĩlabĩre obuteke bosĩ bwʼeMĩsĩrĩ, kusangwa abya akayiketera oluhembo.

²⁷ Busana nʼerĩkĩrĩrya Musa mwalũa eMĩsĩrĩ, mwatubaha erihitana lyʼOmwami. Kusangwa mwayĩyĩnĩa, iniakalangira oyutelolawako.

²⁸ Busana nʼerĩkĩrĩrya, Musa mwahĩra Erikiruka, kandi mwategeka erĩhakabya lyʼomusasi oko syongyo, omũlaĩka wʼoluholo siasyetũla oko himbere hyabo.

²⁹ Busana nʼerĩkĩrĩrya, Abaĩsraelĩ mobasoka Engetsi yʼOmunyama ngʼekitaka kyũmĩre, nʼAbanya Mĩsĩrĩ omugulu balenga erisoka, mobasendĩbwa.

³⁰ Busana nʼerĩkĩrĩrya, ekĩyĩte kyʼamabwe ekyʼeYerĩko mokyaterera ahisi, Abaĩsraelĩ ĩbamabĩtĩmba kukyo ebiro birinda.

³¹ Busana nʼerĩkĩrĩrya, Rahabũ Omũmalaya mwatahera haguma nʼabatakenga Nyamuhanga, kusangwa mwakokya abalĩngĩ omo buholo.

³² Nasyaswabũga bindi byahi kwehĩ? Kusangwa singwite omugulu wʼeryahula Gĩdeonĩ, Baraka, na Samũsonĩ, Yefũta, Dawĩdĩ, Samwelĩ nʼabamĩnyererĩ;

³³ mobakĩnda amami busana nʼerĩkĩrĩrya, mobakola emĩbĩrĩ yʼeritunganene, mobabana ebyo Nyamuhanga alaga, mba amuno wʼesyondale.

³⁴ Kandi mobalĩmya omuliro owakalĩre, mobabala omũyalĩ. Ababya bolo mobabana amaka, mobabya esyombangĩ omo malwa, nʼerihiga emilondo yʼehandi.

³⁵ Abakalĩ mobaswasunga abaholĩ babo busana nʼerĩlũbũkĩbwa. Kandi abandi mobagalĩbwa, ibakagana eriboholwa, ibatoka eribana erĩlũbũka oko ngebe yowene kwilaba.

³⁶ Kandi abandi mobasekererĩbwa, mobagalwa, nʼerĩswĩrĩbwa, kandi abandi mobabohwa omo mahulula nʼerĩhĩrwa omo mũlĩkĩ.

³⁷ Mobĩtwa omo mabwe, abandi mobatũbwa omo mĩsũmeno mo bitswe bibiri, mobĩtwa omo mũyalĩ, mobalendera ibambite esyongobĩ syʼesyombũlĩ nʼesyʼesyombene, mobabula ebyosĩ, mobendererĩbwa, mobakolwa nabi.

³⁸ Ekihugo kyabya isikitolerebo. Babya bakagenda kitya-kitya omo mbwarara nʼoko bitwa, ĩbĩkere omo myangalũ, nʼomo byũna omo kitaka.

³⁹ Abosĩ aba mobasĩmwa busana nʼerĩkĩrĩrya lyabo, nĩkwa mobatabana ekyo balagawa.

⁴⁰ Kusangwa Nyamuhanga iniabiritubikira ekibuya kwʼaho, neryo Nyamuhanga abya anzĩre ĩtwahĩkana haguma nabo.