AbaEbrania 10 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Kusangwa Emigambo iri ngʼekyũtsũ-tsũ buyira kyʼemyatsi yowene eyikandisyahuluka. Siyirisosa kwenene emyatsi eyo. Emigambo siyangatoka erĩhĩkanĩa abandu abakahĩka hakũhĩ oko mahere ago bakahera oko buli mwaka butsira erĩũmbya.

² Kite kitya, kumbe abandu abakaramaya Nyamuhanga babiriera ndeke kwʼebibi byabo, kumbe obunyamutima bwabo sĩbwangakangyabo ebibi byabo. Kandi ĩbabĩrĩũmbya erihera obuhere.

³ Nĩkwa amahere aya, abya akĩbũkya abandu ebibi byabo obuli mwaka.

⁴ Kusangwa omusasi wʼesyonume nʼowʼesyombene sialitoka erĩlũsya ebibi.

⁵ Neryo omugulu Kristo ahĩka omo kihugo mwabũga ati, Amahere nʼesyohongo, sĩwanzĩrebyo, Nĩkwa wabĩrĩnyĩkokoterya omubiri.

⁶ Sulitatsemera amahere wʼerĩokya nʼamahere busana nʼerĩlũsya ebibi.

⁷ Neryo monabũga nyiti, Ĩngye yono, namasa. Erikola erisonda lyawe, uwe Nyamuhanga, Ngoko kĩsakĩre busana nage omo kitabu kyʼEmigambo.

⁸ Omugulu abũga erĩmbere ati, Amahere nʼesyohongo, nʼamahere wʼerĩokya nʼamahere busana nʼebibi, sĩwanzĩrebyo kutse eritsemerabyo. Mwabũga atya nomo amahere aya akaherawa ngoko Emigambo ikategeka.

⁹ Neryo mwabũga ati, Lebaya, namasa erikola erisonda lyawe. Nyamuhanga akalũsaya amahere gosĩ wa kera nʼerĩhĩra obuhere bwa Kristo omo mwanya wago.

¹⁰ Nĩkwa Yesu Kristo mwakola erisonda lya Nyamuhanga. Neryo kusangwa Yesu Kristo mwakola erisonda lya Nyamuhanga, twabirihigulwa, kusangwa Yesu Kristo abiriha omubiri wuwe go ngendo nguma busana na kera na kera.

¹¹ Obuli mũhererĩ wʼAbayũda akahangana ebiro byosĩ oko mũbĩrĩ wʼekisomo, nʼerihera amahere engendo nyingi. Amahere ayo sialitoka erĩlũsya ebibi.

¹² Nĩkwa Kristo mwahera obuhere buguma bwa kera na kera busana nʼebibi, neryo mwĩkala oko luhande lwʼamali lwa Nyamuhanga.

¹³ Akalinda erĩhĩka aho esyonzĩgũ siwe syasyahĩrwa ngʼekĩtũmbĩ kyʼebisando biwe.

¹⁴ Kusangwa omo buhere buguma abĩrĩhĩkanĩa kera na kera ababirihigulwa.

¹⁵ NʼOmũlĩmũ Abũyĩrĩre nibya akatũtũlĩrago; kusangwa akatsũka eritubwira ati,

¹⁶ Omwami Mukulu ati, Enyũma wʼebiro ebyo, nasyayira endagane haguma nabo. Nasyahĩra emigambo yage omo mitima yabo, Kandi nasyasĩkyayo omo malengekanĩa wabo.

¹⁷ Nʼakandi ati, Sindiendisyaswibuka ebibi byabo, nʼerĩhalya lyabo.

¹⁸ Neryo ahali eribuyira lyʼebibi ebĩ, sihakiri kandi obwaga bwʼobuhere busana nʼerĩlũsya ebibi.

Tuyitwale hakũhĩ na Nyamuhanga

¹⁹ Neryo balĩkyetu, tunawite obwĩranda bwʼeriingira Ahabũyĩrĩre Kutsibu busana nʼomusasi wa Yesu.

²⁰ Iye abĩrĩtũlĩbũlĩra enzira nyihya-nyihya, eyikaleta engebe, kandi eyikalaba omo kĩsũkũlĩryo kyʼomubiri wuwe.

²¹ Neryo tuwite omũhererĩ mukulu Oyukasondola enyũmba ya Nyamuhanga.

²² Tuyitwale hakũhĩ na Nyamuhanga, nʼomutima wʼekwenene, nʼerĩkĩrĩrya erĩtswayĩre ndeke, itunawite emitima yerĩre oko bunya-mutima bubi, nʼemibiri eyerĩre omo magetsi owene.

²³ Tuhambe ndeke amaha wetu ago tũkwamĩre, butsira eritika-tika, kusangwa oyo watũla omwatsi oyũ sialiregula.

²⁴ Tũganĩraye ngoko twangĩbũkanĩa oko lwanzo nʼemĩbĩrĩ yowene.

²⁵ Situleke erĩhĩndana lyetu haguma, ngʼemibere yʼabandi bandu, nĩkwa tũsĩkanaye. Kandi tuyitsinge umwʼebyo, omugulu tukalangira ekiro kyʼomukama kĩkahĩka hakũhĩ.

²⁶ Twamasimbirira erikwama ebibi omo pono, itwamabiminya ndeke omwatsi wʼekwenene, ko hatakiri buhere busana nʼebibi.

²⁷ Nĩkwa hali eririndirira omwʼiubaha omusango nʼomuliro owakalĩre, owakandisyabuga esyonzĩgũ sya Nyamuhanga.

²⁸ Oyukaketa Emigambo ya Musa akahola butsira eriganyirwa busana nʼerĩtũlago lyʼabalangĩrĩ babiri kutse basatu.

²⁹ Nʼoyukapona Omugala wa Nyamuhanga, nʼerilangira omusasi wʼendagane owamuhigula ngʼekindu buyira, atolere erisuyirwa kutsibu kwʼaho. Nʼoyukatsuma Omũlĩmũ wʼolukogo, uti omundu oyo siatolere erisuyirwa erĩkalĩre kutsibu kwʼaho kwehĩ?

³⁰ Kusangwa tũnasĩ oyo wabũga ati, Erĩkĩsya ni ryage, nasyaliha. Kandi oyo wabũga ati, Omwami Mukulu asyatswera abandu buwe.

³¹ Ni kindu kyʼerĩũbahya eriwa omo byala bya Nyamuhanga oyuliho.

³² Nĩkwa mwibuke ebiro byʼerĩmbere, omugulu mwabana ekyakakala kya Nyamuhanga, ngoko mwayĩyĩnaya butsira erĩkĩndwa omo malwa awakalĩre, nʼomo malĩge.

³³ Oko gundi mugulu mwabya imukatsumawa nʼerĩendererĩbwa embere syʼabandu bosĩ. Kandi momwaganzwa ngʼabandu abendererĩbawa batya.

³⁴ Kandi momwasangira amalĩge wʼabandu bʼomũlĩkĩ, kandi ĩmũkalĩga nʼobutseme erisagulwa ebindu byenyũ. Kusangwa mwabya ĩmũnasĩ ko munawite ebindu bibuya kwʼaho ebikandisyabyaho kera na kera.

³⁵ Neryo simuleke eriyiketera Nyamuhanga, kusangwa likaleta oluhembo lunene.

³⁶ Neryo litolere ĩmwayĩyĩnĩa, neryo imwakola erisonda lya Nyamuhanga, imwatoka eribana ebyo Nyamuhanga alaga.

³⁷ Kusangwa Amasako ati, Kusangwa hakĩsĩya katambĩ kake Nʼoyukasa asyahĩka; I siendisyamala.

³⁸ Nĩkwa omutunganene wage asyabyaho busana nʼerĩkĩrĩrya liwe. Nĩkwa amasuba enyũma, omutima wage siangamutsemera.

³⁹ Nĩkwa ĩtwe Situli ukwʼabo abakasuba enyũma nʼerihera, nĩkwa tuli ukwʼabo abakĩkĩrĩraya nʼerĩlamya emitima yabo.