AbaEbrania 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga abĩrĩbũga omo Mugala wuwe

¹ Nyamuhanga kera mwabũga nʼabotata-kulu betu omo bĩnywa byʼabamĩnyererĩ, esyongendo nyingi nʼomo syo­nzira mĩsĩndo-mĩsĩndo.

² Nĩkwa omo biro ebĩ byʼenyũma-nyũma abĩrĩbũga netu busana nʼomugala wuwe. Nĩkwa Nyamuhanga mwahangika omo byala byʼomugala wuwe ekihugo nʼebyosĩ ebiri omo kyanya. Kandi Nyamuhanga abĩrĩhĩra Omugala wuwe eribya Omwenye myatsi yosĩ.

³ Omugala akakangabasanaya nʼolukengerwa lwa Nyamuhanga. Kandi iye ni kiminyikalo kwenene kyʼeribyaho lya Nyamuhanga. Kandi akahanganaya emyatsi yosĩ yʼekihugo nʼeyʼekyanya omo kĩnywa kyʼobũtokĩ buwe. Neryo abere abĩerya ebibi busana nʼabandu, mwĩkala oko luhande lwʼamali lwa Nyamuhanga Omwenye Obukulu Owendata kutsibu.

Omũlamya ni mukulu kwilaba abamalaĩka

⁴ Neryo Mugala mwabya mukulu kwilaba abamalaĩka, ngoko erĩna liwe eryo ni rikulu kwilaba eryʼabamalaĩka.

⁵ Kusangwa Nyamuhanga mwabwira omũlaĩka wahi na kera ati, Uli Mugala wage, Namakubuta mũnabwĩre. Nʼakandi ati, Nasyabya Ĩse wuwe, Naye asyabya Mugala wage.

⁶ Kandi omugulu Nyamuhanga abya akaleta akambere kuwe omo kihugo, mwabũga ati, Abamalaĩka bosĩ ba Nyamuhanga bamũramaye.

⁷ Neryo Nyamuhanga mwabũga busana nʼabamalaĩka ati, Nyamuhanga akayira abamalaĩka buwe mo mahunga, Kandi akayira abagombe buwe mo birimi byʼomuliro.

⁸ Nĩkwa Nyamuhanga akabũga busana nʼomugala ati, Ekĩtũmbĩ kyawe kyʼobwami, uwe Nyamuhanga, ni kya kera na kera, Ukatabala oko bwami bwʼerĩbanza.

⁹ Wabirianza eritunganene, ũkakwa ebibi byʼobusu; Kikaleka Nyamuhanga, ye Nyamuhanga wawe akayisoga we. Kandi abĩrĩkũtũlĩra kwʼobutseme bwʼerĩsĩkya kwilaba eryo aha abalĩkyenyũ.

¹⁰ Kandi ati, Uwe Mwami Mukulu, erĩmbere mowahĩra ekibanza kyʼekihugo. Nʼolubula nĩ mũbĩrĩ wʼebyala byawe.

¹¹ Ebyosĩ ebyo byasyabulirayo, nĩkwa Uwe wasyabyaho Nʼebyosĩ ebyo byasyakula ngʼolukimba,

¹² Kandi wasyalĩngabyo ngʼerĩkotĩ, Byasyahĩndũkĩbwa ngʼolukimba. Nĩkwa uwe une ngoko wabya. Nʼemyaka yawe siyendisyahwa.

¹³ Nĩkwa Nyamuhanga mwabwira omũlaĩka wahi na kera ati, Wĩkale oko luhande lwage lwʼamali, Erĩhĩka aho nasyahĩrĩra esyonzĩgũ syawe Omo kĩtũmbĩ kyʼebisando byawe.

¹⁴ Kandi abamalaĩka bosĩ sĩ bĩrĩmũ ebikakolera Nyamuhanga kwehĩ? Sibetumawa na Nyamuhanga erĩwatĩkya abo abasyabana erilama kwehĩ?