3 Yoane 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ĩngye mukulu ngakusakira uwe Gayo mwanze, oyo nyanzĩre kwenene.

² Uwe mwanze wage, ngasaba nyiti, emyatsi yawe yosĩ yowane, kandi ukote ngoko mutima wawe akũwana.

³ Kusangwa monatsema kutsibu ekiro abalĩkyetu bahĩka nʼerĩtũlago ngoko uli omo mwatsi wʼekwenene, kandi ngoko ũkwamĩre ndeke omwatsi wʼekwenene.

⁴ Sihali ekĩkanyĩtsemesaya ngʼerĩowa ngoko abana bage bakakwama ndeke omwatsi wʼekwenene.

Eripipa Gayo

⁵ Uwe mwanze wage, Sulitalegula umwʼebyo ukakola erĩwatĩkya abalĩkyetu, nomo bangabya bagenĩ bʼehali.

⁶ Nabo bakakũkanaya omo kanĩsa, omwatsi wʼolwanzo lwawe. Nawe wasyakola ndeke wamakwamanĩsyabo omo nzira yabo, ngoko litolere embere sya Nyamuhanga.

⁷ Kusangwa bagenda omo lugendo omo mũbĩrĩ wa Kristo, kandi abatĩkĩrĩrye sibetahabo ekindu kyʼerĩwatĩkyabo.

⁸ Neryo litolere ĩtwakokya abandu ngʼabo, neryo ĩtwe itwatoka erisangira haguma nabo omo mũbĩrĩ wʼomwatsi wʼekwenene.

Omwatsi wa Dĩotrefe na Demetrĩo

⁹ Monasakira ekanĩsa ebarua, nĩkwa Dĩotrefe, oyo wanzĩre eribya mukulu wa kubo, Sĩalĩrĩga ebyo tũkabũga.

¹⁰ Busana nʼomwatsi oyũ, ekiro nasyayayo, nasyahũlũkya emĩbĩrĩ eyo akakola, busana nʼebĩnywa bibi ebyo akatuhandikirira, omo mabehĩ. Kandi kwilaba aho sĩalĩkokaya abalĩkyetu, ĩnĩakakakĩraya abanzĩre erĩkokya abandu, nʼerihigabo omo kanĩsa.

¹¹ Uwe mwanze wage, sũgerereraye ekibi, nĩkwa ũgerereraye ekibuya. Oyukakola ebibuya ni wa Nyamuhanga. Nĩkwa oyukakola ekibi sialitasunga Nyamuhanga.

¹² Abandu bosĩ bakatũla omwatsi owene busana na Demetrĩo. Kandi omwatsi wʼekwenene akamwahula ndeke nibya. Netu nibya tũkatũlago tutya, nenyũ mũnasĩ ngoko tũkatũlago kwenene.

Erĩkerya erikabuga ebarua

¹³ Nabya nʼemyatsi mingi yʼerĩkũtũlĩra, nĩkwa sĩnyanzĩre erikusakirabyo omo kalamu nʼobwĩno.

¹⁴ Nĩkwa indi nʼamaha erikulolako lũba, neryo twasyakanĩa obũsũ oko bũsũ.

¹⁵ Obuholo bubye nenyũ. Abĩra betu bakakũkeraya. Ũkeraye abĩra betu mo lĩna-lĩna. Ĩngye YOANE.