2 Timoteo 4 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ngakuhana embere sya Nyamuhanga nʼembere sya Kristo Yesu, oyo wasyatswera abandu bosĩ, abaliho, nʼababirihola. Kandi ngabahana busana nʼerĩhĩka lya Kristo nʼobwami buwe, nyiti,

² Ũtũle Engulu Yowene yiwe, kandi uhatikane erĩtũlayo omo migulu yosĩ, oko mugulu mubi, kutse oko mugulu owene. Ũmĩnyĩsaye abandu bo ndeke, ukungebo, Ũsĩkaye emitima yabo, nʼerĩkangĩrĩryabo nʼeriyibombeka ndeke.

³ Kusangwa omugulu asyasa isibendĩsyowa erĩkangĩrĩrya lyʼekwenene, nĩkwa basyakwama esyongumbu syabo, nʼeriyibanira abakangĩrĩrya abakabũga ebĩnywa byʼekĩsehya.

⁴ Kandi basyabũnũkala okwʼowa omwatsi wʼekwenene, nʼerihulikirira emitsye yʼebihaniriro.

⁵ Nĩkwa uwe Ũyĩtegaye omo myatsi yosĩ; ũyĩyĩnaye omwʼiagalwa, kandi Ukole omũbĩrĩ wʼerĩtũla Engulu Yowene, Ũberereraye ubugirire emĩbĩrĩ Nyamuhanga akuha.

⁶ Nĩkwa ĩngye, lino nyĩkĩsĩya ĩnakwa busana nʼEngulu Yowene, nʼendambĩ yage yʼerigenda yabĩrĩhĩka.

⁷ Nabiriyitsinga ndeke omo matangwa, nabiribuga olugendo, nabĩrĩteya erĩkĩrĩrya lyo ndeke.

⁸ Kandi nabiribikirwa embĩta yʼeritunganene eyo Mukama, Omũtswerĩ oyutunganene, asyamba oko Kiro ekyo. Kandi si busana nage ĩngyowene, nĩkwa asyahayo oko bosĩ abanzĩre eributuka liwe.

Ebĩnywa busana na Tĩmoteo

⁹ Ulenge kutsibu erĩnyĩhĩkako lũba.

¹⁰ Dema abirinyitswako, nʼeriya eTesalonĩka, kusangwa abirianza emyatsi yʼekihugo kino. Kandi Kreske abiriya eGalatĩa, na Tĩto abiriya eDalmatĩa.

¹¹ Lũka ĩyowene ali haguma nage. Wende Marĩko Umulete haguma nawe, kusangwa anganyĩwatĩkya ndeke omo mũbĩrĩ.

¹² Nĩkwa nabirituma Tĩkĩko yʼeEfeso.

¹³ Ekiro wasyasa iwaleta erĩkotĩ ryage eryo nasĩga haguma na Karpo eTroa; kandi ulete ebitabu, nĩkwa kwilaba ulete ebitabu ebyasakawa oko ngobĩ.

¹⁴ Nĩkwa Alesandũro, omũhesĩ wʼemiringa, mwanyikola nabi kutsibu, Omukama asyamuliha busana nʼemĩbĩrĩ yiwe.

¹⁵ Ũyĩtegaye busana naye, kusangwa abya akalwa kutsibu nʼerĩkangĩrĩrya lyetu.

¹⁶ Omugulu nayihanganira, sihabya mundu oyukanyimira, abosĩ mobanyitswako. Nyamuhanga kumbe siangaganzirabo omwatsi oyũ!

¹⁷ Nĩkwa Omukama mwanyimira, kandi mwamba amaka, kyaleka inatoka erĩtũlaganĩa Engulu Yowene, ebindi Bihanda byosĩ bitoke erĩowayo. Kandi monalamĩbwa oko buno bwʼendale.

¹⁸ Neryo Omukama asyanyĩlamya kwʼekibi kyosĩ, nʼerinyitwala buholo omo Bwami buwe bwʼelubula. Neryo olukengerwa lubye ukwʼiye busana na kera na kera. Amina.

Erĩkerya abandi

¹⁹ Ũnyĩkereraye Pĩrĩsĩla na Akwĩla, nʼabandu bʼenyũmba ya Onesĩforo.

²⁰ Erasto mwasĩgala eKorĩnto, kandi monasĩga Trofĩmo yʼeMĩleto inialwere.

²¹ Ulenge kutsibu erĩmbĩkako embere wʼomugulu wʼeritsuku. Eũbũlo, akakũkeraya, na Pũde, na Lĩno, na Klaũdĩa, nʼabandi balĩkyetu bosĩ bakakũkeraya.

²² Omukama abye nʼomutima wawe. Olukogo lwa Nyamuhanga lubye nʼĩnywe bosĩ.